م کوورپە دۊەت کوردە ماڵانم

شەمامەی شیرین سوسەن خاڵانم 

لە هووز واران لە ئێڵ خوەرم

گوڵوەنی وەهار دایم ها سەرم

هسارەیل گشتێ هانە داوەنم

وێنەی گوڵ خومچە وە بێدەنگ خەنم 

دەسەیلم ماوای چۊزەی دارانن 

گیسەیلم  میلکان نەرمە وارانن

سیەی شەواران ها سیەی چەوم 

شوون مانگەشەو گشتێ ها خەوم 

کەمان ئارەش بژانگ چەومە 

بوو عەتر لیمو ها ئێ وەرقەومە 

ئرمسم ئەڵماس تاش گوونامە 

دەمم مەڵوەن نقرەیل خامە 

چەوم ڕوژنای کیەنی ئاوانه 

لێوم تریوەی سەر سراوانە

باڵام لە وێنەی شاهوو بڵێنه

خەیاڵم وەهار دەیشت گولێنە 

قسیەیلم ئەنجیر باخ ڕێژاون 

چەوەیلم جامەک ناو خوەرەتاون

م شێوەم شیرین ناوم نازارە

دەمم گولباخی باخ وەهارە 

کوردم گوڵوەنی خڵات منە 

سای دار بەڕۊ وڵات منە 

کوردم، ئێرانم نیشتمانمە

تەمام کوردەیل گشت باوانمە

جەڵاڵ کووهی

ت هاتیدو لە نوو واران شروو کرد

لە نوو باخ سیە، مەی وەڵنگ نوو کرد

قسەێ زڵف شەوارو مانگ دیدەد

گوڵ و دار و دڕگ تامازرو کرد

نووشین هاتەمی

دڵم  مینێدە     یەێ   باخ   چەپاوێ 

هناسەی سەردمی خڕ  خوەێدە ناوێ

خە‌مەیلێ  وەفرەگەێ  قەێ دارەگانە 

دەرە لێم گرتێیە  خوەر  پێ  نیە‌تاوێ 

ئێران عە‌لیکەرە‌می

دڵم دی وه‌و دڵ جاران نیه‌‌و دی

له وشکی دڵخوه‌ش واران نیه‌و دی

وه چیند ئه‌وقه‌ره ژان که‌فته ئیره

ک کرماشان وه کرماشان نیه‌و دی

    رزا  جەمشیدی

دڵم فره گیریاس لەێ سەردی ڕووژگاره

خوەزیەو ک خوەر هەڵاێدو بچوودن ئی شەواره

شەکەت بۊه چەوەیلم، لەبه گەردێ له شووند!

تەنیا خوەشی دڵەگەم، کەێ تیەیدنەو دواره؟!

                   موژگان سولێمانپووڕ

م چۊ پەروانە خڕ خواردمە دەورد

وەتم دەرۊند واز کە تا بووم وە نەزرد

هەر دەف م تواسم لید نزیکەو بووم

لیم نەکردی لایگەو ، دڵ هوونکەو بووم

ئەر بۊشی ئەرام مەرام و دەردد

خوەم کەم وە قوروان ئاهەیل سەردد

ئەر تیەڵی دایشتۊ لە ناو ژیاند

خوەم بووم وە شەکەر تیەڵگەیل گیاند

ت خوو زانید عاشقد بۊمەو لە سامد ترسم

لە سەنگینی سامد م بێ دەنگ وسم

لە دڵ ئەڕاد سزم و نیەزام چۊ بۊشم

وە چۊ هالید بکەم نازد بکیشم

م خوو گونا نەکردمە شیفتەێ باڵادم

دڵەگەد ئەڕام واز کە م خاترخادم

هزار جار لە ڕووژ بژیەم و بمرم

هەم ئۊشمە پید دەردد لە ئەمرم

تواسم دڵ لە دەریا بنەم و بامە دیدارد

تا لە نزیکەو بۊنم گلارەێ خەمبارد

دیم سامد سەنگینە چۊ ڕەێ بووم لادەو

چۊ وە دزییەو سەێر کەم نماێ باڵادەو

چۊ دەورد بێیەم تەواف بگرم مزگانی

ئێ جا بۊشم خودا مەمنوون دڵم نەشکانی

ئەو ڕووژە بۊنم سەر گوناد ماچ کەم

گیان ئەگەر بتواید ئەراد حەراج کەم

جەهانبەخش

نیمەڕووێ گیژ و بێ‌حەواس مڵاکەت

هاتە دەر ماڵمان وە‌خواس مڵاکەت

خاس دیارۊ ک لەێ وڵاتە غەریوە

لانەوریزیگ کەس‌ نەناس مڵاکەت

دووسییمان لەو خەزان بێ‌بنە سەر گرت

هات وەگەردم سەر کڵاس مڵاکەت

هەر شەوەکی جوور سا لە‌شوون منەو بۊ

خەفت لە‌گیفان هەر کراس مڵاکەت

نووڕسنم گووڕییا وە‌گەردِ قسەیلێ

داشت هەمیشە جوواو خاس مڵاکەت

ئەوقەرە مەن تا بۊیە بەشێ لە‌ژیانم

ئێ هەمە ساڵەیلە چۊ هەناس مڵاکەت

پارەکە بۊ دیم بێ‌دەنگە و کز و کوورە

هەر لە‌ پەڕ دەروەچێ وساس مڵاکەت

یەێ شەوەکی، چۊ لەئێ ئوتاخ پەشێوە

بێ‌قەپ‌و‌قاڵێ ، بدوون باس مڵاکەت

فکر کەم ئەۊ را چە هات، یا گە وە‌کوو چێ

یا چە لە‌ئێ بۊنێیە توواس مڵاکەت

بابەک دەوڵەتی

هەم شەو سەرد سڕیگم

هەم شەو سەرد سڕیگم، هەم خوەر گەرم گوڕیگم

م چەواشەی عاڵەمم، خوەم هەم نیەزانم چ سڕیگم

جور کەنگڵاشک ک پرچێ ها دەس هاژەی شەماڵەو

بەن دە هۊ زریەی نەۊە پەنجەی دڵم؛ بێ‌باوڕیگم

جور ئەرکوازی دە جەور زاڵنەی زڵم حەسەن‌خان

دەێ شەوار بێ‌بەێانە شێویاگ خەوزڕیگم

نە دەنگ قیڕەی قڵایگە، نە دەنگ قاژەی قوژیگە

دەێ قڵاقیڕان چوولە، م بۊ ئەوخوەێ چڕیگم

چۊ بنەم دەم دەم یا، چۊ بخەم چنگ ئەو یەقەی ئەۊ

م نە گورگ خۊن‌مژیگم، نە دەێِ دەم‌داێڕیگم

را نیەوشکم سەونز و دێز و ڕا نیەخەم سا دە سەر ئاو

جور نیلووفەر منیشە پەلوەچ پا دە قوڕێگم

هۊر دۊر ترنگە‌تانگێ دە بن هشکە گڵاڵێ

شەوق ئاسارەی خەریوی دە شەو سەرد سڕیگم

دی شەکەت بۊمە دە مەنتق، دە لەوەڕگای فیلسووفەیل

شێر وێشەیل جنوونم، خۊن‌فرووش شەڕخڕێگم

پووس م دە جنس دووسە، بێ‌ڕەنگ و بێ‌نام و نیشان

نەسفێدم نە سییەێگم، نە نووێگم نە شڕیگم

نیەێلم ئێ دێو شەوارە ئاو بکەێ دە کوانگ ڕووژ

ڕووژنای ئاسوو ڕووژئەڵدەر شەوئەڵدڕیگم

برشیامە دە خەم ئاواز کوشیاگ قەناری

ئاگر گوڵ‌هیرووێ دە کوانگ کێشت پڕێگم

تێومەو چۊ وەفر پایز، دوومە ئاو و چم وە چاڵاو

ئەڵکەنێ دەێ ماڵ ئمرە، هەر هەناسێ ئاجڕێگم

زاهیر سارایی

لەکم

لەک کوردستان نام‌دیارییم 

ئامووختەی زنەی کوردەوارییم 

کوردم، لەک‌زادەم، نەوادەی مادم

زام‌هوردەی تیر ستەمکارییم

ڕووڵەی فرەزان خەڵک یارسانم 

مورید پاکباختەی ڕاسگوفتارییم 

حەقیقەت ڤتن میرات دوودمانمه 

بێزار ئەژ دروو و ڕیاکارییم 

سەرسپردەی حەق و حەقیقەت منم 

شکەستەی جەوز مەردمدارییم 

گووڵ‌هوردەی جەور نامەردمییم 

دەس و دڵباختەێ نێک‌پندارییم 

ڕووڵەی سەرڤجاخ کەڵن قەوم لەکم 

بەرد ئەر بان بەرد بەدبیارییم 

ڤە نامڕاس مڵک و میرات باوانم 

بوونە تەماشا غەرێڤوارییم 

کورد جەفا دیدەی ڕووژگارانم 

دوشمەن نایانی و بێ‌هاماڵییم 

زادە و پەرڤەردەی کەش و کەمەرم 

خووکەردەی قەیقاج و سوارکارییم 

جفتیار زەحمەتکێش ڕای زنگانیم 

عەهد بەستەی مەنش نیک‌ڕەفتارییم

لەکەمیر

ئەێ گەپ ئامێتە وە خیاڵ ڕەسەن، شێعر!

هۊرْ لە‌هۊرەو چێی هزار ڕەوەن ، شێعر!

ئەێ قسەگاند وە‌تەرز فەلسەفە دژوار

ئەێ رێی هاتن وەرەو تو چۊ کەڵەبەن، شێعر!

ئەێ خەو ئامێتە گەردِ فکرِ جیاریزبەندییەگە

کونج کەمێ شێتی و کەمێ تەڕەزەن شێعر!

ئاو ملِ ئاگرۊ کەلیمە کەلیمەد

کی لە تو ئەو تەمتەراق بێ‌بنە سەن؟ شێعر!

دار وشە! ئێ زەمانە هشک مەنیدە

ئەو هەمە نازارییە ئەڕ اچە نەمەن؟ شێعر!

بۊدەسه شوون قسەیل ئاتەشەدارەیل

هۊچ‌کەس ئێ حاڵدە نیەکەێد پەسەن، شێعر!

یانە کەلیمە نیین ، خودِ کەلەمەیلن

پا بنەنە هەرخەتیگ، بۊدنە پەن، شعر!

وەختێیە دی، شاعرەیلِکاڵ بوێژن

بۊش دروو بۊ قسەیلْ هەر گزەوەن، شێعر!

مەڵوەنِ مانایل! ئەێ بهشتِ کەلیمەیل!

هووشدە خوەد بوو نەکیشنەد وە‌ لەجەن ، شێعر!

بابەک دەوڵەتی

دونیا بێ بنەو لە لێ کــەمەو نیە

ئاوێ کە ڕشیا هـەرگز جەمەو نیەو

سانێ لە جێ خوەێ یەێ پل بخوەێدن

مەحاڵە لە نوو وە جی خوەێ باێدن

دڵێ کە شکیاس لە نوو وە دڵ نیەو

چەمەر وە جیگیر سازو دێوەڵ نیەو

قسیەگ وە ناحەق  دەربچوو لە دڵ

دڵ پاچنێدن وێنەێ پـــــەڕەێ گوڵ

تیڕی لە چلەێ کـــەمان دەربچوو

ئاقەبەتێ کەس نیەزانێ چوە بو

زەمان گوزەرێ ئمریش چودەسەر

نیەتێدەو ئمرێگ چیە وەهەێەر

هەرچێ فکڕەو کەم وەی دونیای فانی

دڵ وەکەس نێاس ئاقڵ خوەێ زانێ

دونیا تا وەسەر وەکـــــــــەس نیەمێنێ

یەێ خاسی و خراویێ لە دونیا مێنێ

خوەشاڵ وە هەرکە خەیربۊنێ سێنێ

نیکی بکـــــــــــــاریم هەر کە وە دینێ

سەفــــــەڕێ دونیا فـــڕە بێ وەفاس

تا ئــــەلان دیدە دڵ وە کــەسێ داس

دونیا مێنێدو خــــــــاس و خـڕاوێ

هەرکەس وە کەردەێ دەێدن جواوێ

 ئەلیمیر سەفەری

خۆەزەو خۆدا دە سینگێ دە جی دڵ، سانێ نەناۊ

ئێ دڵه ئاگر چگه دەێ، تەڵ تر ئەو بانێ نەناۊ

ها دە کەشم بۊە وە کەسم دەسێ ک ها نام دە... نه

یه نەقڵ مەوقەێگه ک ئەۊ دڵ ده م هێمانێ نەناۊ

دڵێ هە ها دە لاێ ئەۊو خۆدا بۊه خۆداێ ئەۊو

گۆڵێ بنەم ده ئەو خۆدا ک کەس ده گۆڵدانێ نەناۊ

وە سەر خۆەم نیم ئەمان، دەێ جەنگە هام ئەو سەر تو

وەر ژه م کەس ده تاو خۆەێ، چەقوو دە گیفانێ نەناۊ

سەرت نەنایه سینگم، ده بان قورئان دڵم

یه ئمرێگه هە ڕا قەسەم، کەسێ دەس ئەڵ بانێ نەناۊ

وەێ چنه دەم‌تەقەێ تو کەن، بردی‌و کۆشتی‌و چگی...

ک ئاگرێ نایه دڵم، مغوڵ دە ئێرانێ نەناۊ

دڵم پڕە، پڕ، بڕشن! نەوس!! گۆڕاگۆڕ بڕشن!!!

کەفتمسە دام یەکێ، ک ڕام ئەسڵ دان نەناۊ

ئڕا قۆمار ئاشقی، هەرکه وە یەێ بەرگ دیاێ

دە بان ئێ ئێشق تۆنە، بێ‌ژه م کەس گیانێ نەناۊ…

موسا ئامانی 

وادە دای ڕا لیسک خۆەر ، خۆەر هڵات‌و ت نەڵاتی

دڵ بەسام وە شۊەڵەێ مانگ، مانگ هەڵقە داو ت ناتی

سەر وە چیتە وهاریش، م چۊ گۆڵەیل خەمینیم

پایز مینگەێ نوو خەێدن، خەزان ها لە کەمینیم

شەوان لە ناو هسارەیل، شوون پایلد کەفتۊدن

نزانسم لە باوش مانگ سەر ناۊدن‌و خەفتۊدن

منیش هەر وە هەڵک دەو، شەوار وە ڕوژ ڕەسانم

تا واداگەێ لیسک خۆەر، تا مەوداێ دڵ بەسانم

شەوار بێ دووس چێەو سەر، هەم تەک دا لە بەێانەو

ئاخر هسارەیش نۊرێ، لە جنس خەم وەشانەو

هەم ڕوژ هاتوو گۆڵ سوو، خۆەر هڵات لە مانشت کوو

نۊر خوو ئۊشن همێدە، قوومڕ یشام هەم لەنوو

هامە تەماێ هاتند، یەێ هنامس مەنێە

ترسم وەختێ بایدنەو، دی مەرگ گیانم سەنێە

ت خوو لە جنس مانگید، بەورەو تنیـا هسارەم!

چارەێ ژیان دی نەێرم، هە خۆەد بۊدە وە چارەم!

رەحیم ئیداری

هەواخوای نەمریگ

شارەگەی گوڵم ئەی نازەنینم

ڕووشنای دڵ و دنیا ئوو دینم

دە عشقد سەر نەم وە کەێکەشانەو

کڵ ئڕاد کیشم دەو بان بانەو

شاواز، شاواز کەل ئەنارد

قڵاقیڕان رۊ وە چەوارد

قەسەم وە قڵای ئسماعیل خاند

دڵم چۊ شەڵەم شانێ ها شاند

گێان قڵاڕەنگ گێان مانێشتد

چۊ برای هاو پێشت خوەم هام دە پێشتد

دەو سیاماڵەیل پەنج سۊنەوە

هەر وەختێ نووڕم وە ئاژینەوە

نووڕم یەی کەڵێ گوڵ چنێگووە

بەن بەن دڵەگەم ئاژنێگووە

ئاوەگەی عەتەش وەو جووشانەوە

یە دە داخ کی سەر پووشانەوە؟

ها کوو لەرەی بەێ دەو پەڕ باخە؟

کی وە خارەت برد کێەنی قووناخە؟

ڕووشنای دڵم تەخت خاودە

سینگم سینی بان جاودە

کوو شوور و سەفای ئەو زەماندە؟

زکر زوانم هانیواندە

هەر وەختێ نووڕم وە سەێوانەوە

پڕ گرم وە ڕۊ ئاسمانەوە

دە ڕۊ هواەوە خڕ خوەم چۊ تەشی

پەل پەل ئاسمان گەردم دە خوەشی

هەی ئێلام تِ دە وڵات ئەوسەری

خەریوپەرەسی شاعرپەروەری

زنەیم زنەی گووڕم گووڕدە

کەلیمەی شێعرم سەفا و شووردە

تا هەسەم گڕێ نەۊنم کاوڵد

گەرتێ نەنیشێ ئەو گوونای گوڵد

گەرت و باد خەم نەێگ وە تاڵاند

تووزینەو نەکەێ شای ئەڤداڵاند

ڕەنگ قڵاڕەنگ نەکەێ وە دوار

تا گوڵ نەمینێ وە یاد وەهار

تاق تاریخد کی ڕمانەوە؟

قوڵەنگ وە دەسێ بێڵ وە شانەوە؟

وڵات وە خەێرد شار تەرکە نەێ

دەای پەڕ تا ئەو پەڕ پڕ دە باخ بەێ

عەتر مانێشت و یاڵ سەێواند

وەل واای پەخشە دە ئاسماند

دە گووشم دەنگ هەی شاوازێ تێەێ

سۊر لەێلیە هەڕەی سازێ تێەێ

شاواز، شاواز کەس و کار خوەم

هەواخوای نەمرێگ ئێلام، شار خوەم

دۊەشەو دیم وە خەو شاکەو خان مەسۊر

دە مانێشتەوە ناو دار چەویر

هە کیشن ئەو سەر ئاو زرنگانی

بەێتێ شێعر ئۊشن بەێتێ گوورانی

دەس وە زڵفەوە لێو وە جامەوە

ئێ بەێتە ئۊشن وە ئێلامەوە

کەڵەیل دە عەتەش خڕ دەن وە سەروەن

ڕەفیقەیل هە چن ئڕا وێژدەروەن

حەیدەرعلی شەفیعی

مانگەشەو ڕشیاس لە داوان م

یاگەر خوەد نایدە سەر لەشان م!؟

بەو بنیش تاگەر من و مانگەشەو

زڵفەهۊڵەگەد، بچنیمنەو!

ئاهوو لە چەوەیل لەڕە لەوەرقەو

ئەتر گوڵباخی وەر دایە لە شەو

گەردەن بلوور لەیل پەری تەن

تیەڵی ئەخمەگەی شیرینتر لە قەن

شیرین‌شێوەگەی داوەن گوڵناری

کڕ کیشا لەبان مەخش دڵداری!

باوان کیەنی زەوق شێعرەگەم

دارە مەۊەگەی پێچیایه وەخوەم

هەنای وارێدن واران وە کەم‌کەم

چڕێدەم، بەیدەم ویلم کەید لە "تەم!"

چروو گواری قەلاجە باوان

فڕەی کەو لە قەو، سووسی لە داوان

لەڕە خەی لە گیان زڵفەیل قنجێ

تام دەڵخوەشی ها لە چاڵ زنجێ!

فڕەی باڵ کەو لە خوەم فراری

کڕ کیشا لەبان مەخش دڵداری!

سروە وەنازەو کۊیەگان چڕی!

ناوک گوڵەیل گەرمەسێر بڕی!

دەنگ بنملی لە ڕێیەگەی کیەنی

دڵنگ لەوەر گوڵەگان کەنی!

کڕیوە یەقەی کۊیەگان وڵ کرد

تنگس ئعڵام جمهووری گوڵ کرد

ڕشیا لەگیانم لرقەی مانگەشەو

ئاشقی لەق دا جوور کیەنی کەو!

کەڵهوڕزایەگەی لە دۊر دیاری!

کڕ کیشا لەبان مەخش دڵداری…

ڕزا مەوزوونی

نیەزانم هامە کوو!؟

دیارم نییە!

ئەوقەرە دۊرم

ک چەوەڕێی خوەم نیەمینم!

چم

تا هەرکوورە

ڕێیەگان قەد بکیشن

چۊ رێوارێگ نابڵەی هەیمەی ژیانم نیەناسم

من لەناو خوەم قەریبم...

پڕ لە خێیاڵات نەناسم...

یەکێ لە من هەواڵ ئاسمان پرسێ

یەکێ چۊ خوەم

ک شایەد مەلەوەرێگ بی

ئیسە لەناو دەورملێگ ڕەش

چەپاڵێ ئاسمان ها دەسێ

ماڵوەماڵ

هەواڵ باڵەیلێ پرسێ...

نەسرین شەفی

（هانا）

کەنی‌یم

نژادم تریفێیە!

یێ‌گل، تەم ڤهارم و ماوارم ئەر قەندیل!

یێ‌گل، رووێیکم؛ مەخورووشم تا ئە کان کوێیەل زەم‌دار، تا کووبانی، تا کەنیەل جووشیا و خۊنالین عەفرین!

هەرجای دار "بەلۊتێ" دی

وره دا منە!

هەرجای ئاسارە بدرەوشێ، باوە منە!

ڤە دڵ هەر کوێسارێ کەنی بجووشێ، ئەڤە منم!

هەتمە

دەنگ لاوەلاوە دام ڤە گوشتون بڕەسنم!

هەتمە

تەقاس خۊن خەریڤ هوەر ئێ دنانە تێژ کوێ بسینم…

سەمیرا زەمانی مونفەرد

شەفەق نیوز- بەغدا/ ئیلام

پەیمانگای زانست زاگرۆس، ئمڕوو دوشەممە، وازکردن دەروازەی وەرگردن شێعرەیل و بەرهەمەیل ئەدەبی بەسیاگ وە ئەزموونەیل نەوین و لەدەسداین و بیسەروشوینبوین راگەیان، ئەرا نووڕین لە ئامادەیی بڵاوکردنیان لەناو پرۆژەی Mapping Absence.

پەیمانگەگە لە داوەتنامەگەی وت:  پرۆژەگە گرنگی دێد وەو دەقەیلە کە باس لە کووچ و جەنگ و تونوتیژی و ماتەم و بیدەنگی و سڕین کەن، وەگەرد ئەو شوینەوارە مرۆیەیل و کۆمەڵایەتییەیلە کە ئەزموون بێسەروشوێنبویەیل وەجی هیلێد.

وە تایبەت مکیس شاعیرەیل و نوسەرەیل  کوردی باشووری لە کرماشان و لوڕستان، و کوردەیل فەیلی لە ئیلام و بەغدا کرد.

بەشدارییەیل  ئەرا ئیمێڵ پەیمانگەگە zanistzagros@gmail.com کلبکریەێد، بی ئەوەگ راگەیاننەگە وادەیگ دوایین ئەرا پێشکەشکردن یا مەرجەیل بڵاوکردن دیاری بکەێد.

ریشەی ئی پرۆژە گلەو خوەد ئەرا کۆڕبەنیگ بەشە جوراوجویرەیل کە لە زانکۆی ستانفۆرد لە ناوەین 14 تا 19 ئەیار/مایس 2025 ساز کریا، و توێژەرەیل و هونەرمەنەیل و چالاکوانەیل مافەیل مرۆڤ گردەوکرد  ئەرا گفتوگووکردن لەبان بێسەروشویبوین لە رووکارەیل یاسایی و کۆمەڵایەتی و هونەری، و خشێعر خوەنین و چالاکییەیل لەبان کووچبەرەیل و گەردین دویای بێسەروشوینبویەیل لەخوەی گردبوی.

ئی گفتوگوویەیلە رەسیە سەکوویگ دیجیتاڵی کە ناو Mapping Absence لەخوەی گرێد، و خوەی وە شوینیگ سەروەخۆ و واز و فرەزوان ئەرا بڵاوکردن دەقەیل و بەرهەمەیل فەرهەنگی و بەڵگەدارکردن دەستپیشخەرییەیل بەسیاگ وە بڵاوکردن بیسەروشوینبوین و شوینەوارەیل ناسنێد.

پەیمانگەی زانست وتیش؛ بانگهێشتنامەگەی  ئەرا شیعر کوردی وە هەماهەنگی وەگەرد زانکۆی ستانفۆرد تێد، لە وەختیگ کە بانگهێشتنامەگەی دەرفەت بڵاوکردن بەرهەمە هەڵوژێریاگەیل دەێد بی دیاریکردن شوین بڵاوکردنیان.

شیشه ها باوشمەو دەس یەقه وەرد سانم

دڵ کەنیمه ده خۆەم و ، ها قۆل مێشتم گیانم

قاێقێگم ک  ولاو بۊمه ده ئوقیانوسێ

وەرد تووفانه فەقەت  نێشتنم و ئەڵسانم

دەس وراو هەرچگه بەم دووگه کوچگ دێ ده سەرم 

هامشوو هەرچگه کەم  وەرد خودا،  شەێتانم

دەم گیانم چگه ده تاق ده ئی بازاره 

جامەکێگم ک کوچگ ها ده سەرم، حەێرانم

ژان و ژینم ده یەکەو نیەوگ هه چۊ مەرگ و زنەی

شێخ و شا دەس وه دەسم کەن، م چمان ئێرانم

کی ده مانێشت دراوردگەسەم، بردگەسەم

دار هشک بەڕۊێگم تیەنگ وارانم

پاتشای قەڵب م بایه‌د ت  بویت و خەم ت

تەخت جەمشێرم ئەگەر، بێ ت وەلێ وێرانم

کەێ کونەێ ئاو بونجم ده کیەنی لێوت 

دەرد هەرچگ کیەنی سەرتەزنه ئەڵ گێانم

دین و ئێمان م ئشقەو پەرەسم  دووس فەقەت

ئەر  دنانم شکنیت و کەیه سانێ نانم

جەلیل سەفەربێگی

من نیەزانم کە کەی مرم

یا چە وەختێ، یاگەر له کوو

یا کام کۊه...

مانشێت

پەڕاو

سەرکەش

شاهوو

له چە پەلێ، له چە پاڵێ

له چە دەروەن و گڵاڵێ

خۆەم نیەزانم...

من نیەزانم کە کەێ مرم

وەفره

واسه

ئەوره

ساێه

یا بان زەۊ کەو یەخ ناێه

یا ئاسمان بڵاچه دەێ، جار وە جارێ

واران وارێ یا نیەوارێ

خۆەم نیەزانم...

من نیەزانم کە کەێ مرم

لەساێ زڵف قەجەر پاچ پرچ کەێکوو

یاگەر له داوان وەنێ لە سەر ئاسوو

یاگەر له پاێ زڵف ئارفانەێ شەنێ

کە لە سەماێ دەوریشانەێ

وە بنیاد بەڕۊ خەنێ

خۆەم نیەزانم...

من نیەزانم کە کەێ مرم

سروه شەنێ یاگەر شەماڵ

کەلەوا تێ یاگەر سووەیل

خەزەو جمێ یاگەر خەزان

یاگەر سامەو خۆرما پەزان

خۆەم نیەزانم...

من نیەزانم کە کەێ مرم

شەوکیە

نیمەرووە

ئێوارەسە

یا نیمەشەو

چەوەگانم زڕناقه دەن،

یا هانه خەو

خۆەم نیەزانم...

من نیەزانم کە کەێ مرم

لە خۆەر گەرم تاوسان،

یاگەر خەزان ڕەنگ ڕەنگێ

لهناو زیق وڵنگ باخێ

یاگەر چەرداخ بێ‌دەنگێ

خۆەم نیەزانم...

من نیەزانم کە کەێ مرم

له چە ساتێ

له چە ڕووژێ

له چە مانگێ

له چە ساڵێ

له وەرماێ هڵم دەم کی

له قەوچی نەرم چە باڵێ

خۆەم نیەزانم...

من نیەزانم کە کەێ مرم

وە باڵ بەسه لە پاێ دیوار...

یا سەر دار، یاگەر وه شکەنجەو ئازار

یا وه گۆله له پاێ سانێ،

یاگەر له سۊک زندانێ

خۆەم نیەزانم...

من نیەزانم کە کەێ مرم

له پای دار بەرز تۊێ

کە دڵدەنگه بووده سازێ

تا له باوش گەرم کەسێ

بشکێ تەزێ، بشکێ هازێ

یا له پاێ ڕیشێ ئەنجیرێ

له چەم چووڵ خۆەرئاوا

یاگەر له ساێ پڵک پیرێ

پڵک پۊتار دڵگیرێ

کە تەنیاێ خۆەێا گیرێ

خۆەم نیەزانم...

من نیزانم کە کەێ مرم

له چە مڵک و سەرزەمینێ

له چە مەرام و ئائینێ

مەوداێ ئەنترناسیوناڵه

یا له بان مەرزو سنوور

هێمان قرمه، هێما قاڵه

خۆەم نیەزانم...

من نیەزانم کە کەێ مرم

له سەردەم چارە نۊسەیل ڕەوانی

کە هانه فکر وێرانی

کە چیمەنەیل له خەوفێان هرێز چیەرن

وە ژنەیل خۆەرهڵات

هەڵەج هەڵەج مناڵەیل قیچ و ئەڵەج

کە ماڵێان بووده جاێر

کە کێشتێان بووده باێر

خۆەم نیەزانم...

من نیزانم کە کەێ مرم...

سەعید عبادەتیان (بانان)

ئەر شەوێ دەر وا بکەیدو بۊدە مێهمانم چ بوو

سەر بنەیدە سینەمەو دەس وە سەر شانم چ بوو

م ک گیان و ئمرو ماڵم چی وە تاڵان چەود

کفر زڵفد ئەر بوەێدن دین و ئیمانم چەبوو

دەر نیەچوو یاد ت لە خەو خەێاڵم چ بکەم

ئاخە خوەد فکرێ بکە دەردد وە ماڵم چ بکەم

گشت دونیا ئەر بوونە دشمەن گیانم چ عەجەو

تو ک نۊر چەومی بیدە زەواڵم چ بکەم

وەتم جوانی و ماڵم ئەر بچوو تو مینیدن

تونیش دەردد وە گیانم دری دڵم شکنیدن

ڕفیق ڕووژ خوەشم بیدو ئی شەوارە نیەزانید

لە دۊری تو چ کیشم ئەزیزەگەم تو ک نیدن

دەر نیەچوو یاد تو لە خەو خەێاڵم چە بکەم

ئاخە خوەد فکرێ بکە دەردد وە ماڵم چە بکەم

گشت دونیا ئەر بوونە دشمەن گیانم چ عەجەو

تۆ ک نۊر چەومی بیدە زەواڵم چە بکەم

وەگەرد دەس خوەم ئاگر نامەسە پەڕو باڵم 

هاوارە کورە بوەم کی تێ حەقم بسنێدن

ئەگەر دڵد لە م سێرە دڵم ڕزا وە ڕزادە

وە هەرچێ دەن بفروشەم وەلێ بزان چ سێنیدن

دەر نیەچوو یاد تو لە خەو خەێاڵم چە بکەم

ئاخە خوەد فکرێ بکە دەردد وە ماڵم چە بکەم 

گشت دونیا ئەر بوونە دشمەن گیانم چ عەجەو

تو ک نۊر چەومی بیدە زەواڵم چە بکەم

عەلی ئەشرەف نەوبەتی

‍ لە ئـــەو ڕووژە ک دیـمەد بۊمە وەیلد

دڵم قــرچێ لـە نــــوو بـۊنم چەوەیلد

وە پێم ئـــۊشن چوە بۊ،ڕا لێوە بۊدە؟

ت مەجـــنوونی!ئەنۊ ها کوورە لەیلد؟

م لێوەم دەرد خوەم هاشا نیەکەم دی

تو لەیلی، ئاخرێ ها کــوورە مــــەیلد؟

تو بۊشی دڵ بێە گــــیانم ئـــەڕاد دەم

ئە بیلی سەر سپـــــــارم وە خەوەیلد

هە چۊ ڕێوار ڕێ کــــاوە لە شــــووند

شەوێ داچـــووڕیەم لە ئــــەزرەتەیلد

م دهبانی ڕێوار

کەڵ هۊڵ چەو مەس لەو سەر سراوە

واشــەێ ســەر دەروەن کــەوک پـەڕاوە

بــەڕەزاێ زاخــە تــرنــگــەێ وەفـــراوە

هـەنـاێ چـۊ شـەمـاڵ  شـەنێ لـەێ ناوە

پــا نـەێد لــە کـیەنـی وەێ خــاوە خــاوا

چــمــان عـمــرەگــەم دەێـــدن وە ئــاوا

کــەڵ هـۊل مــل بـەرز  لـە لان خــوەره

  هـەنــاس  و  ژیــنـم  وە  تـــاڵان بـــەرە

هـەنـاێ  تـیـەێــدن  وە خـەمـزەو نـازێ

وە   زوڵــف  شـــوڕێ  وە  چــەو  بــازێ

گـــیـانـم  لــەرزنـێ  هەناسـم  بـەن کـێ

چمان مانگ لە ئاخڵەێ خـوەێ ڕەم کەێ

حامد ئەردەشیری

نەچوو لە ئی وێرانە

بێ تو ئەڕام ئی ماڵە زندانە

نەچوو هەوا وارانە حاڵ دڵم داغانە دیوانە

چیدە کوورە لەی شەو وارانیە لە کوو مەنیدە

م ئەڕاد گیرم تو گەرد کی خەنیدە

ئی چەوەیل پڕ لە ئەسرە چاوەڕیدە

کەێ تیەیدەو ئەسرەگەد ڕەسی وە ماڵ و هەر نەهاتی

زندەگیم بیە بەتاڵو هەر نەهاتی

هەر شمارم مانگ و ساڵ و هەر نەهاتی 

خەم دۊرید سەر نێیاسە باوەشم

بێ تو مەجنوون لە لەیلا بێ بەشم

وە خیاڵم تو یەێ ڕووژێ تیەیدنەو

وەی خیاڵەیل مەحاڵە دڵخوەشم

تو وە پێم بۊش چۊ دڵ شێتم لە دڵتەنگی درارم

بیمە ئەور بێ گیان تا کەێ بووارم

چەن هەزار و چەن شەوە چەو ئنتزارم

ئەسغەر ئیمانی

شیشه ها باوشمەو دەس یەقه وەرد سانم

دڵ کەنیمه ده خوەم و ، ها قول مشتم گیانم

قاێقێگم ک  وڵاو بۊمه ده ئوقیانوسێ

وەرد تووفانه فەقەت  نیشتنم و ئەڵسانم

دەس ورەو هەرچگه بەم دووگه کوچگ دێ ده سەرم 

هامشوو هەرچگه کەم  وەرد خودا،  شەێتانم

دەم گیانم چگه ده تاق ده ئی بازاره 

جامەکێگم ک کوچگ ها ده سەرم، حەێرانم

ژان و ژینم ده یەکەو نیەوگ هه چۊ مەرگ و زنەێ

شێخ و شا دەس وه دەسم کەن، م چمان ئێرانم

کی ده مانشت دراوردگەسەم، بردگەسەم

دار هشک بەڕۊێگم تیەنگ وارانم

پاتشای قەڵب م بایه‌د ت  بۊد و خەم ت

تەخت جەمشێرم ئەگەر، بێ ت وەلێ وێرانم

کەێ کونەێ ئاو بوەنجم ده کیەنی لێود

دەرد هەرچگ کیەنی سەرتەزنه ئەڵ گیانم

دین و ئێمان م ئشقەو پەرەسم  دووس فەقەت

ئەر  دنانم شکنیت و کەیه سانێ نانم

جەلیل سەفەربەیگی

پەریشانم، پەریشانم، وڵم کە

دوچار دەرد پنهانم، وڵم کە!

وە دەردم ئاشنا کردی، نەکردی

ستەمگەر فکر دەرمانم، وڵم کە!

وڵم کە تا نەوەید کەس پەی وە دەردم

دو سێ ڕووژی کە مهمانم، وڵم کە!

نەکرد کەس دەعوەتم خوەم بیمە مهمان

وە کار خوەم پەشیمانم، وڵم کە!

حەمامە ئی سەرای سەرد و گەرمە

بساو کیسەیی وە ناو شانم، وڵم کە!

تەنم زانم نەسیب موور و مارە

نە موورم نە سولەیمانم، وڵم کە!

نە ساختِ من، وە فولادە نە وە سەنگ

هەف هەشت دە تیکە سوقانم، وڵم کە!

وە کامِ کەس نیەگەردد چەرخ تا سەر

نە دەرویشم نە سوڵتانم، وڵم کە!

وە واوەیلای دڵ هەر شەو ڕەوانە

سرشکِ غەم وە دامانم، وڵم کە!

خەرابم کرد خەرابات خەیاڵد

وە دەس چوود عەقڵ و ئیمانم، وڵم کە!

وە بادەێ تەڵخ جامِ زندەگانی

دەمێ مەست و غەزەڵخوانم، وڵم کە!

وە سەحرای خەیاڵ چون قەیس سانی

تو کردی وێڵ و وەیلانم، وڵم کە!

گوزەشت فەسڵِ بەهار و مووسمِ باخ

وە فکرِ لەرزِ زمسانم، وڵم کە!

لەوە ترسم بکیشێد کار وە هاوار

نەکەی کەس گوش وە ئەفغانم، وڵم کە!

وڵم کەید یا نیەکەید ڕەحمێ وە حاڵم

تەنم کردی وە زندانم، وڵم کە!

وە ئەرواح شەرەف سەوگەند کە دائم

مەلوول مەرگ وژدانم، وڵم کە!

شەرەف کوشیاد و وژدان جوانەمەرگ بی

وە بێ وژدانی حەیرانم، وڵم کە!

وە کام دوشمەن بووەم ئەی دووس! شکایەت؟

کە دووس بی قاتڵ گیانم، وڵم کە!

وڵم کە! وڵکەرد نیم سوو لە مەحشەر

تو کردی خار دەورانم، وڵم کە!

تو کردی بێ سەر و سامان شامی

وە مەولا خوەم قەشەنگ زانم، وڵم کە!

شاعێر : شامی کرماشانی(شاهمراد)

رەفیق! زۊ بکەفەوڕێ، کەمێ خوەر نوو بار

لە‌خاکْ رووژهەڵاتی، ئومێد ئەڕا سوو بار

له‌هەر چەمیگ ک کەفتە سەر رێید، پۊنگە

لە‌ هەزوەگانْ خوەمانی لە‌قەسر، لیموو بار

ئەگەر ک چید وەرەو بەرزییەیل هەورامان

ئەڕا گڕەێ دڵْ ژارم، لە‌ وەفر شاهوو بار

ئەگەر ک چید وە‌گاوارەگەێ ئوساتاهر

لە‌ئەو مەقامە ک ئۊشێ: حەقەن‌حەقەن‌هوو بار

نەکەید یەێ بەش کیشێ وە‌گەرد خوەد بارید

وە‌قەێ پەشێویی ئێوارەگان تەماکوو بار

دووارە کەفتمەسە هۊر شێت‌بازییەگان

سەرێ بێیە وە‌حەریر و کەمێ لە‌یاروو بار

برا! چەنیگە وە‌گەرد خوەما غەریبی کەم

لە‌ئەو منە ک تو ناسی، کەمێ رەنگ و بوو بار

م چۊچیامە ، وە‌ یەی وا تمام بووم، بڕەس

ئەڕا سەقام هەناسم تڵەسم و جادوو بار

یە هۊرەگان منە یەک وە یەک مرن هەرڕووژ

یە گەرمەشینە ک دۊنی وەلا براڕوو بار

شەویگ لەی وەرە لان کردێیە ،نیەچوود نیەچوود

رەفیق زۊ بکەفەوڕێ کەمێ خوەر نوو بار

بابەک دەوڵەتی

من زنەێ نەیم لە ژیانم

‏کەفتمە بێ دەنگ م سانم

‏قردگێ ئەر چوڵه ژێرم 

‏پووک ئاێم دەێ لە شانم

‏ئایمەیل گەل گه‌ل دروو بۊن

‏لام گردن سه‌د کروو بۊن

‏تا ک وا هات گشتێان چێن

‏ئاێمەیل وەڵنگ چروو بۊن

‏هەر جیێ چم ژاو ئڵاڵن

‏بەزر جەنگو کینە کاڵن

‏سەد شەرەف وە گورگەل هار

‏ئاێمەیل دەس یەک هە ناڵن

‏ئەێ بەنەیلە  کەس نیەناسن

‏پڕ لە باسن  دڵ لە ئاسن

‏یانە تێخ تێژ چەفتن

‏دەم کەنەو پیم جۊر داسن

‏ئەێ خۆدا یەیشە بەنەیلد

‏یانە سازید باب مەیلد

‏ژارێان ها لە دڵ یەک

‏زۆڵمیان ها وەر چەوەیلد

‏من بڕیمە دڵ لە خڵقەت

‏لەێ ژیان پر لە زڵمەت

‏فێر سۊکێ کەم لە دڵ خوەم

‏من گرم خڵقەت وە عبرەت

‏

‏پژواک ڕەوشەن ڕەوان

‏

‏

‏

شیشه باوشمەو دەس یەقه وەرد سانم

‏دڵ کەنیمە دە خوەم و ، ها قول مشتم گیانم

‏قاێقیگ ک وڵاو بۊمە دە ئوقیانوسی

‏وەرد تووفانە فەقەت نیشتنم و ئەڵسانم

‏دەس ورەو هەرچگ بەم دووگ کوچگ دێ دە سەرم

‏هامشوو هەرچگ کم وەرد خودا، شەێتانم

‏دەم گیانم چگە دە تاق دە ئی بازارە

‏جامەکیگ ک کوچگ ها دە سەرم، حەێرانم

‏ژان و ژینم دە یەکەو نیەوگ هە چۊ مەرگ و زنەێ

‏شێخ و شا دەس وه دەسم کەن، م چمان ئێرانم

‏کی دە مانشت دراوردگەسەم، بردگەسەم

‏دار هشک بەڕۊێگ تیەنگ وارانم

‏پاتشای قەڵب م باێەد ت بۊد و خەم ت

‏تەخت جەمشێرم ئەگەر، بێ ت وەلێ وێرانم

‏کەێ کونەێ ئاو بوەنجم دە کیەنی لێود

‏دەرد هەرچگ کیەنی سەرتەزنه ئەڵ گیانم

‏دین و ئێمان م ئشقەو پەرەسم دووس فەقەت

‏ئەر دنانم شکنیت و کەیه سانێ نانم

‏

‏جەلیل سەفەربەیگی

‏

‏ئیمشەو بەزمێگە بەزم چەوێگە

‏مەفەز خاڵ بوون لێوێگە

‏چەو پڕ سرمێ زەرد کاڵیگە

‏ڕووڵەێ شیرین کوردەماڵیگە

‏بڕمێ کەموون خاقان چینە

‏دو چەوێ چراێ ڕووشناێ ژینە

‏ئەو خاڵ لێوە ئەو بوون لێوە

‏موجرم ئەمدە قاتڵ گیونە

‏تاڵ مژدنگێ تیر خەدەنگە

‏ویر خەیاڵی مەێدوون جەنگە

‏ئەژ سەر تا وە پا وە ئیقە خووە

‏دیمەن چی پەری یە خەڵک کووە

‏خەڵک ئاونوو یا دلێڕوونە

‏هەم دارووێ ئێشە هەم شەفاێ گیونە

‏

‏دیاکوو پاکزاد

ئیوارەس و لەناو پاییز 

‏دڵم هۊر چەوەیلد کەێ

‏نیەزانی ئی ئیوارانە

‏ چەنی شیوەی چەوەیلد دەی

‏لەناو ئی خاک خاپوورە

‏ خوو توورەێ تو چەپاوەم کرد

‏مە خوەم زانم کە ئی خاکە لە هۊرم  ئەو چەوەیلد برد

‏ئەزیزم دڵ تەنگە هەر شەو چەوم لەیرە نیەچوودە خەو

‏وەهەر لایە کە چەو گل دام

‏خودا ڕوو لە چەوەیلد وەی

‏خودا هاوار ت خوەد دۊنی

‏کەسی شووند نیەزانیدن

‏وەئیجارە ت چێشی بۊش

‏مە ئەو شوون چەوەیلد خەێ

‏دەم ئیواران منو پاییز

‏کەفیمە ئی خێیاوانە

‏دووارە وەفری وارێدن

‏کە گوورانی چەوەیلد دەی

‏ئێوارەسەو لە ناو پاییز دڵم هۊر چەوەیلد کەێ

‏عەلی ئولفەتی

ئەوە متنەکە بێ کەسرە (کەسرەی ژیر وشەگان لاوریاگ):

خیاڵ پیر تەنیا

پیر ساڵ خوردەی، مەرگ دە کەمینم

دار پەل شکیاگ، سەر دە زەمینم

هناسم گریاو ،تارە چەوەیلم

کەسێ نیەزانێ ، حاڵ شەوەیلم

وەختێ تەنیا بووم ،خراو بوو حاڵم

لەیلم حازر بوو  ، لە ناو   خێیاڵم

کەفتم لە دام ئ ێ وەخت گەنه

له هۊرمەو چی ئەو پووقەی قەنە

فکرو خێیاڵ دونیاێ دۊرمە

دەوار ڕمیاگ بێ ساو سۊنمه

یەچۊ پیری هات لەرز خسە گیانم

لە ناو مال خیش کردێیە وەیلانم

پیری هاتگەو پیل کرد لە جەسەم

تەک داس لە تەنگی هەواێ هەرەسەم

وەتم هەێ پیری لە جنس سانم

وەتیا هەرچگ بۊد م جنسد زانم

لولو ئاوم کرد دەمم بۊ وە جەۊ

وێنەی چوو وشکێ چقانەم لە زەۊ

بار لە دەسم سەن لەێ تڵاتمە

هەسەم و چماێ گوما هاتم

دەورم شلخە و وە تەنیا نیشم

بار غەریبی وە کووڵ مەکیشم

غەریبی خاسە پایانێ دێرێ

غەریب سقان بێ ژانێ دێرێ

ئاخر پیری لە دۊر دیاره

شەوار ژانەو ڕووژ سیارە

فکرو خێیاڵم دونیاێ دۊرمه

جوانی داخە و بەهاێ خۊنمه

چوە بکەم ڕا ئەو دونیاێ پڕ تامە

دەوار پیری لە جاێ ئەڵدامە

"رەحیم ئێداری"

‏‍ ‍ سەونزە بڕەس شینم بکە

‏فکرێ ئەڕاێ چینم بکە

‏مە  گوم بۊ  دەس تونم

‏ خوەد بەو میەنێ نەۊوم بکه 

‏تەرمم بنە لاێ بێستۊن 

‏تا بوومە هاوساێ بێستۊن

‏سەونزە بڕەس یەێ جار تر

‏ خوەد تەرفم و تۊنم بکە

‏هازێ لە گیانم دی نەمەن

‏بارێ وە شانم دی نەمەن

‏سەونزە بڕەس زەردە دڵم

‏هەم ئاو و هەم ڕۊنم بکە

‏سەوەنزە بنووڕ چۊ مردمە

‏لە داخ دەورانەیل تیەڵ

‏سۊنم ڕمانێیە دۊرید 

‏فکرێ ئەڕاێ سۊنم بکە

‏سەونزە بڕەس وەێ ساکییە

‏دڵم لەێ دونیا شاکییە

‏من وە دەس خوەد مردمە

‏خوەد بەو داوای خۊنم بکە

‏مەهوەش سولێمانپووڕ

‏پاییز

‏هەم  خەزانەو دڵتەنگی نیشتەو پەل دار شەوار

‏باوەشێ دووسی بێار و واەدەمان باخ ئەنار

‏خوەت وە تاوەی واز کردیتەس پەڕ شاڵت  ک  "وا"

‏سەردەوا هەم، عەتر گوڵ بیارێ ئەڕامان چۊ وەهار

‏پایزەو  ڕز گرتگەس دەێ دارسانە تێخِ خەێز

‏سازِ واران کوک بکەو بیا، گڕگڕی ڕامان بوار

‏باخِ مەۊ ڕزیاگە ، ڕز ڕز وەلنگ زەردێ  ها زەمین

‏تام ژینێ، خۊنِ گیانێ، کۊزە کۊزە ها وە  دار

‏وەرژە زمسان بیا  ک  یەێ باوش ئەنارِ عشق وەێ

‏سات عومرم  ها دە دەو چۊ ئەسبِ تێژِ  بێ‌سوار

‏ 

 نۊرمراد رزایی

‏

‏ئەگەر هاتی کەمێ واران وەلا بار

‏سفێدەێ سوو ئەڕاێ شاران وەلا بار

‏م چەن ساڵە چەوم ها وە دەرانە

‏کلیلە زەردەگەێ جاران وەلا بار

‏هەنا هەێ دڵتەنگی شەو بان مەزاران

‏لەش تەیموور‌ ئەڕاێ یاران وەلابار

‏گەرەێ کەوکێ نەمەن لەێ دەروەنەیلە

‏ت بەو قۆڵتەێ کەمەر داران وەلابار

‏ئەگەر هاتی وەهارنەۊ لەێ وڵاتە

‏پەڕوو سەوز پەل داران وەلابار

‏کۆرە عادوو لەشووند مردەموو بووم

‏ت بەو تەوبەێ گۆناباران وەلا بار

‏هلیتەیل فەرەێ ئێ باخە داگرد

‏ت بەو کۊز‌ چەمەن زاران وەلا بار

‏

‏شاعێر :  ئەلی ئوڵفەتی