شەفەق نیوز ـ وەدویاچگن

جۆنی دێپ، ئەکتەر وەناوبانگ ئەمریکی، دویای نزیکەی 10 ساڵ دویرەوکەفتن لە بەرهەمە گەورەیل هۆڵیوود، لە ری فیلمیگ نوو گلەوخواردن خوەی راگەیان و دویرەوکەفتنی وە هچان ناوی هاورد.

 دێپ لەمەوقە ئادەبوین لە مەراسیم نمایشکردن یەکەم فلیم فانتازیا نووەگەی وەناو  (ئێبەنێزەر) لە لەندەن، باس لە دویرەوکەفتنی  ئەرا ماوەی دە سڵ لە بەرهەمەیلهۆلیوود کرد و راگەیان ئەو ماوە جویر هچان کوڵیگ بوی ئەرای.

  تی وێست، دەرهێنەری فیلمەگە ئوشێد: هەست کردم ئێ ئەکتەرە هەر ئەرا ئێ رۆڵە لەداڵگ بویە، توانای سروشتیی ئەلاجوییگ دیرێد، هەر وەی مدوو کارکردن وەردی  چێژ تایوەت خوەی دیرێد.

فلیمە نووەگەی وەلایەن کۆمپانیای (پاراماونت)ـەوە بەرهەم هاوریاس، وە گلەوخواردن فەرمیی ئەو ئەکتەرە وەناوبانگە ئەرا  ناو فیلمە گەورەیل هۆڵیوود دانرێد؛ لەی فیلمە جۆنی دێپ رۆڵ "ئێبەنێزەر سکرۆج" دوینێد، کە پیایگ بازرگانیگ رەزیل و وەرچەوتەنگە.

شەفەق نيوز- بەغداد

نرخ دۆلار ئەمریکی وەرانەور دینار عراقی، ئمڕوو سێشەممە، وەگەرد بەسیان بۆرسەیل سەرەکی بەغداد پایتەخت، وەشیوەی کەمیگ بەرزەو بوی، و لە هەولێر پایتەخت هەرێم کوردستان، داوەزیان توومار کرد.

پەیامنێر ئاژانس شەفەق نیوز وت کە بۆرسەیل سەرەکی کیفاح و حارسیە لە بەغدای پایتەخت، ئیوارەی ئمڕوو، لەبان نرخ 169050 دينار عراقی وەرانەور 100 دۆلار ئەمریکی دەرەیلیان بەسان.

شەوەکی ئمڕوو، نرخ 100 دۆلار ئەمریکی رەسیە 168900 دينار.

پەیامنێر ئاژانسمان وتیش کە نرخ فرووشتن و سەنین لە دوکانەیل ناوخوەیی بەغداد جیگیر بوی، کە نرخ فرووشتن 100 دۆلار ئەمریکی رەسیە 169500 دينار عراقی، و نرخ سەنینی رەسیە 168500  دينار.

لە هەولێر پایتەخت هەرێم کوردستان، نرخ دۆلار وەگەرد بەسیان بۆرسە داوەزیان کەمیگ توومار کرد، کە نرخ فرووشتن 100 دۆلار ئەمریکی رەسیە 168900 دينار عراقی، و نرخ سەنینی رەسیە  168800 دينار.

شەفەق نیوز - تاران

تەنگەی کافرین، کە کەفێدە باکوور شار بەدرە لە پارێزگای ئیلام فەیلی لە خوەراوای ئیران، یەکیگە لە دیارترین شوینە سروشتی و گەشتیارییەیل لە ناوچەگە، کە دریژەو بوود ئەرا نزیکەی دوو کیلۆمەتر لە ناوەین پێکهاتە کویسانییە بەرزەیل، لەبان بەرزییگ کە رەسێدە نزیکەی 700 مەتر لەبان ئاست رۊ دەریا.

 ئەحمەد ماجد، گرنگیدەر وە گەشتیاری و شوینەوارەیل، ئەرا ئاژانس شەفەق نیوز وت، کە تەنگەی کافرین نۊنەرایەتی یەکیگ لە وێستگە گەشتیارییە دیارەیل کەێد لە پارێزگای ئیلام، لەوەر ئەوەگ فرەڕەنگییگ سروشتی و پێکهاتەیگ کویسانی و بنەمایەیل گەشتیاری وەیخوەی دۊنێد، کە لە ناویان گەشتەیل وە بەلەم و ئاشکراکردن سروشتە، بیجگە لە گرنگییە میژوویی و شوینەوارییەگەی کە باییگ زیایە دەێدە پی لە شان جەوانییە سروشتییەگەی.

 ئاوەیل لەناو تەنگەگە رەوانە بوون لە کانی و سەرچەوە ئاوییە کویسانییەیل لە ناوچەگە، کە بەرزاییەیل کەبیرکوه لە ناویانە، وەرجە ئەوەگ روی بکەنە چەم سەیمەڕە، لە ناوڕاس دیمەنەیل سروشتییگ کە تاشەسانە بەرزەیل و دارستانەیل بەڕۊ و پووشەر بنجگ وەرد یەکتر گردەو کەێد.

 گرنگی تەنگەگە تەنیا لەبان سروشتە جوغرافییەگەی سنووردار نییە، بەڵکم دریژەوبۊنیگ میژووییش دیرێد، چۊنکە پەیاکریاگە شوینەوارییەیل لە دەورگردی نشان بەڵگەیلیگ دەن کە گلەو خوەن ئەرا سەردەمەیل وەرجە میژوو، بیجگە لە جیماگەیل دامەزراوە شوینەوارییەیل لە سەردەم ساسانی.

شەفەق نیوز - هەولێر

سەرۆک پارتی دیموکراسی و پێشکەفتن تورکی عەلی باباجان، رووژ سێشەممە، تەقەلایەیل سەرۆک هەرێم کوردستان نێچیرڤان بارزانی بەرز نرخان، لەبان پاڵپشتییکردنی ئەرا سەرخستن پرۆسەی ئاشتی لە تورکیا.

یەیش لە مەوقەی پیشوازیکردن نێچیرڤان بارزانی بۊ، لە باباجان و شاند یاوەری، لە نویسینگەی خوەی لە هەولێر پایتەخت هەرێم کوردستان، کە لەناوی باس پەیوەندییەیل ناوەین تورکیا و عراق و هەرێم کوردستان کردن، لە شان پرۆسەی ئاشتی لە تورکیا و وەرەونواچگنەیل هەرێمای.

 بەیاننامەیگ سەرۆکایەتی هەرێم کوردستان کە رەسیە ئاژانس شەفەق نیوز دیاری کرد، کە هەردوگ لایەن لە چەوپیکەفتنەگە دووپات لەبان گرنگی پرۆسەی ئاشتی و هەوەجەبۊن وەکارهاوردن ئەو دەرفەتە کە لە وەردەسە کردن ئەرا پاڵپشتییکردنی و سەرخستنی، وە دووپاتکردن لەوە کە سەرکەفتنی نۊنەرایەتی گامیگ گرنگ کەێد ئەرا هازدارکردن ئاسایش و ئارامی لە تورکیا و ناوچەگە وە شیوەیگ گشتی.

 هەمیش چەوپیکەفتنەگە باس لە دۊاترین وەرەونواچگنەیل ناوچەگە کرد، کە هەردوگ لایەن دووپات لەبان گرنگی پشت بەسین وە گفتوگۆ و چارەسەرەیل ئاشتییانە و دیپلۆماسی کردن ئەرا چارەسەرکردن ناکۆکی و ململانێیەیل، بیجگە لە باسکردن شمارەیگ لە دۆسیەیل جی گرنگیدان هاوبەش.

شەفەق نیوز - بەسرە

دەسەڵاتەیل عراقی، رووژ سێشەممە، ریگری کردن لە نیشتنەوی فڕۆکەی هەڵوژاردەی نیشتمانی ئیرانی ئەرا تووپان پێ لە فڕۆکەخانەی ناودەوڵەتی بەسرە، کە بڕیار بۊ هەڵوژاردەگە بەشداری بکەێد لە پاڵەوانێتی چواری کە تەکبیرە پەنجشەممەی ئایەندە دەس وەپی بکەێد.

 سەرچەوەیگ ئەمنی ئەرا ئاژانس شەفەق نیوز وت، کە دەسەڵاتەیل مووڵەت نیشتنەو نەیانەسە فڕۆکەگە، کە یەیش بۊە هووکار ئەوەگ رویکردن خوەی ئاڵشت بکەێد  وەرەو شار عەبادان ئیرانی، لەبان ئەوەگ هەڵوژاردەگە لەڕی هشکانییەو باێدە بەسرە.

 سەرچەوەگە مەزەنە کرد کە هووکارەیل نەیاین مووڵەتەگە پەیوەندیدار بوین وەو سزا ناودەوڵەتییەیلە کە چەسپیانە لەبان فڕۆکەوانی ئیرانی، لە وەختیگ دیاری کرد کە شاند هەڵوژاردەی ئیرانی لەڕی هشکانییەو لە عەبادانەو چنە بەسرە.

رووژ جمعەی ئایەندە، لە شار بەسرە لە باشوور عراق، رکابەرییەیل پاڵەوانێتی چواری ناودەوڵەتی ئەرا تووپان دەس وەپی کەن، وە بەشداریکردن هەڵوژاردەیل عراق (میواندار) و ئیران و لوبنان و فەڵەستین، لە ناو چەوەڕیکردنیگ جەماوەری ئەرا ئەو رۊوەرۊبۊنەیلە کە شارەگە میواندارییان کەێد.

 هەڵوژاردەی ئیران کەفێدە نوای لیست هەڵوژاردە بەشدارەیل لەڕۊ پۆلێنکردن جیهانییەو، وە گردن پلەی 23 لە جیهان، وەپەی پۆلێنکردن یەکێتی ناودەوڵەتی ئەرا تووپان (فیفا) ئەرا مانگ تشرین یەکەم 2026.

شەفەق نیوز - تاران

هێز دەریایی سوپای پاسدارەیل ئیرانی، رووژ سێشەممە، راگەیان وە وەرکەفتن دوو کەشتی نەفتهەڵگر وە تەقینەوەیگ لە مەوقەی تەقەلادانیان ئەرا رەدبۊن لە تەنگەی هورمز وە شیوەیگ نایاسایی، وە دەسنشانکردن ئەرا ئەوە رۊداوەگە لە دەرەنجام داکیانیان وە مینیگ دەریایی رۊ دایە.

سوپای پاسدارەیل، لە بەیاننامەیگ کە ئاژانس شەفەق نیوز چەوی کەفتەسە پی، وت کە نەفتهەڵگر دۊەم پاڵپشتی کریاۊد وە فڕۆکەیل جەنگی سەر وە سوپای ئەمریکی، و تەقەلا داگە وەنهێنی رەد بوود لەڕی ئەوەگ وەسفی کرد وە "رێڕەو نایاسایی".

 زیای کرد کە نەوتهەڵگر دۊیەم تویش رۊداویگ هاتگە کە بۊسە هووکار وسانی لە شوین خوەی لە ناوڕاس هەڵسیان ئاگریگ گەورە، وە دیاریکردن ئەوە کە هەردوگ نەفتهەڵگرەگە گشت سیستەمەیل دەریاوانی خوەیان وساننە لە تەقەلایگ ئەرا رەدبۊن وە شیوەیگ نایاسایی، و ئەوان لەی وەختە سزیەن لە وەرانوەر کەناراوەیل باشووری.

 هێز دەریایی سوپای پاسدارەیل هوشداریی خوەی دووپات کردەو لەوەگ کە "رێڕەو رینەیریاگ ئارام نییە"، وە دووپاتکردن ئەوە کە ئەو کەشتییەیلە کە هەماهەنگی وەرد سوپای ئەمریکی کەن هەمان چارەنویس وەیخوەیان دۊنن.

 هێزەیل دەریایی سوپای پاسدارەیل دۊکە دووشەممە راگەیانۊد لە ویرانکردن سیستەمەیل دەریاوانی سەر وە ئەوەگ وەسفی کرد وە "دوشمن" لە رێڕەو باشووری تەنگەی هورمز، و لە وەختیگ دووپات کرد کە هیچ کەشتییگ سەرپێچیکار نەتۊنستیە بچوودە ناوی لە رووژ یەکشەممە، و باس کرد کە  رەوانەبۊن قاچاخ نەفت لەڕی رێڕەو باشووری ئەرا تەنگەگە وە تەواوی وسیاس.

شەفەق نیوز - بەغداد

سەرچەوەیگ ئاسایش، ئمڕوو سێشەممە، خەوەر دا لە زەخمداربوین دوو ئەفسەر وە پلەی "موقەدەم" لە کڕ هێزەیل پۆلیس فریاکەفتن ک یەکیگیان جێگر فەرماندەی فەوجە، لە ئەنجام وەردەوەردەیگ کە رەسیە پەلامارداین لە خوەرهەڵات بەغداد پایتەخت.

سەرچەوەگە ئەرا ئاژانس شەفەق نیوز وت: یەکیگ لە دوو ئەفسەرەگە وە لیوان چووڵیگ ئەرا ئەوەکەیتر وەشنێد، ئەرا دویەم رووژ ئەوەکەیتر  وە چەک  خوەی تەقە لەلی کەێد، لە وەخت ئەنجامداین ئەرک فەرمی لەناو بەش ئەفسەرەیل لە فەوج هەفتەم لە ناوچەی بەغداد جەدیدە، و دووپات کرد ک  ئەرا نەخۆشخانە کلکریان تا چەسە وەربگرن وەگەرد دەسوەسەرکردنیان  و وازکردن لێکۆینەو لە رویداوەگەگه.

شەفەق نیوز - بەغداد

وەزارەت داد، ئمڕوو سێشەممە، راگەیان وە دامەزرانن بەشیگ پسپۆڕ ئەرا کاروبار کوردەیل فەیلی لەناوی بەش کاروبار هاووڵاتییەیل، لە جیوەجیکردن رێنماییەیل وەزیر داد، خالید شوانی، سەرۆک لیژنەی پەیوەندیدار وە جیوەجیکردن بڕیارەیل فەرمان دیوانی (80) ئەرا ساڵ 2026، تایبەت وە سڕینە شوینەوارە گەنەیل لەبان ئی چینە.

 وەزارەتەگە لە بەیاننامەیگ کە رەسیە ئاژانس شەفەق نیوز دیاری کرد کە دامەزرانن بەشەگە لە چوارچیوەی جیوەجیکردن بڕیارەیل لیژنەگە تیەێد، و هازدارکردن گرنگیداین وەی تووژە کە رۊوەرۊی سیاسەتەیل چەوسانن و پەراویزخستن بۊە، وە شیوەیگ کە دەسمیەتی بەێد لە وەدۊاکەفتن کاروبارەیلیان و وەرگردن داواکاری و سکاڵایەیلیان، و کارکردن لەبان چارەسەرکردنیان وە هەماهەنگی وەرد لایەنە پەیوەندیدارەیل، وەپەی چوارچیوە یاسایی و کارگێڕییە پەسەنکریاگەیل.

 وەزارەتەگە دووپات کرد کە ئی گامە لەناوی وەرپرسیاریەتیی خوەی تیەێد لە وەدۊاکەفتن جیوەجیکردن بڕیارە پەیوەندیدارەیل، و هازدارکردن ریکارە ئامانجدارەیل وەرەو وەدادڕەسین کوردەیل فەیلی، و دڵنیابوین گرنگیداین وە مافەیل و داواکارییە رەوایەیلیان.

شەفەق نیوز - ئەنبار

وەڕێوەبەر وەرگری شارستانی لە ئەنبار عەمید مستەفا مەحموود سەلەج، ئمڕوو سێشەممە، خەوەردا لە کەمەوبۊن رۊداوەیل ئاگرکەفتن لە پارێزگاگە وە رێژەی 85% لە ماوەی ساڵ 2026، و مدوو ئەوە گلەو دا ئەرا خەسەوکردن وەشکینە مەیدانییەیل و هەڵمەتەیل هوشیارکردن و رێنماییکردن لەباوەت مەرجەیل بیوەیی و خوەیپاراستن.

 سەلەج ئەرا ئاژانس شەفەق نیوز وت، کە وەڕێوەبەرایەتییەگە چالاکییەیل چەودیاریکردن و هوشیارکردن جیوەجی کردگە کە بینا بازرگانییەیل و فەرمانگە حکومییەیل و مەکتەوەیل و خەسەخانەیل لەخوەی گرد، وە ئامانج هازدارکردن گریەداربۊن وە ریکارەیل بیوەیی و کەمەوکردن هووکارەیل ئاگرکەفتن.

 دیاری کرد کە تیمەیل وەرگری شارستانی وانەیل هوشیارکردن لە مەکتەوەیل رێک خەن وەرد دەسکردن ساڵ خوەنستن، لە شان کۆڕەیل و پرۆڤە مەیدانییەیل لە دامەزراوە حکومییەیل و ئەو شوینەیلە کە زیایبوین لە شمارەی هاووڵاتییەیل وەیخوەیان دۊنن، بیجگە لە سازدان وۆرکشۆپەیل ئەرا پاراستن و وەدۊاکەفتن سیستەمەیل بیوەیی لە نەخوەشخانەیل.

دیاری کرد کە ئی چالاکییەیلە لە دریژایی ساڵ وەردەوامن، و جیوەجی کریەین وەپەی ئەوە کە گونجیاگ بوود وەرد سروشت دامەزراوەیل و هەوەجەیلیان، وە شیوەیگ کە دەسمیەتی بەێد لە بەرزەوکردن ئاست هوشیاری وە رخبارییەیل ئاگرکەفتن و ریەیل خوەیپاراستن لەلی و ئامرازەیل رەفتارکردن وەرد فریاگوزاری.

 سەلەج باس  نەۊین شمارەیل هۊرد کرد کە ری بەێد وەراوردیگ بکریەێد لە ناوەین ئەو ئاگرەیلە کە توومار کریانە وەرجە جیوەجیکردن ریکارەیل بیوەیی و دۊای ئەوە، وە دیاریکردن ئەوە کە ئەو زانیارییەیلە کە لە وەردەسن تەنیا لەبان ئەو رێژەی کەمەوبۊن راگەیانریایە سنووردارن.

 دووپات کرد کە وەردەوامبۊن هەڵمەتەیل هوشیارکردن و وەشکینە دەورییەیل نۊنەرایەتی بەشیگ بنەڕەتی لە تەقەلایل وەڕێوەبەرایەتییەگە کەن ئەرا کەمەوکردن رۊداوەیل و پاراستن گیانەیل و سامانەیل.

شەفەق نیوز - بەغداد

شارەزای مەزەنەیل کەشوهەوا سادق عەتیە، خەوەر دا، کە نەخشەیل کەشوهەوا نشان وەرکەفتن ناوچەیل فرەیگ لە ناوڕاس نیمچەدوورگەی عەرەبی دەن وە رەوشیگ لە ئارامی کەشوهەوایی، کە لە ئمڕوو سێشەممەو دەس وەپی کەێد، و وەردەوام بوود تا شەممە 14ی لە مانگ تشرین دۊەم/ نۆڤەمبەر ئیسە، وە دەسنشانکردن ئەرا ئەوە کە ئی رەوشە وارین وارانەیل جیاواز لە تونی وەردی تیەێد، کە رەسێدە رفت، وەرد ئەگەر وارین تەگر.

 عەتیە لە خوەنستنی ئەرا نەخشە ئاسمانییەیل وت، کە مەزەنە کریەێد بڕەیل وارانە کەڵەکەبۊیەیل ئەرا چەن سەعاتیگ رەد بکەن لە 100 ملم لە بڕیگ لە ناوچەیل، کە بوودە هووکار دروسبۊن تافاو ئاو و لافاوەیل، و وە تایبەت لە ماوەی لۊتکەی رەوشەگە لە هەردوگ رووژ سێشەممە و چوارشەممە.

 دیاری کرد کە ئی رەوشە لە دەرەنجام پەڕین پەڵەیگ باڵای سەردەو تیەێد، کە هاووەختە وەرد چالاکی نزمەپاڵەپەستۆی دەریای سوور و ئەو رەوانەبۊن نم کە وەردی تیەێد، کە هەلەیل دروسبۊن ئەورە کەڵەکەبۊەیل و وارین وارانەیل پەڵاچەدار هازدار کەێد.

ئایا عراق رەسێدە عراق 

 لەباوەت رادەی کاریگەری ئی رەوشە لەبان عراق، شارەزای کەشوهەوا وت، کە هەرچەن کاریگەری دریژەوبۊن پەڵە باڵا سەردەگە کەفێدە نزیک عراق، و هەمیش ناوچەیلیگ لە وڵات شام و ئیران، وەلێ کاریگەری بەرزەپاڵەپەستۆی کەشوهەوایی رویکەشی لە ئاسمان وڵاتەگە وە هوکاریگ نەرێنی هەژمار کریەێد و ریگری لە هەر رەوشیگ ناسەقامگیری کەێد، و لەبان ئی بنەما، مەزەنەیل دەسنشان کەن ئەرا وەردەوامبۊن کەشوهەوا سەقامگیرەگە وە شیوەیگ گشتی لە عراق، وەرد نزمەوبۊن پلەیل گەرمی ئەرا چەن رووژیگ.

 عەتیە وەردەوام بۊ لە قسەیلی و وت: دۊر نییه‌خرێدەو بڕیگ ئەور دەرکەفن لە هەردوگ رووژ سێشەممە و چوارشەممە لە بەشەیل پەرتەوازەیگ لە ناوچەی باشووری، کە شایەت بوونە هووکار وارین پرزە یا نمە وارانیگ سووک و دیاریکریاگ (سنووردار)، وەبی مەزەنەیل وە دریژەوبۊن کاریگەرییە وارانییەیل وەرەو گشت شارەیل.

شەفەق نیوز ـ بەغدا

سەرچەوەیگ ئەمنی، ئمڕوو سێشەممە، خەوەردا لە مردن فەرمانبەریگ حکومی وە مدوو رویداویگ هاتوچوی لە ناوڕاس بەغدای پایتەخت.

سەرچەەگە وە ئاژانس شەفەق نیوز وت: رویداویگ لەیەکەوداین لەناوەین دوو ماشین و پلیانیان  رویدا لە نزیک پیەل حارسیە وە ئاراستەی تونیل زەیتون لە ئەنجام خێرایی بەرز و هووشیارنەوین لە ئەنجام خانمە فەرمانبەریگ وەزارەت نەفت گیان لەدەسدا.

وتیش؛ رانندەگەی تر دەسگیرکریا رێکار یاسایی وەرانوەری گیریەێدەوەر، دیاریکرد تەرم قوربانیەگە ئەرا پزیشک دادوەری کلکریا.

شەفەق نیوز - بەغدا / هەولێر

نرخ تەڵای بیگانە و عراقی، ئمڕوو سێشەممە، لە بازاڕەیل بەغداد پایتەخت   و هەولێر پایتەخت هەرێم کوردستان بەرزەوبوی.

پەیامنێر ئاژانس شەفەق نیوز وت: نرخ فرووشتن یەک مسقاڵ عەیار 21 تەڵای خەلیجی و تورکی و ئەوڕوپی لە بازاڕەیل بڕ فرووشتن لە جادەی نەهر بەغداد پایتەخت رەسیە 975 هەزار دینار، و نرخ سەنینی رەسیە 967 هەزار    دینار.

پەیامنێر ئاژانسمان وتیش: نرخ فرووشتن یەک مسقاڵ عەیار 21 تەڵای عراقی هەمیش بەرزەوبوین توومار کرد لەپای 945 دینار  دینار، و نرخ سەنینی رەسیە 937 هەزار دینار.

لەباوەت نرخ تەڵا لە دوکانەیل زەڕنگەری، نرخ فرووشتن یەک مسقاڵ تەڵای خەلیجی عەیار 21 ها ناوەین  یەک 975 هەزار دینار و 985 هەزار دینار، و نرخ فرووشتن یەک مسقاڵ تەڵای عراقی ها ناوەین 945 - و 955 هەزار دینار.

لە هەولێر پایتەخت هەرێم کوردستان، نرخ تەڵا بەرزەوبوی، کە نرخ فرووشتن یەک مسقاڵ تەڵای عەیار 24 رەسیە   1.033، و نرخ فرووشتن یەک مسقاڵ تەڵای عەیار 21 رەسیە   987 هەزا دینار، و نرخ فرووشتن یەک مسقاڵ تەڵای عەیار 18 رەسیە 845 هەزار دینار.

شەفەق نیوز ـ هەرێم کوردستان

وەڕێوەبەرایەتی کەشناسی و زەویلەرزەناسی هەرێم کوردستان، ئمڕوو سێشەممە، کەشوهەوای دوو رووژ نوچەگەدیاریکرد.

وەڕێوەبەایەتیەیگە لە بەیاننامەیگ راگەیان، "ئمڕوو ئاسمان ساماڵە و لەکە ئەورە گاجاریگ ئاڵشتبوودە نیمەئەور، پلەی گەرمی کەمیگ بەرەزوبوود و تونی وا ناوڕاسە وە ئاراستەی باکوور خوەرهەڵات".

دیاریکرد " سوو ئاسمان ساماڵو لەکە ئەورە لەناوچە کویەیل نیمەئەور بوود و نزمترین پلەی گەرمی کەمیگ داوەزێد بەرزترین پلەیل گەرمی لەبڕیگ ناوچە بەرزەوبوود و لەبڕیگ داوەزێد".

بەرزترین پلەی گەرمی مەزەنەکریاگ ئەرا سوو:

هەولێر: 16 پلەی سیلیزی 

پیرمام: 11 پلەی سیلیزی

سلێمانی: 14 پلەی سیلیزی

هەڵەبجە:17 پلەی سیلیزی 

چەمچەماڵ: 16 پلەی سیلیزی

دهۆک: 14 پلەی سیلیزی

زاخۆ: 15 پلەی سیلیزی 

ئاکرێ:15 پلەی سیلیزی 

گەرمیان:19 پلەی سیلیزی 

حاجی ئۆمەران:6 پلەی سیلیزی.

شەفەق نیوز - بەغداد

قەیرانەیل لە عراق یەک لەدۊای یەک تیەن، لە ناوەین ئاستەنگەیل ئەمنی و سیاسی و رخبارییەیل هەرێمایەتی و کارەساتە سروشتییەیل، کە دامەزراوەیل دەوڵەت خەنە وەرانوەر ئاستەنگەیل دووپاتەوبۊ پەیوەندیدار وە خێرایی وەڵامداین و توانایان لەبان پاراستن هاووڵاتییەیل و زامنکردن وەردەوامبۊن خزمەتگوزارییەیل.

 لە وەختیگ حکومەت پەنا دەێدە دروسکردن شانەیل ئەرا قەیرانەیل و وازکردن ژوورەیل ئۆپەراسیۆن و مەڵوەنەیل مەیدانی ئەرا کۆنترۆڵکردن لیکەفتەیل، وەلێ ئامادەبۊن ئی ئامرازەیلە و توانایان لەبان وەڕێوەبردن فریاگوزاری وەپەی پلانەیل وەرین، لە جیای تەنیا جۊلە دۊای رۊداینیان، جی پرسیارە.

 ئەو قەیرانەیلە کە وڵاتەگە رۊوەرۊیان بوود هەمەڕەنگن لە ناوەین لیکەفتەیل ململانێیە هەرێمایەتییەیل، تا رەسێدە لافاوەیل و تاڤگەیل ئاو کە دایە ناو ناوچەیلیگ لە هەرێم کوردستان و پارێزگایەیل ترەک، بیجگە لە قەیرانەیل هشکەساڵی و ئاوارەبۊن و رۊداوە گەورەیل کە عراق لە ماوەی ساڵەیل گوزەشتە وەخوەیان دینە.

نەوین رێککەفتن سیاسی

 لەی چوارچیوە، شارەزای ستراتیژی، ئەحمەد شەریفی، دۊنێد کە دروسکردن شانەیل قەیران نۊنەرایەتی ئامرازیگ کەێد کە لە دەوڵەتە دیموکراسییەیل وەکار تیەێد ئەرا رۊوەرۊبۊن ئاستەنگە ئەمنی و سەربازی و ئابوورییەیل، بیجگە لە کارەساتە سروشتییەیل، وەلێ دووپات کەێد کە سەرکەفتنی پەیوەندیدارە وە بۊین سیاسەتەیل باڵای یەکگرتگ ئەرا دەوڵەت و رێککەفتنیگ سیاسی لەباوەت وەڕێوەبردن دۆسیە ستراتیژییەیل.

 شەریفی ئەرا ئاژانس شەفەق نیوز ئۊشێد، کە عراق هەوەجەی وە خاڵیگ پشتپێبەستن سیاسی هەس کە هێزەیل و قەوارە بەشدارەیلە لە وەڕێوەبردن دەوڵەت لەبانی رێک بکەفن، کە یەیش بۊسە هووکار جیاوازی بەرنامە و دید و ئاراستەیل لە مامەڵەکردن وەرد قەیرانەیلە، وە تایوەت ئەو هەرێمایەتییەیلە لەلیان.

 نموونە وە گرژی ناوەین وڵاتەیل یەکگرتگ و ئیران تیارێد، کە عراق خستەسە وەرانوەر هەڵوێستەیل جیاوازیگ لەناوی سیستەم سیاسییەگە؛ چۊنکە هێزەیلیگ وە وەسف هاوپەیمانیگ ستراتیژی نووڕنە واشنتۆن، لە وەختیگ لایەنەیلیگ ترەک وەسف هێز داگیرکەری کەن و داوای رۊوەرۊبۊنی کەن، بەڵکم بڕیگیان لە سەرچەوەیل دەوڵەت پاڵپشتی ئەو لایەنەیلە کەن کە وە "وەرگری" ناسریانە.

 زیای کەێد کە ئی دژوەیەکبۊنە تەنیا رەنگ نیەێدە بان هەڵوێستە سیاسییەیل، بەڵکم دریژەو بوود ئەرا ئاست کارکردن شانەیل قەیرانیش، و دید و ئاراستەیلیان جیاواز بوود، وە شیوەیگ کە ریگری لە توانایان کەێد لەبان پیشکەشکردن وەڵامدانیگ یەکگرتگ و قەناعەتپیکەر ئەرا رای گشتی.

جۊلەی دیپلۆماسی

شەریفی سەردان سەرۆک وەزیرەیل عەلی زەیدی ئەرا تاران، جمعەی گوزەشتە، خەێدە ناو نموونەیل لەبان ئاڵووزییەیل وەڕێوەبردن قەیرانە هەرێمایەتییەیل، وە دەسنشانکردن ئەرا ئەوە کە جۊلە لە دۆسیەیگ وەی قەوارە چەسپیاگ بۊ بخریاێدە بان بنەمای راسپاردنیگ سیاسی و جەماوەری و دیدیگ یەکگرتگ کە هەڵوێست عراق ئەرا لایەن ئیرانی بوەێد.

 زەیدی سەردانیگ راگەیاننەکریاگ ئەرا پایتەخت ئیرانی جیوەجی کردۊد کە ئەرا چەن سەعاتیگ دریژەو بۊ، و سەرۆک دەسەی حەشد شەعبی فالح فەیاز وەردی بۊ، لە وەختیگ سەرچەوەیگ ئاگادار ئەرا ئاژانس شەفەق نیوز، دووشەممە، خەوەر دا کە پیشنیاریگ لە سەرۆک ئەمریکی دۆناڵد ترەمپ هەڵگردۊد ئەرا دواییهاوردن جەنگ ناوەین واشنتۆن و تاران کە لە 28 شوبات/ فێبرایەر 2026 هەڵسیا.

 شەریفی باوەڕ دیرێد کە نادیاری هەڵوێست سیاسی یەکگرتگ رەنگ دەێدە بان ئاست دڵنیابۊن جەماوەری وەرەو جۊلە حکومییەیل، وە دیاریکردن ئەوە کە وەڕێوەبردن ئەو رخبارییەیلە کە شایەد عراق رۊوەرۊیان بوود، کە ئەگەرەیل ئامانجگردن دامەزراوە ناوەکییە ئیرانییەیل لە ناویانە، هەوەجە وە هەڵوێستیگ نیشتمانی هاوبەش و پلانیگ ئاشکرا دیرێد ئەرا رەفتارکردن وەرد لیکەفتە شایەتکریایەیل.

ئامادەبۊن دامەزراوەیی

و وەڕێوەبردن قەیرانەیل تەنیا لەبان دۆسیە سیاسی و ئەمنییەیل سنووردار نییە، بەڵکم کارەساتە سروشتی و تەندروسی و ژینگەییەیل لەخوەی گرێد، وەرد ئەو ئەرکەیلە کە لەبان دامەزراوە حکومییەیل زاڵیەو کەن لە پاراستن گیانەیل و سامانەیل و زامنکردن وەردەوامبۊن خزمەتگوزارییەیل.

 لەی چوارچیوە، وەڕێوەبەر بەش پەیوەندییەیل و راگەیانن لە کۆمسیۆن باڵای مافەیل مرۆڤ لە عراق، سەرمەد سەعید بەدری، دووپات کەێد کە رەفتارکردن وەرد کارەسات و قەیرانەیل وە شیوەیگ راسەوخۆ پەیوەندیدارە وە مافەیل مرۆڤەو، و لە نوایان ماف ژیان و مافە ئابووری و کۆمەڵایەتییەیلە، کە یەیش کەێدەو کە ئامادەبۊن ئەڕایان وەرپرسیاریەتییگ بنەڕەتی بوود ئەرا دەوڵەت وە گشت دامەزراوەیلیەو.

 بەدری ئەرا ئاژانس شەفەق نیوز ئۊشێد، کە پلانەیل فریاگوزاری نییەتۊەنرێد لە ماوەی چەن رووژیگ یا وەرد رۊداین قەیرانەگە ئامادە بکریەن، بەڵکم هەوەجە وە چەن ساڵیگ لە پلانڕیژی دیرن، و کار لیژنە پسپۆڕەیل و تیمە مەشقپیکریاگەیلە، کە تیمە خوەیبەخشەیل لە ناویانە.

دیاری کەێد دەێد کە کۆمسیۆنەگە ئەندامە لە کۆمسیۆن نیشتمانی ئەرا کارەساتەیل و قەیرانەیل کە وەزارەت ناوخۆ سەرۆکایەتیی کەێد، و کار کەێد لەبان مەشقپیکردن تیمەیلی و بەشداریکردن لە وەڵامدان، لە شان رۆڵ چەودیاریکردن و بەڵگەدارکردن پێشێلکاری و نووڕینەیل.

 بەدری زنجیرەی ئەو قەیرانەیلە وەهۊر تیارێدەو کە عراق وەپیان رەد بۊە، لە دەسکردن وە ئاستەنگە ئەمنییەیلە کە دۊای ساڵ 2003 هاتن، و رەدبۊن وە شەپۆلەیل ئاوارەبۊن و قەیران پەتای کۆرۆنا، تا رەسێدە کارەساتە کەشوهەواییەیل و هشکەساڵی و لافاوەیل، وە دیاریکردن ئەوە کە شوینەوارەیل ئی رۊداوەیلە تەنیا لەبان زیانە گیانییەیل نین، بەڵکم دریژەو بوون ئەرا سامانە گشتی و تایبەتەیل و مافە بنەڕەتییەیل ئەرا هاووڵاتییەیل.

کارەساتەیل مەیدانی

 ئەو لافاوەیلە کە شار هەولێر پایتەخت هەرێم کوردستان وەخوەیان دین، لە شەممەی گوزەشتە، نموونەیگ نوو بۊن لەبان قەوارەی ئەو ئاستەنگەیلە کە کارەساتە سروشتییەیل فەرزی کەن، دۊای ئەوەگ ئاوەیل گەڕەکە نیشتەجیبۊنەیل و شەقامە سەرەکییەیلە داپووشین، و بۊنە هووکار پەککەفتن جۊلەی هاتوچو و رەسانن زیانەیل ماددی.

 لافاوەیل، بۊنە هووکار گیانلەدەسداین لای کەم دوو کەس، لە وەختیگ تیمەیل وەرگری شارستانی و پۆلیس و شارەوانییەیل تۊنستن فرەتر لە 300 کەس دەر بکەن کە ئاو دەورەیان داۊد لەناو ماڵ و ماشینەیلیان و لەبان بانەیل بینایەیل.

بەدری وتیش دەێد کە ئی کارەساتەیلە هەوەجە وە هەماهەنگییگ فراوان دیرن لە ناوەین دامەزراوە ئەمنی و خزمەتگوزارییەیل و سوپا و حەشد شەعبی و تیمە خوەیبەخشەیل و حکومەتە ناوخۆییەیل، وەلێ پرسیاریگ خەێدە وەرانوەر رادەی تەواوکاربۊن ئی تەقەلایلە و توانایان لەبان رەدکردن چارەسەر وەختانە وەرەو بونیادنان سیستەمیگ وەردەوام ئەرا ئامادەبۊن و ریگریکردن.

 لە چوارچیوەی وەڵامدان مەیدانی، مەڵوەن نیشتمانی ئەرا وەڕێوەبردن قەیرانەیل و کارەساتەیل لە وەزارەت ناوخۆی عراقی لە بەیاننامەیگ، رووژ یەکشەممە، وازکردن بارەگایگ کۆنترۆڵکار ئەرای لە قەزای دووزخورماتوو لە خوەرهەڵات پارێزگای سەڵاحەدین راگەیان، لە جیوەجیکردن رێنماییەیل وەزیر ناوخۆ یاسر مالیکی، دۊای ئەوەگ ری دەورگردەگە لە خزمەت دەرچگ وە هووکار لافاوەیل و ئاڵشتکارییە تونەیل لە کەشوهەوا.

 بەدری دووپات کەێد لەبان هەوەجەبۊن ئەوەگ هەر پارێزگایگ شانەیگ قەیران پسپۆڕ و ئامادە ئەرا دەسوەردان لە وەخت فریاگوزاری بیاشتۊد، وەرد مەشقپیکردن تیم وەزارەت و دامەزراوەیل لەبان جیوەجیکردن ئەرکەیلیان، و سنووردارنەکردن وەرپرسیارییەتییەگە لە وەزارەت تەندروسی یا وەرگری شارستانی یا لایەنیگ تەنیا.

 دیاری کەێد کە ئامادەبۊنەگە بایەسە دابینکردن تیمەیل فریاگوزاری خێرا و ستافە تەندروسییە مەشقپیکریاگەیل و کەرەستە پزیشکییەیل و ئامرازەیل فریاگوزاری لەخوەی بگرێد، بیجگە لە دانان جیەوگرەیل ئەرا رۊوەرۊبۊن ئەگەرەیل ئاوارەبۊن و کووچکردن و پەککەفتن خزمەتگوزارییەیل، و مسۆگەرکردن بەڵگەنامە و دۆکۆمێنت و زانیارییە گرنگەیل و سامانە گشتی و تایبەتەیل.

 لە شان کارەساتە سروشتییەیل، گرژییە هەرێمایەتییەیل ئاستەنگیگ لە جۊریگ ترەک فەرز کەن، کە خوەی دۊنەێد لە ئەگەرەیل وەرکەفتن عراق وە لبکەفتەیل رۊداویگ ناوەکی یا تیشکدەر لە ئەگەر ئامانجگردن دامەزراوەیل ئیرانی، و ئەو رخبارییەیلە کە شایەد لەوەو پەیا بوون لە گواستنەوەی پیسکەرەیل لەڕی وا یا ئاو و خاکەو.

 بەدری ئۊشێد کە ئەگەرەیل فراوانەوبۊن ململانێیە هەرێمایەتییەیل و ئەو رخبارییە نائاساییەیل کە شایەد لەلیانەو پەیا بوون، کە رخبارییە ناوەکییەیل لە ناویانە، فەرز کەن لەبان دەوڵەت کە تەقەلایلی دوو ئەوەنە بکەێد و شارەزایی و توانایەیل هەوەجەدار دابین بکەێد، و مامەڵەنەکردن وەرد ئی سیناریۆیەیلە جۊر ئەوەگ وەرپرسیاریەتی لایەنیگ تەنیا بوون.

ئاسایش هاووڵاتی

 لە وەختیگ قەیرانەیل هەوەجە وە هەماهەنگی ئەمنی و سیاسی و مەیدانی دیرن، شوینەوارە بژێوی و مافییەیلیان مینێدە دیارترین پێوەر ئەرا پەیمانەکردن توانای دەوڵەت لەبان پاراستن هاووڵاتییەیلی، وە تایوەت وەختیگ ئاژاوەیل بوونە هووکار رخباری ئەرا دابینکردنەیل خوەراک و دەرمان و سزمەنی و کارەبا و مووچەیل.

لەی چوارچیوە، ئەندام وەرین لە لیژنەی مافەیل مرۆڤ پەرلەمانی لە خول پەنجەم، نیسان زایر، دۊنێد کە ئاسایش دەوڵەت لە ئاسایش گەلەگەی جیاوە نییەوود، و پاراستن سەروەری و پلانە ئەمنییەیل لایەنیگ لە مانای خوەیان لەدەس دەن ئەگەر هاووڵاتی مەنە دڵەڕاوکێ لەبان بژێوی رووژانە و هەوەجە بنەڕەتییەیلی.

 زایر ئەرا ئاژانس شەفەق نیوز ئۊشێد، کە ئەوەگ لە حکومەت خوازریەێد تەنیا لەبان داین پەیامەیل دڵنیابۊن سنووردار نییە، بەڵکم هەوەجە وە ئامادەکردن پلانەیل فریاگوزاری تەواوکار دیرێد، وەرد دابینکردن یەدەگ ستراتیژی بەس، و دانان جیەوگرەیل ئابووری و خزمەتگوزاری کە وەردەوامبۊن خوازینەیل ژیان مسۆگەر بکەن هەرچەن ماوەی قەیرانەگە دریژەو بکیشێد.

 دووپات کەێد لەبان هەوەجەبۊن پشت بەسین وە ئامرازەیل روون ئەرا ریگریکردن لە  دەسکاری نرخەیل، و زامنکردن وەردەوامبۊن خوەراک و دەرمان و سزمەنی و کارەبا و مووچەیل، وە هوشدارییەو لەوەگ رەوشە نائاساییەیل نەبایەس بوونە هووکار پاساویگ ئەرا کەمەوکردن مافە دەستوورییەیل یا دەسدریژیکردن لەبان کەرامەت هاووڵاتییەیل و ئازادییەیلیان.

 زایر لە کۆتایی دۊنێد کە ئەو دەوڵەتە کە خوازریەێد ئاسایش و سەروەریی خوەی بپارێزێد، لە خود وەخت وەرپرسیاریەتی پاراستن گەلەگەی لە لیکەفتەیل قەیرانە هەرێمایەتییەیل هەڵگرێد، وەرد زامنکردن ژیان هاووڵاتییەیل وە کەرامەتەو لەبان گشت ئاستەیل.

شەفەق نیوز - زیقار/ واست

دوو سەرچەوەی ئاسایش و ناوچەیی لە پارێزگایەیل زیقار و واست، رووژ سێشەممە، خەوەر دان لە توومارکردن دوو حاڵەت خوەیکوشتن ئەرا دوو دویەت وەرد کوشیان گەنجیگ لە ئەنجام وەردەوەردە وەمدوو بازی تووپان.

سەرچەوەیگ ئاسایش لە زیقار ئەرا ئاژانس شەفەق نیوز وت: "دویەتیگ لە سییەیل تەمەنی دەسبرد ئەرا  خوەیکوشتن وە وەکارهاوردن دەرمان مویش لەناو مال خوەیان لە ناوچەی ئیسکان پیشەسازی لە باشوور شار ناسریە"، دیاری کرد  مدووەیل رویداوەگە، وەپای زانیارییەیل سەرەتایی، گلەوخوەد ئەرا تیکچگن دەروینی، لە وەختیگ تەرمەگە  ئەرا فەرمانگەی پزیشکی دادوەری کلکریا تا  رێکارەیل یاسایی تەواوبکریەێد.

لە قەزای دواییش لە زیقار، هەمان سەرچەوە راگەیان، دویەتیگ تر لە بیستەیل تەمەنی  خوەیکوشت وە سزانن خوەی و  وەکارهاوردن بەنزین لەناو مال خوەیان لە قەزاگە کە کەفێدە باکوور خوەرهەڵات پارێزگاگە، دیاریکد  تەرمەگەی  ئەرا پزیشکی دادوەری کلکریا، بی ئەوەگ مدووەیل رویداوەگە تا ئیسە بزانریەد.

سەرچەوەگە ئاشکرا کرد،  لایەنەیل تایبەتمەن لە پارێزگاگە لێکۆڵینەوەیگ واز کردن ئەرا زانین وردەکاری هەردووگ رویداوەگە.

لە پارێزگای واستیش، سەرچەوەیگ ناوچەیی ئەرا ئاژانسەکە وت:  گەنجیگ لە سییەیل تەمەنی وە زەخدارکردن وە چەقۆیگ تیژ کوشیا، لەدویای وەردەوەردیگ  وەمدوو بازی ناوەین تیپەیل جەماوەری ئەرا تووپان، لە سەعاتەیل دیروەخت دویەشەو دوشەممە، لە ناوچەی دجیلی.

دیاریکرد  تەقەلایەیل فریاکەفتن گەنجەگە و گواستنەوەی ئەرا خەستەخانە سەرکەفتی نەبوی لە قورتارکردن ژیانی، لە وەختیگ توومەتبار وە زەخدارکردنەگە ئەرا شوونیگ نادیار وایە.

شەفەق نيوزــ بەغداد/ هەولێر

نرخ دۆلار ئەمریکی وەرانوەر دینار عراقی،  ئمڕوو سێشەممە،  لە بۆرسەی سەرەکی  بەغداد  پایتەخت  و هەولێر بەرزەوبوی .

پەیامنێر ئاژانس شەفەق نيوز وت: نرخ دۆلار بۆرسەی کیفاح و حارسیە لە بەغداد پایتەخت رەسیە 168900  دینار عراقی وەرانوەر 100 دۆلار ئەمریکی.  رووژ دووشەممە  نرخ دۆلار رەسیە  168600 دینار عراقی وەرانوەر 100 دۆلار ئەمریکی.     

پەیامنێڕمان وتیش؛ نرخ فروو‌شتنی لە دوکانەیل بەغداد  رەسیە 169500 دینار عراقی وەرانوەر 100 دۆلار ئەمریکی، و نرخ سەنینی رەسیە 168500.     

لەهەولێر پایتەخت  هەرێم کوردستانیش نرخ دۆلار بەرزەوبوی، کە نرخ فروشتن رەسیە 169000 عراقی وەرانوەر 100 دۆڵار ئەمریکی، و نرخ سەنینی 168900 عراقی وەرانوەر 100 دۆلار ئەمریکی.

‌  

شەفەق نیوز - بەغداد

وەزیر دارایی فالح ساری، ئمڕوو سێشەممە، ئەرکدار کریەێد وە دابینکردن پویل ئەرا سیستەمەیل وەرگیری ئاسمانی لە کۆریای باشوور، "تا دڵنیا بکەێدەو لە وەهێزکردن توانای عراق ئەرا پاراستن ئاسمانی، لە چوارچمگ پشتیوانیکردن پلانەیل نواچگن توانایەیل وەرگیری هاز چەکدار".

یەیش لە وەخت دیداریگ وەرد وەزیر وەرگری نايف ئەلشمری هات، کە لێکۆڵینەوە کرد چەن کاغەزیگ پەیوەنیدار وە پشتیوانیکردن دەزگای سەربازی و وەهێزکردن توانایەیل هێزەیل چەکدار، وەپای بەیاننامەیگ کە لە وەزارەت دارایی دەرچگ.

وەزیر لە دیدارەگە دووپات کرد لەبان پاداگری وەزارەت ئەرا هاوکاریکردن هێزەیل چەکدار و دابینکردن تەرخانکردنەیل دارایی هەوەجە ئەرا وەهێزکردن توانایەلی، وەتایبەت لە مژار چەکدارکردن و دابینکردن.

لە لای خوەییشەو، وەزیر وەرگری دەسخوەشی کرد ئەرا   پشتیوانیکردن وەزارەت دارایی ئەرا دەزگای سەربازی، و دووپاتکرد کرد لەبان گرنگی وەردەوامبوین هەماهەنگی لە ناوەین هەردوگ لایەن ئەرا جیوەجیکردن کاغەزەیل هاوبەش و وەهێزکردن توانایەیل هازەیل چەکدار و بەرزکردن ئاست ئامادەیی.

شەفەق نیوز - کەرکووک

سەرچەوەیگ ئەمنی، ئمڕوو سێشەممە، خەوەردا وە دەسکردن پرۆسەیگ ئەمنی لە "دووڵ زغەیتوون" کە کەفێدە ناوەین ناحیەی رەشاد و قەزای داقووق لە باشوور پارێزگای کەرکووک، ئەرا مینەکردن تەرم سێ چەکدار لە ریخریاگ داعش، دۊای دوو گورز ئاسمانی کە فڕۆکەیل عراقی لە جۊر F-16 جیوەجییان کردنە.

 سەرچەوەگە ئەرا ئاژانس شەفەق نیوز وت، کە هێزیگ لە سوپای عراقی دەس کردیەسە پرۆسەیگ ماڵین لە ناوچەیل "دووڵ زغەیتوون"، ئەرا مینەکردن ئەو تەرمەیلە کە گومان کریەێد خاوەنەیلیان لە دەرەنجام ئەو دوو گورز ئاسمانییە کوشیانە کە بنکەیل ریخریایەگە لە ناوچەگە کردنەسە ئامانج.

 دیاری کرد کە پرۆسەگە وە پاڵپشتی ئاسمانی لە فڕۆکەوانی سوپا وەڕیەو چگ، لە وەختیگ هێزە ئەمنییەیل وەردەوامن لە پرۆسەیل مینەکردن و وەشکین لە ناوچە ئامانجدارەیل، ئەرا دڵنیابۊن لە دەرەنجامەیل هەردوگ گورزەگە و پەیاکردن تەرم کوشیاگەیل.

 ئی ئۆپراسیۆن ئەمنییە هاووەختە وەرد جیوەجیکردن گورزیگ ئاسمانی لەلایەن فڕۆکەیل جەنگی F-16 سەر وە هێز ئاسمانی عراقی، دۊکە دووشەممە، کە حەشارگەیگ ریخریاگ داعش لە دووڵ زغەیتوون لەناو کەرت کەرکووک کردە ئامانج، وەپەی ئەوەگ سەرچەوەیگ ئەمنی ئەرا ئاژانس شەفەق نیوز خەوەری دا، و دۊای ئەوەیش نویسینگەی فەرماندەی گشتی هێزە چەکدارەیل ئی زانیارییەیلە دووپات کرد، وە دەسنشانکردن ئەوە کە گورزەگە جیوەجی کریاس لەبان بنەمای زانیارییەیل هەواڵگری هۊرد لە وەڕێوەبەرایەتی هەواڵگری سەربازییەو، و دۊای ئەوەگ یەکەیل چەودیاری جۊلەی سێ تیرۆریست لە کەرتەگە کردنە.

شەفەق نیوز - بەغداد

روانگەی "ئیکۆ عراق"ی تایبەتمەن وە مژار ئابووری، رووژ سێشەممە، راگەیان  زەرەدەیل مەزەنەکرياگ لە ئەنجام وسیان بەرهەمهاوردن لە کێڵگەی گازی کۆرمۆر لە هەرێم کوردستان لە 4.15 ملیۆن دۆلار رووژانە رەدبوود، لە نرخ بەرهەمهاوردن گازی سروشتی و گازی ئاشکدن و خەسەوبویەیل.

روانگەگە لە بەیاننامەیگ  رەسیدە ئاژانس شەفەق نیوز دیاری کرد ک کێڵگەگە وەرجە ئامانجگردن نزیکەی 700 ملیۆن پا سێجا رووژانە لە گازی سروشتی بەرهەم هاوردیاد، وە نرخیگ مەزەنەکرياگ  رەسێدە 3.3 دۆلار ئەرا هەر ملیۆن پا سێجا، کە یەیش ئاستیگ یەکسانە وە نزیکەی 2.31 ملیۆن دۆلار رووژانە.

دیاری کرد  کێڵگەگە نزیکەی 1400 تەن رووژانە لە گاز نەفتی شلەکرياگ بەرهەم هاورد، ک وە (گاز ئاشکردن) ناسریاگە، وە نرخیگ مەزەنەکرياگ  رەسێدە 720 دۆلار ئەرا تەنیگ، تا نرخەکەی بڕەسێدە نزیکەی 1.008 ملیۆن دۆلار رووژانە.

روانگەگە دیاری کرد،  بەرهەمهاوردن خەسی نەفتی رەسێدە نزیکەی 22 هەزار بەرمیل رووژانە، وە نرخیگ مەزەنەکرياگ کە رەسێدە 38 دۆلار ئەرا بەرمیلیگ،  یەیش یەکسانە وە 836 هەزار دۆلار رووژانە.

ئاشکرا کرد، ئێ مەزەنەکردنەیلە تێچگەیل وسیان کۆمپانیایەیل بەرهەمهێنەر، و کرا کاڕەیل گواستنەوە، و زەرەدەیل ناڕاستەوخوەی کە لەدویای کەمەوبوین پەیاکردن گاز ئەرا وێستگەیل بەرهەمهاوردن کارەبا تێد.

شەفەق نیوز - وەدۊاچگن

رووژنامەیگ ئەمریکی، رووژ سێشەممە، خەوەر دا، کە وڵاتەیل یەکگرتگ فڕۆکەیل ئەرا دابینکردن سزمەنی لە ئاسمان لە بنکەی میڵدنهۆڵ بەریتانی ئەرا ئەڵمانیا و شوینەیل ترەک بردیە، دۊای وەرگردن زانیارییەیل هەواڵگری لەباوەت رخبارییگ ئیرانی شایەتکریای کە بنکەگە بکەێدە ئامانج، هاووەخت وەرد تونەوکردن ریکارە ئەمنییەیل لە دوو بنکەی سەربازی بەریتانی کە میوانداری هێزەیل ئەمریکی کەن.

 رووژنامەی "وۆڵ ستریت جۆرناڵ" لە سەرچەوەیل ئاگادارەو وت کە سوپای ئەمریکی دوو فڕۆکەی ئەرا دابینکردن سزمەنی ئەرا ئەڵمانیا لە وەختیگ زۊ لە رووژ دووشەممە بردیە، وەرجە ئەوەگ فڕۆکەیل ترەک بڕەسنە پیان، لە ناو وەردەوامبۊن مەزەنەی سروشت رخبارییەگە.

 سەرچەوەیل دیاری کردنەو کە وەرپرسەیل ئەمریکی هێمان باس لە سروشت ئەو زانیارییە هەواڵگرییەیلە کەن کە رەسینە، و ئایا نشان پەلاماریگ نزیک دەن یا وەرەو رخبارییگ ئەمنی گشتی کە بنکەی میڵدنهۆڵ سەر وە هێز ئاسمانی شاهانەی بەریتانی بکەێدە ئامانج.

 هاووەخت وەرد ئەوە، دەسەڵاتەیل ئەمریکی ئاست ریکارە ئەمنییەیل بەرزەو کردن لە هەردوگ بنکەی میڵدنهۆڵ و لەیکنھیس بەریتانی، لە وەختیگ ماڵپەڕ "زە وۆر زۆن" سەربازی دیاری کرد کە سوپای ئەمریکی رێوشۊنەیل پاراستن هێزەیل هازدار کردگە لە هەردوگ بنکەگە.

 هێز ئاسمانی ئەمریکی رەت کرد هووکارەیل دیاریکریاگ ئەرا جۊلەیل فڕۆکەیلە ئاشکرا بکەێد، وە دەسنشانکردن ئەوەگ دووارە بڵاوەپیکردن فڕۆکەیل لە ناوەین بنکە سەربازییەیل هەمیش کەفێدە چوارچیوەی پرۆسە ئاساییەیل.

 ئی وەرەونواچگنەیلە تیەن دۊای چەن هەفتەیگ لە کیشاننەوی بۆمبهاوێژەیل ئەمریکی لە جۊر "B-1" لە بنکەی فێرفۆرد بەریتانی، لەبان بنەمای زانیارییەیل هەواڵگری لەباوەت پلانیگ ئەرا پەلاماریگ وە فڕۆکەیل بێفڕۆکەوان کە گومان کریەێد پەیوەندی وە ئیرانەو بێد.

 جۊلە سەربازییە ئەمریکییەیل دۊایی دووارە پرسیارەیل جووش دەن لەباوەت ئاست رخبارییە ئەمنییەیل کە رۊوەرۊی دامەزراوە و بنکە سەربازییە ئەمریکییەیل بوون لە ئەوروپا، لە سای وەردەوامبۊن گرژی وەرد تاران، سەرەڕای لێدوانەیل سەرۆک ئەمریکی دۆناڵد ترەمپ دۊایی کە لەناوی وە رادەیگ گەورە دەسکردن گورزە سەربازییەیل لە دژ ئیران دۊر خستەو.

شەفەق نیوز - ریاز

قسەکەر فەرمی وەناو هێزەیل هاوپەیمانی عەرەبی وە سەرکردایەتی سعودیە ئەرا پشتیوانیکردن لە رەوایەتی لە یەمەن، ترکی ئەلمالکی، ئمڕوو سێشەممە،  پویچەڵکردن پەلامارەیل وە مووشەک و درۆنیگ کە دەسەی ئەنسارەڵڵای حوسی وشانێ ئەرا لای ناوچەی باشوور و خوەرهەڵات و رەیاز راگەیان.

مالکی لە بەیاننامەیلیگ ک لە پلاتفۆڕم "إكس" بڵاوی کرد وت: وەرگری ئاسمانی رویوەرووی دوو مووشەک بوی و تێکیانشکان  ک یەکی لەلییان بالیستی بوی، وە ئەوەگ تریش کڕوز بوی ک "میلیشیاگە وشانبوی ئەرا لای  ریاز پایتەخت".

و خەوەر دا لە رویوەڕویبوین مووشەکیگ بالیستی کە دەسەی حوسی وشانبوی ئەرا لای ناوچەی باشوور، وەرد رویوەڕویبوین و شکانن درۆنیگ لە ناوچەی خوەرهەڵات.

شەفەق نیوز - وەدویاچگن

نرخەیل نەفت، ئمڕوو سێشەممە، داوەزی و وەردەوام بوی لە زەرەدەیل دانیشتن گزەشتە، لەدویای قسەیل دونالد ترەمپ سەرۆک ئەمریکا کە ئەگەر ئەنجامدان پەلامارەیل سەربازی نوو لەبان ئیران لە ئیرنگە کەمەو کرد، یەیش   رخداری بەرهەمهاوردن  نەفت لە خوەرهەڵات ناوڕاس کەمەوکرد.

گرێبەستەیل ئایندەی خام برێنت وە بڕ 70 سەنت، یا 0.75% کەمەو بوی، تا بڕەسێدە 91.88 دۆلار ئەرا بەرمیلیگ، لە وەختیگ خام خوەرئاوا تێکساس ناوڕاس ئەمریکی 78 سەنت، یا 0.90% داوەزی ئەرا 86.07 دۆلار ئەرا بەرمیلیگ.

خام برێنت لە دانیشتن گوزەشتە وە بڕ نزیکەی 5.85% داوەزی، تا وە نزیکەی 22% داوەزێد لە بەرزترین ئاست کە لە  شەش مانگ تووماری کردوێد لە 118 دۆلار ئەرا بەرمیلیگ لە 30 تشرینی یەکەم.

لەی مژارە، راپرسییگ دەرخس  بەرهەمهاوردن رکخریاگ ئۆپێک لە ماوەی تشرینی یەکەم بەرزەو بویە، وە گاڵداین زیایبوین بەرهەمهاوردن لە سعودیە و کوێت و عراق، وەجگە لە وەردەوامبوون پەیوەنییەیل لەبان کلکردن.

شەفەق نیوز ـ وەدویاچگن

كۆمپانیای تیكتۆک ئەرا یه‌كه‌مجار ئه‌پڵیكه‌یشنیگ سەروەخوەی وه‌ ناو تیكتۆک شۆپ له‌ بریتانیا و چه‌ن وڵاتیگ ئاسیا خستەکار، ئەرا جیاكردن به‌ش سەنین له‌ ناوه‌ڕۆک ڤیدیۆیی سه‌ره‌كی و ئەو سەنین و فروشتن راستەوخوەیەیلە لەری ئینتەرنیت کریەێد.

ماڵپه‌ڕ خەوەری TechCrunch ئاشکراکرد، كۆمپانیای تیكتۆک ئه‌پڵیكه‌یشنه‌گه‌ی له‌ بریتانیا و تایله‌ند و مالیزیا و فلیپین ئەرا سیسته‌مه‌یل ئه‌ندرۆید و ئای ئۆ ئێس وەردەسە، دویای ئه‌وه‌گ مات ناڤارۆ شاره‌زای تووڕه‌ كۆمه‌ڵایه‌تییه‌یل گامەیلی تێبینی کردوێد.

ئه‌پڵیكه‌یشنه‌ نووەگە گشت خزمه‌تگوزارییه‌یل سەنین راسەوخو لەری پەخش راستەوخوەی و  ڤیدیۆیەیل کوڵ پیشکەش کەێد هەمیش وەکارهاوەرەیل توەنن لەریەو وەشیوەی پارێزیاگ پویل بیەن و چەودێری رەسین کەلوپەلەیل داواکریاگ بکەن وە ئاسانی و خێرایی.

كۆمپانیای تیكتۆک له‌ ری داوەزانن ئێ به‌رنامه‌ سەروەخوەیە چەندین داشكانن  تایوه‌ت و رەسانن  خۆرایی وەخشێدە وەکارهاوەرەیلی، وە ئامانج زیایکردن فرووش و رکابەرکردن کۆمپانیا گەپەیل مژار بازرگانی ئەلکترۆنی جویر  ئه‌مازۆن و شین و تێمۆ له‌ بازاڕه‌ ناودەوڵەتیەیل.

زامەگان لە وەیشت ژان قەپ دەن لە یەک

چەو بەسم پووس و سقان قەپ دەن لە یەک

ورسێین تاگەر گڕێ لاوا کەمەو

نانەگان سفرەگان قەپ دەن لە یەک 

نیمەروو گشتێ خەفن خوەم دۊنمان

سێفەگان باخەوان قەپ دەن لە یەک

جاردەف دۊنن ک دی مردێ کەمە!

قەورەگان قەورسان قەپ دەن لە یەک

یەک نیەناسن لەێرە دی سەربازەگان

بێمدوو لە مەرز گیان قەپ دەن لە یەک 

کووڵبەر کەفت و خودا هەم دەنگ نەکرد

ئێ کۊەیلە سان وە سان قەپ دەن لە یەک 

تا سەرێ خڕ دام عمرم هاتە سەر

ڕووژەگان لەێرە چمان قەپ دەن لە یەک

داڵگم وەت زندگی گشتێ جەنگە

تا ئەبەد ژان و ژیان قەپ دەن لە یەک

د. ڕزا مەوزوونی

شەفەق نیوز ـ دیالە

سەرچەوەیگ ئەمنی لە دیالە، ئمڕوو دووشەممە، خەوەردا لە پەیاکردن تەرم مناڵیگ لە چەم خریسان باشوور شار بەعقوبە.

سەرچەوەگە وە ئاژانس شەفەق نیوز وت، هاوڵاتیەیل تەرم مناڵیگ خنکیاگ لە ئاو پەیاکردن کە وەبان ئاو کەفتیە لە چەم بزایەر بهروز لە باشوور شار بەعقوبە لە پارێزگای دیالە و دەسوەجی پۆلیس لێ خەوەردار کریاس.

دیاریکرد، هێزەیل ئەمنی رەسینەس شوین رویداوەگە و تەرمەگە دراوردن و ئەرا پزیشک دادوەری کلیکردن ئەرا تەواوکردن رێکارەیل یاسایی.