گەردەلوییل تەپوتووز عراق خەێدە وەر رخ داواکاریەیل دارایی و قەرەبووکردنەوەیل ناودەوڵەتی
شەفەق نیوز - بەغداد
روانگەی "عراقی سەوز"، ئمڕوو یەکشەممە، هوشیاری دا لە داواکاری بڕێگ لە وڵاتەیل ئەرا قەرەبووکردن دارایی لە عراق وە مدوو ئەو زەردەیلە کە وەپیان رەسیە لە گەردەلویلەیل تەپوتوز،و داوا کرد کە سەرچەوەیلیگ کە مدوو گەردەلویلەگەن چارەسەر بکریەن.
روانگەگە لە راپۆرتیگ وت: وڵاتەیلیگ هەس زیاتر لە جاریگ لە عراق داوا کەن ئەو سەرچەوەیلە کە مدوو دروسبوین تەپوتوزە چارەسەر بکریەێد دووپاتکرد ئەو وڵاتەیلە پەنابەن ئەرا عراق داوای قەرەبوو ناودەوڵەتی بکەێد ئەرا ئەو زەردەیلە.
دیاری کرد یەکێ لە وڵاتەیل هاوسا چەن جاریگە داوا لە عراق کەێد چارەسەر ئەو سەرچەوەیلە بکەێد تەپوز دروسکەن لە ناوچەی دورگەی محصوور لەناوەین پارێزگایەیل مێسان و موسەننا و دیوانیە، و دیاریکرد ئەوەگ چەسپنێد کە عراق بوودە سەرچەوەیگ ئەرا تەپوتوز تا بوودە بەڵگە ئەرا لایەنەیل ناودەوڵەتی تا داوای قەرەبووکردن دارایی بکەن لە عراق.
راپۆرت روانگەگە دووپاتکرد گیچەڵ هشکەساڵی و بەرزەوبوین پلەی گەرما یەکیگین لە هووکارەیل ئاڵشتبوین کەشوهەوا هێمان وەردەوامن لە وەختیگ عراق هێمان رویوەروی لەدەسدان زەوی کشاوەرزیەیلی و کەمەوبوین سەوزایی بوود، یەیش هووکار سەرەکین ئەرا دروسبوین تەپوتوز.
هەمیش دەسخەشی لە بڕیار نوو حکومەت کرد وەپای ئەوەگ هەرکەس تەقەلای دار بڕین بدەێد بڕ 500 هەزار دینارار سزای دارایی دریەێد، بڕیارەگە وەرای روانگەگە نواگیری لەو کارەیلە کەێد ئامانجیان ویرانکردن باخەیلە و ئاڵشتکردنیان ئەرا زەوی نیشتەجیبوین، هەمیش وەکارهاوردن دار ئەرا ماسی برشان ئەو کارەیلەن کە بویەسە مدوو لەناوچگن شمارەی فرەیگ لە دارودرەخت وە توویوەت دارەیل کوەن و وەتەمەن.
