لە جەهان مۆبایل وەگەرد خاوەنە مردگەیلیان وەخاک نەن
شەفەق نیوز/ خی مەردم وە مۆبایل لەی دەیەیل دویاییە وەشیوەی فرەیگ زیایەو بوی، کە بەشیگ قەت نیەتوەنن واز لەلی بارن.
خیداین وە مۆبایل رەسیە ئارەزوو ئەوە کە خاوەنی خوازێد دویای مردنیش وەگەردی بوود، کە وەخانکناین مۆبایلەیل وەگەرد خاوەنە مردگەیلیان لە جەهان بویەسە چشت باویگ.
ناوەند تاقیکردن بانان لە لەندەن وت: شمارەی ئەو کەسەیلە کە ئارەزوو دیرن مۆیایلیان وەگەرد خوەیان بوەنە قەور زیایەو بوود، و دیاری گشت ئەوانەگ خوازن مۆبایلیان وەگەرد خوەیان بوەنە قەور خوار تەمەن چل ساڵن.
ئایەم ئی سەردەمە فرە خی وە مۆبایل بردیە، کە تەنیا تەلەفۆنیگ نییە، بەڵکم بویەسە نشانەی شارستانیەت ئەرا سەردەم ئیمە، و سروشت ژیان رووژانەی ئی سەردەمە نشان دەێد کە نزیکەی گشت چشتیگ لەناوی پەیوەندی وە مۆبایل دیرێد.
مۆبایل زیرەک هەوەجە وە تەلەفیزیۆن و رووژنامە و کۆڤار کاغەزین و چگن ئەرا بازاڕ نەیشت، و هەوەجەی بەشیگیش نەیشت تا بچنە شوین کار، کە بویەسە پەنجەرەی وازیگ کە کەسەگە لەییەو نووڕێدە جەهان، و وەپییەو پەیوەندی وە ئەوەکەیل کەێد، و مەردمیگ لەبان زەوی ناسێد.
مۆدەی وەخانکناین مۆبایل وەگەرد خاوەنی، لە باشوور ئەفریقاو دەسوەپی کرد، یەکەمین کەس مۆبایل وەگەرد خوەی ئەرا قەور برد، کابرایگ خەڵک کیپ تاون بوی، ئەو پیاوە کە باوەڕ وە هازەیل تێندار داشت، و فرە رخی چیاد وە جادوو بخفیەێد، و دویای ئەوە زنیوەچاڵ بکریەێد، ئەراوە داوا کرد مۆبایلەگەی وەگەردی بنریەێدە خاک، تا بتوانێد ئەگەر لەناو تاریکی قەوارەگەی هاتە خەوەر پەیوەندی بکەێد وە داوای وەهاناڕەسین بکەێد.
لە بەشیگ لە شارستانیەیل کویەنە، شمسیر و رم وەگەرد جەنگاوەرەیل نیانە خاک، و لە میسر کوینە، فیرعەونەیل گەنج و ئەنتیکە و خوەراکیش بردیانە قەور، و دیارە سەردەم ئیمە وەوە ناسیەێد کە مۆبایل نەێدە قەور.
وەگەرد بڵاوبوین ئی مۆدە، دامەزراوەیل وەخانکناین تایبەت دەرکەفت، کە نمایش کارەیلیان کەن.
کۆمپانیایل وەخانکناین گشت چشتیگ وەشیوەیگ سەردەمیانە دروس کەن، کە نەک تەنیا مۆبایل مردیەگە نەنە خاک، بەڵکم چەن پاترییگ خەنە ناو تەرمەگەی، چوینکە پاتری مۆبایلەگە لەوەر تەڕی ناو قەورەگە لەکار وسێد.
لە ئوسترالیا، ئەرا نموونە، فرە کەس ئارەزوو دیرن ئەو چشتەیلە ئەرا قەور بوەن کە شیوەی ژیانیان نشان دەن، جویر مۆبایل و لابتۆپ بەشیگ لەوانە خوازن هەکاتی ناودیارەیل خشڵەیل گرانبەها وەگەرد خوەیان بوەنە قەور.
ئی کار لە ئێراندایش باوەو بویە، کە زیاتر لە ٩٤ لەسەدیان مۆبایل دیرن، کەسیگ پەیمان نیەبد لەودونیاو پەیوەندی وە خیزان و دووسەیلی بکەێد، وەلێ بەشیگیان وەگەرد خوەی بەێدەی شایەت ئەو کارە بوود، و بەشیگیش تەمەی ئەوە کەێد جگارە و چوکوڵ کبریت یا وەیلکان وەگەردی بنریەێدە قەور.
ئی جویرە رسوومیگ لە ئەمریکا بوود، لە ویلایەت ساوت کارۆلینا، کەسوکارەیل مردیەگە وە دزیەو مۆبایلەگەی خەنە ناو گیرفان کوتر مردیەگە وەرجە سزانن تەرمەگەی، و ئەوەیش ئاشکرا بوود هەنای دەنگ رممەی تەقیان پاتری مۆبایلەگە لەمەوقەی سزانن تەرمەگە بەرزەو بوود.
ئاژانسەیل وەخانکناین پیشکەش خزمەت داناین مۆبایلیان وەگەرد کویز خوەڵەکوو کەن، یەیش گشت چشتیگ نییە، هەرچەن یە لەلای بەشیگ کاریگ ئەڵاجەویە، وەلێ یەی چشت نشان دەێد، کە خیداین ئایەمە وەی ژیانە، زەنگ مۆبایلەگە کە پڕە لە ئاوازەیل جیاجیا، بویەسە ئومیدیگ تا خاوەنی لە جەهانیگ ترەک خەوەردار بکەێد.
