پەلاماردان باڵە چەکدارەیل و بڕین پەیوەندی وەرد بەغداد.. زەیدی پەیامەیل "باج پەککەفتن بیچەککردن" وەرگرێد

شەفەق نیوز - بەغداد / واشنتۆن 

دۆسیەی کۆنترۆڵکردن چەک وە دەس دەوڵەت لە عراق رۊوەرۊ پەککەفتنیگ زیایەوبۊ بوود لە ناو جیاوازی هەڵوێستەیل فەسائیل و هێزە سیاسییەیل لەباوەت مەرجەیل رێککەفتنەگە، و فشاریگ ئەمریکی زیایەوبۊ ئەرا هەڵوەشانن پێکهاتە چەکدارەیل یا ملکەچکردنیان ئەرا دامەزراوە فەرمییەیل، لە وەختیگ رخباریەیل فرەترەو بوون لەوەگ نووەوبۊن رۊوەرۊبۊن لە ناوەین واشنتۆن و تاران بۊدە هووکار خستن بەغداد لەوەردەم تەنگژەیگ ئەمنی و سیاسی ئاڵۆز.

 لە وەختیگ لایەنەیل لە چوارچیوەی هەماهەنگی و باڵەیل دووپات لەبان ئەوە کەن کە گفتوگۆەیل گامیگ گرنگ بڕینە و ناکۆکییەیل شایەت چارەسەر بکریەین، سەرچەوەیل حکومی باس لە رەسین دانوسەنین وەرەو رییگ نیمچە بەسیاگ کەن، لە سای رەتکردن دەسوەردان بڕیگ لە گرووپەیل لە توانایەیل سەربازییان، و بەرزەوبۊن هەڕەشەیل ئەمریکی وە ئامانجگردنیان ئەگەر خریانە ناو هەر رۊوەرۊبۊنیگ هاتگ لە شان ئیران.

 ئی جیاوازییەیلە ئاشکرا لە ئاڵۆزییەیل کەن کە رەد بوود لە پرسی رادەسکردن چەک، تا ئایەندەی باڵەیل لەناوی سیستەم ئەمنی لەخوەی بگرێد، و ئەو گەرەنتی خوازیاگە ئەرا ریگری لە ئامانجگردنیان، و سنوورەیل توانای حکومەت و چوارچیوەی هەماهەنگی (کە هێزە سیاسییە شیعەیل دەسەڵاتدار لە وڵاتەگە خڕەو کەێد) لەبان چەسپانن رێککەفتنیگ کە وە پەسەنکردن گشت لایەنەیل رەسێد.

ناوبژیوانی چوارچیوەگە

 لەی چوارچیوە، شیەوکەر سیاسی لە واشنتن، رەمەزان بەدران، ئۊشێد کە دانوسەنینەیل لەڕی چوار ئاست وەڕیەو چن، یەکەمیان ئەو گفتوگۆەسە کە چوارچیوەی هەماهەنگی لەڕی دەسەی چواری وەڕیەو بەێد، کە چەسپیاگەسە وە پەیوەندی وەرد باڵەیل، لە جیای چگن حکومەت ئەرا ناو دانوسەنین راستەوخۆ وەگەردیان.

 بەدران ئەرا ئاژانس شەفەق نیوز زیای کەێد، کە ئاست دۊەم لە پەیمانەیل حکومەت لە ماوەی گفتوگۆی وەرد واشنتۆن نۊنەرایەتی کریەێد، کە دووپات لەبان خواستی کرد ئەرا دواییهاوردن دۆسیەی باڵەیل چەکدار، لە وەختیگ ئاست سێیەم بەسێدەو وە هەڵوێست وڵاتەیل یەکگرتگ کە نیەخوازێد پێکهاتەیل چەکدار لە دەیشت چوارچیوە فەرمییەیل لە ناوچەگە بمیینن، و چەوەڕی گامەیل کردەیی عراقی لەی رویە کەێد.

وەلێ ئاست چوارەم، پەیوەندیدارە وە سروشت پەیوەندی ناوەین چوارچیوەی هەماهەنگی و باڵەیل، کە بەدران دۊنێد چوارچیوەگە دەسەڵاتیگ یەکلاییکەر لەبانیان نەیرێد، سەرەڕای وەرپرسیاریەتی سیاسیی لەباوەت پاڵپشتیکردنیان لە سەرەتای دامەزراندنیانەو، کە یەیش کەێدەی ناوجیکردن لە ناوەین ئەو گرووپەیلە و سەرۆک حکومەت.

 دیاری کەێد کە بڕیگ لە باڵەیل خوەیان وە پابەند وە رێککەفتن وەرد حکومەت عێراقی نییەۊنن، کە یەیش سەختی رەسین وەرەو لەیەکفامستن کۆتایی زیاترەو کەێد، وە تایبەت وەرد جیاوازی دیمەنەیل لایەنەیل لەباوەت شیوەی رێککەفتن خوازیاگ.

 بەدران دۊنێد کە واشنتۆن رەفتار وەرد کۆتایی حوزەیران/ یۆنیۆ 2027 جۊر مەوقەی پابەندکەر ئەرا خوەی نییەکەێد، بەڵکم خوازێد وەرەونواچگنیگ هەسکریاگ لەبان زەۊ بۊنێد وەرەو ئاڵشتکردن باڵەیل ئەرا هێزەیل ئەمنی کە لەناوی دامەزراوە فەرمییەیل کار بکەن، وە دیاریکردن ئەوە کە وادەگە لە لایەن عراقییەو راگەیانریاسە وڵاتەیل یەکگرتگ، وەبی ئەوەگ بۊن رێککەفتنیگ ئەمریکی لەبانی بوود.

دیاری کەێد کە لیژنەی چواری پیشنیارەیل داگەسە سەرۆک وەزیرەیل عەلی زەیدی، وەلێ لەی دۊاییە هەڵوێست خوەی لەلێ یەکلا نەکردگە تا ئیسە، شایەت وە هووکار نائاشکرایی رادەی پەسەنکردنی لەلایەن واشنتنەو، و رخ لەوەگ عراق بخەێدە وەرانەوەر پابەندبۊنەیل وەرانوەر باڵەیلیگ کە شایەت بوونە ئامانج ئەمریکی.

 بەدران هوشداری دەێد، لەوە کە یەکلایینەکردن ئی دۆسیە، هاووەخت وەرد ئەگەر نووەوبۊن رۊوەرۊبۊن ئەمریکی ئیرانی، شایەت بڕیگ لە باڵەیل تەکان بنەێد ئەرا چگن وەناو جەنگەگە لە ژیر ناونیشان ئەوەگ وە "ئەرک شەرعی" وەسفی کەن، کاریگ کە شایەت عراق بکیشێدە رەوشیگ فرە رخبار.

پاڵپشتی مەرجدار

لە وەرانوەر یە، موختار مووسەوی، پەرلەمانتار لە فراکسیۆن بەدر وە سەرۆکایەتی هادی عامری، نییەۊنێد کە دانوسەنینەیل رەسینەسە رییگ داخریای، وە دووپاتکردن ئەوە کە حکومەت چوار کەسایەتی دیاری کردگە ئەرا دانوسەنین وەرد باڵەیل، وەلێ گفتوگۆەیل تا ئیسە نەڕەسینەسە دەرەنجامەیل کۆتایی، لە سای بۊین خوازینەیل و جیاوازی کە بڕیگ لە پێکهاتەیل تەقەلای وەدەسهاوردنی دەن لەناویان دامەزراوەیل دەوڵەت.

 مووسەوی ئەرا ئاژانس شەفەق نیوز وت، کە کوتلەی بەدر دژایەتی کۆنترۆڵکردن چەک وە دەس دەوڵەت نییەکەێد، و سەرۆکەگەی هادی عامری خوەی وەرپرسایەتی دانوسەنین وەرد باڵەیل گردیەسە مل وە ئامانج لکاننیان وە سیستەم فەرمی، وە دووپاتکردن لەبان ئەوە کە سوپا و پۆلیس و حەشد شەعبی هەوەجەس ئەو دامەزراوەیلە بوون کە پێکهاتە چەکدارەیل بخرینە ژیریان.

 زیای کەێد کە ئامانجەگە بیناکردن دەوڵەتیگ دامەزراوەیی و نیزامییە، نەک ئەوەگ چەکەیل بەشەوکردن لە دەیشت چوارچیوەی بمیینن، وە دووپاتکردن ئەوە کە هەڵوێست بەدر لەبان پاڵپشتی ئی رێڕەوە وسیەێد.

 ئەندام ئەنجوومەن نۊنەرەیل لە کوتلەگە حەسەن شاکر کەعبی وەگەردی هاوڕاس، وەلێ وەسفکردن ئەوەگ رۊ دەێد وە ناکۆکی لە ناوەین حکومەت و باڵەیل رەت کەێد، و ئۊشێد کە لایەنەیل لە سەرەتای گفتوگۆەگە رەسینەسە بڕوا وە هەوەجەی پەیاکردن چارەسەرەیل هاوبەش، و جیاوازییەگە پەیوەندیدارە وە ئامرازەیل جیوەجیکردن و ماوەی وەختی، نەک وە بنەمای لەیەکفامستن.

 کەعبی ئەرا ئاژانس شەفەق نیوز دیاری کەێد، کە بڕوابۊن وە توانای دواییهاوردن دۆسیەی چەک لە شەو و رووژیگ چشتیگ راسگانی نییە، وە وەهۊرهاوردن رۆڵ باڵەیل لە رۊوەرۊبۊن ریخریاگ "داعش" لە ماوەی ئەو ساڵەیلە کە هەڕەشە لەبان عراق کرد، و وە دەسنشانکردن ئەرا ئەوە کە هەر لایەنیگ خوازینەیل و دیمەن خوەی دیرێد کە هەوەجەس لەڕی گفتوگۆی سیاسی و ئەمنی باسیان بکریەێد.

 دووپات کەێد کە هادی عامری نۊنەرایەتی ناوبژیوان سەرەکی کەێد لە نزیکەوکردن دیدەیل، نەک تەنیا لە ناوەین باڵەیل، بەڵکم لە ناوەین چوارچیوەی هەماهەنگی و هێزە سیاسییەیل و پێکهاتەیل ترەکیش، وە هەژمارکردن ئەوە کە رۆڵی گرنگ بوود لە رێکخستن گامەیل و خشتەداین ئەرا رەسین وە چارەسەریگ کۆتایی.

وەلێ ئی دیمەن گەشبینە وە تەواوی یەک نییەگرێد وەرد ئەو داتا کە لە ماوەی رووژەیل گوزەشتە دەرکەفتن، چۊنکە سەرچەوەیگ حکومی نزیک لە زەیدی، پەنجشەممەی گوزەشتە ئەرا ئاژانس شەفەق نیوز ئاشکرا کرد، لە رەسین دانوسەنین وەرەو رییگ نیمچە بەسیاگ، وە هووکار وەردەوامبۊن رەتکردن فەسائیل لە رادەسکردن چەکەیلیان.

 سەرچەوەگە هوشداری دا لە گواستنەوەی گرژییەیل راگەیانن لە ناوەین باڵەیل و حکومەت و چوارچیوەی هەماهەنگی وەرەو جادە، وە شیوەیگ کە شایەت رەنگەو بەێد لەبان رەوش ئەمنی، وە نشاندان وە جۊلە و پەیوەندییەیل کە لایەنە کاریگەرەیل لەناوی چوارچیوەگە جیوەجییان کردنە ئەرا کۆنترۆڵکردن گرژییەگە و ریگری لە فرەترەوبۊن ناکۆکییەیل.

 یەیش دۊای رەخنەیلیگ هات کە وەرپرس ئەمنی ئەرا کەتائیب حزبولڵا ئەبو موجاهید عەساف، لە 3 تشرین دۊەم/ نۆڤەمبەر ئیسە، ئاراستەی حکومەت و سەرکردایەتییەیل چوارچیوەی هەماهەنگی کرد، وە پرسیارکردن لەباوەت دۆسیەی سیاسی و ئابووری، کە گرێبەسەیل فرووشتن نەفت ئەرا کۆمپانیای "ئەدنۆک" ئیماراتی لە ناویانە، و وە دووپاتکردن ئەوە کە "مقاوەمەی ئیسلامی" چەوەڕی کۆپییگ لە رێککەفتنەگە وەرد لیژنەی چوارچیوەگە کەێد، و ئەوە کە پرۆسە سەربازییەیلی لەناوی عراق وسانگە تا ئاگادارکردنیگ ترەک.

ناکۆکییەیل شاریاگ

 ئاستەنگەیل تەنیا لەبان هەڵوێست باڵەیل نەوەسان، بەڵکم دریژەو بۊن ئەرا ئامراز وەڕێوەبردن دانوسەنین خوەی، چۊنکە سەرچەوەیگ ئاگادار لە کار لیژنەی چواری، لە 3ی تشرین دۊەم/ نۆڤەمبەر ئەرا ئاژانس شەفەق نیوز ئاشکرا کرد، لە ناڕەزایبۊن بڕیگ لە ئەندامەیلی، کە سەرۆک رێکخراو بەدر هادی عامری لە ناویانە، لە دەسوەردان راسەوخۆی زەیدی لەڕی بەسانن گردەوبوینەیل تاکەکەسی وەرد سەرکردەیل گرووپەیل کە رەت کەن چەکەیلیان رادەس بکەن، وە ترس لەوەگ ئی جۊلەیلە بۊنە هووکار دەرەنجامەیل پێچەوانە.

 وەپەی سەرچەوەگە، لیژنەگە وەرەونواچگنیگ لە گفتوگۆەیلی وەدەس هاوردۊد، و دووپات پابەندبۊنی کرد وە دواییهاوردن ئەرکەیلی لە کۆتایی حوزەیران/ یۆنیۆ 2027، دۊای ئەوەگ ماوەگە دریژەو کریا کە وەرجە ئەوە بڕیار بۊ لە 30 ئەیلول/ سێپتەمبەر دوایی بوەێد، ئەوەیش هاووەخت وەرد کشیانەوی هێزەیل هاوپەیمان ناودەوڵەتی، سەرەڕای پارێزکارییەیل لەبان دەسوەردانەیل لە دەیشت چوارچیوەی.

 لە وەرانوەر ئەوە، وەزیر دەیشت فوئاد حسێن، دۊکە شەممە، ئاشکرا کرد لە رەسین زەیدی وەرەو لەیەکفامستن وەرد چوار باڵ لەباوەت دۆسیەی چەک، وە دیاریکردن ئەوە کە عەسائیب ئەهل حەق و کەتائیب سەیدولشوهەدا رازی بۊن لەبان کۆنترۆڵکردن چەک، لە وەختیگ دانوسەنین وەرد بزووتنەوەی نوجەبا و کەتائیب حزبوڵڵا وەردەوامە.

 حسێن وت کە بەغداد پەیوەندییەیل وەرد تاران کەێد لەباوەت چەک باڵەیل، و کۆنترۆڵکردن چەک وە دەس دەوڵەت هەوەجەس وە گفتوگۆ جیوەجی بوود نەک وە رۊداین رویوەڕویبوین چەکدار.

 ئی لێدوانەیلە نشان دەن وە بۊین جیاوازی لە سروشت هەڵوێستەیل لە ناوەین باڵەیل، تەنانەت ئەوانەیش کە رەت بنەمای رێکخستن چەک نییەکەن، چۊنکە رازیبۊن وە کۆنترۆڵکردنی مەرج نییە کە پەسەنکردن لەبان رادەسکردنی یا هەڵوەشانن پێکهاتە چەکدارەیلە بوود.

 لەی چوارچیوە، شیەوکەر سیاسی نزیک لە چوارچیوەی هەماهەنگی، عیماد موسافیر، ئۊشێد، کە حکومەت و فەسائیل مقاوەمە گامیگ گرنگ لە دانوسەنینەیل بڕینە، و ئەو رێککەفتنە کە وەرجە 30 ئەیلول/ سێپتەمبەر 2026 بۊ بۊە هووکار دەرچگن هێزەیل ئەمریکی و تورکی و ئاهەنگگێڕان وە رووژ سەروەری عراقی.

 موسافیر لە قسەیلی ئەرا ئاژانس شەفەق نیوز هەژمار ئەوە کەێد، کە بنمیچ وەختی دیاریکریاگ تا ناوڕاس ساڵ 2027 نۊنەرایەتی ماوەیگ لە چەوەڕیکردن هاوبەش لە ناوەین حکومەت و فەسائیل کەێد، لە سای رخباریەیل باڵەیل چەکدار لە ئەگەر پێشێلکردن وڵاتەیل یەکگرتگ یا ئیسرائیل ئەرا سەروەری عراقی، یا وەشانن گورزەیل لەناو وڵاتەگە.

 ئۊشێد کە ئی رخباریەیلە یەکیگ لە دیارترین خاڵەیل ناکۆکی دروس کەن، لە وەختیگ حکومەت تەقەلا دەێد ئەوە مسۆگەر بکەێد کە زەۊە عراقییەیل وەکار نیەتیەن جۊر شوینیگ ئەرا دەسدریژیکردن لەبان دەوڵەتەیل هاوسا، وە هەژمارکردن ئەوە کە قسەکردن لەباوەت رخباری چەک باڵەیل، لە بڕیگ لە لایەنەیلی، تەقەلایەیل ئەرا شیوانن دیمەنیان لەخوەی گرێد.

 موسافیر دۊنێد کە هەردوگ لایەنەگە جدیین لە پاراستن سەروەری عراق، و هەوەجەس ئەو ماوە مینێد تا وادەی دیاریکریاگ ری وە چارەسەرکردن ناکۆکییەیل بەێد، وە تایوەت ئەوەگ پەیوەندیدارە وە زەمانەتە ئەمنی و سیاسییەیل.

هوشداری واشنتۆن 

 لە لایەن ئەمریکییەو، پەیامەیل ئەرا بەغداد زیایەو بوون لەباوەت هەوەجەی وەدەسهاوردن وەرەونواچگن لە دۆسیەی کۆنترۆڵکردن چەک، لە ناوڕاس هوشدارییەیل لە لێکەفتەیل وەردەوامبۊن بویین پێکهاتەیل چەکدار لە دەیشت کۆنترۆڵ دەوڵەت.

چۊنکە لە 3ی تشرین دۊەم/ نۆڤەمبەر ئیسە، سەرچەوەیگ سیاسی ئەرا ئاژانس شەفەق نیوز خەوەر دان، کە وەڕێوەبەر کارەیل باڵیۆزخانەی ئەمریکی لە بەغداد، ستیفن فاگن، پەیامەیل گواستیەسەو ئەرا کەسایەتییەیل حکومی و سیاسی، کە لەناوی هوشداری دایە لەوە کە پابەندنەبۊن وە پەیمانەیل و دانان پلانیگ هەسکریاگ ئەرا دواییهاوردن وە بۊن چەک لە دەیشت کۆنترۆڵ دەوڵەت تا 30 حوزەیران/ یۆنیۆ 2027، شایەت واشنتن  تەکان بنەێد ئەرا هەژمارکردن عراق وە دەوڵەتیگ پاڵپشتیکەر ئەرا تیرۆر و گردنەوەر سزایەیل و ریکارەیل وەرانوەری.

 وەپەی سەرچەوەیل، واشنتۆن ریکارەیل کردەیی بەس هەس نەکردگە، وە تایبەت وەرد وەردەوامبۊن هەڕەشەیل باڵەیل و هەوڵ ئامانجگردن باڵیۆزخانەی ئەمریکی لە بەغداد وە فڕۆکەیل بیفڕۆکەوان.

 ئی پەیامەیلە بەرزەو بۊن لە 5 تشرین دۊەم/ نۆڤەمبەر ئیسە، وەختیگ سەرۆک ئەمریکی دۆناڵد ترەمپ پەیوەندییگ تەلەفۆنی وەرد زەیدی جیوەجی کرد، کە دۊای ئەوە گردەوبوین زەیدی وەرد کلکریای ئەمریکی تایبەت ئەرا عراق تۆم باراک هات.

 سەرچەوەیل ئاگادار ئەرا ئاژانس شەفەق نیوز ئاشکرا کردن، کە ترەمپ زەیدی ئاگادار کردگە لە ئامادەیی وڵاتەیل یەکگرتگ ئەرا ئاراستەکردن گورزەیل سەربازی هازدار لە دژ باڵەیل و سەرکردایەتییەیلی ئەگەر بەشداری لە هەر جەنگیگ هاتگ بکەن وە پاڵپشتی ئەرا ئیران، وە دووپاتکردن ئامادەیی واشنتۆن ئەرا پیشکەشکردن پاڵپشتی ئەرا حکومەت عراق لە جیوەجیکردن پرۆژەی کۆنترۆڵکردن چەک.

 وەپەی سەرچەوەیل، سەرۆک ئەمریکی هوشداری دایە لەوە کە هەر پاشەکشەیگ یا دواخستنیگ لەی دۆسیە شایەت واشنتۆن تەکان بنەێد ئەرا دووارە نووڕستن وە ئاست پاڵپشتیکردنی ئەرا زەیدی و حکومەتەگەی.

 لە دیدارەگە وەرد باراک، وەپەی بەیاننامەی نووسینگە راگەیانن ئەرا سەرۆک وەزیرەیل کە ئیوارەی 5 تشرین دۊەم/ نۆڤەمبەر ئیسە دەرچگە، هەردوگ لایەنەگە باس لە پەیوەندییەیل دووانی و هەماهەنگی ئابووری و بەرهەمهازردن کردن، لە شان وەرەونواچگنەیل ناوچەگە و گرنگی خەسەوکردن تەقەلایل دیپلۆماسی ئەرا کۆنترۆڵکردن قەیرانەیل و ریگری لە فراوانەوبۊن ململانێیەیل.

 زەیدی دووپات کرد، لە پەیوەندییەی وەرد ترەمپ لە خود رووژ، هەڵوێست عراق کە رەتکەرە ئەرا وەکارهاوردن زەۊەیلی جۊر شوینیگ ئەرا دەسدریژیکردن لەبان دەوڵەتەیل هاوسا، وە بانگەوازکردن ئەرا رێزگردن لە سەروەری دەوڵەتەیل و پشت بەسین وە گفتوگۆ و چارەسەرەیل ئاشتیانە.

 رەمەزان بەدران ئی جۊلەیلە خوەنێدەو لە چوارچیوەی خوازین واشنتۆن ئەرا دۊنین دەرەنجامەیل کردەیی، نەک بەسیکردن وە پەیمانە سیاسییەیل، وە دەسنشانکردن ئەرا ئەوە کە ئەو ئاستەنگە کە لەوەردەم زەیدییە نۊنەرایەتی کریەێد لە رەسین وەرەو فۆرماتیگ کە دوایی وە بۊین چەک لە دەیشت دامەزراوە فەرمییەیل بوەێد، وەبێ ئەوەگ وڵاتەیل یەکگرتگ یا دەوڵەتەیل ناوچەگە تویڕە بکەێد، یا عراق دەڵەگ بنەێد وەرەو رۊوەرۊبۊنیگ ناوخۆیی.

پەیامەیل هەرێمی

 ئی وەرەونواشگنەیلە هاووەختە وەرد بەرزەوبۊن وتار ئیرانی لەباوەت فراوانەوبۊن رۊوەرۊبۊن هەرێمی، چۊنکە فەرماندەی فەیلەق قودس لە سوپای پاسداران ئیرانی ئیسماعیل قائانی، لە 4 تشرین دۊەم/ نۆڤەمبەر ئیسە، وت، کە سەرکردەیل و چەکدارەیل ئەوەگ تاران وە "بەرەی مقاوەمە" ناوی بەێد وەفاداری رەهای خوەیان راگەیاننە، دۊای رێنماییەیل ریبەر ئیرانی موجتەبا خامنەیی لەباوەت رەفتارکردن وەرد هەڕەشەیل وەبی کۆتوبەنەیل جوگرافی.

 خامنەیی، لە 1 تشرین دۊیەم/ نۆڤەمبەر ئیسە، رێنمایی وە سەرکردە سەربازییە باڵایل ئیران داۊد وە وەڵامدان دەسوەجێ ئەرا هەر هەڕەشەیگ شایەت رۊ بەێد، وەرجە ئەوەگ دۊای سێ رووژ ئافەرین لە رۆڵ باڵەیل بکەێد لە عراق و لوبنان و فەلەستین و یەمەن، و بانگەواز بکەێد ئەرا هازدارکردن ئەوەگ ناسریاگە وە "یەکگردن گۆڕەپانەیل".

 ئی هەڵوێستەیلە رخباریەیل جویش دەن لە ئەگەر خزیان باڵەیل عراقی ئەرا ناو هەر رۊوەرۊبۊنیگ نوو لە ناوەین ئیران و وڵاتەیل یەکگرتگ و ئیسرائیل، وە تایوەت کە بڕیگ لە پێکهاتەیل بەشداریکردنیان لە ململانێگە بەسنەو وە لێکدانەوەیلیگ کە رەد بوود لە هەژمارەیل عراقی ناوخۆیی.

دۊکە شەممە، باڵیۆزخانەی ئەمریکی لە بەغداد هوشداری دا وە هاووڵاتییەیل وڵاتەیل یەکگرتگ کە لە خوەرهەڵات ناوڕاس هەن لە رخباریەیل پەلامارەیل شایەن گرووپ حوسی جیوەجییان بکەێد، بیجگە لە تەقەلایل ئیرانی ئەرا ئامانجگردن وەرپرسەیل ئەمریکی لە ناوچەگە.

 باڵیۆزخانەگە بانگەواز ئەرا خوەیپارێزی کرد لە ئەگەر ئامانجگردن بەرژەوەنییەیل ئەمریکی و هاووڵاتییەیلی، و ئامادەبۊن ئەرا رەوشەیل شیویاگ لە جۊلەی فڕۆکەوانی و بەسانن بڕیگ لە بوارەیل ئاسمانی، لە هوشدارییگ کە فراوانەوبۊن بازنەی رخباریە ئەمنییە پەیوەندیدارەیل وە گرژییە هەرێمییەگە رەنگەو دەێد.