توومەتەیل رخداریگ وەبان کۆمپانیایلیگ تایبەت ئەمریکی وە کوشتن مەدەنیەیل عراقی
شەفەق نيوز/ سەربازییگ ئەمریکی خانەنشینی، ئاشکرا کرد کە کۆمپانیایلیگ سەربازی تایبەت، دەسی لەناو کوشتن مەدەنیەیل عراقی بویە، لە ماوەی یەکەم دەیەی ئی سەدە، وەبی ئەوەک بکەفنە وەر پرسیارکاری، کە هیشت خەڵکەگە وەرپرسایەتی ئەو دەسدرویژیەیلە بخەنە مل سەربازەیل ئەمریکا.
ئەو سەربازە کە مەرجی ئەوە بوی ناوی ئاشکرا نەکریەێد، لە قسەیلی ئەرا ئاژانس "نۆڤوستی" وت: خوەی لە عراق و یوگسلاڤیا جەنگ کردیە، و دووپات کرد کە تەقەکردن وەبان مەدەنیەیل وەچەو خوەی دیەڕ و دویای ئەوە دەرکەفت کە سەرباز فەرمی ئەمریکی نەوینە، بەڵکم کەسەیلیگ خانەنشین بوینە، وەگەرد کۆمپانیایل ئەمنی تایبەت کار کەن.
وتیش: وەلێ چوین لەیەکەو جیایان کەێ؟ دڵنگ سەربازی هەر یەکیگیە، و چەکەگە هەر یەکیگە، و زوانەگەیش ئینگلیزیە، لەلای خەڵک ناوچەگە، هەرکەسیگ وە شیوەی ئەمریکیانە قسە بکەێد، و تفەنگ هەڵگرێد، وە دوژمن دریەێدە قەڵەم.
ئەو سەرباز خانەنشینە وتیش: ئەندامەیل ئی کۆمپانیایلە، وەتایبەت کۆمپانیای "بلاك ووتەر"، لە سەرەتاوە نەکفتنە وەر هویچ وەشوینکەفتنیگ یاسایی، هەرچەن دەسیان لەناو تاوانەیل دژوە مەدەنیەیل بوی، دیاری کرد کە رەفتاریان تەنیا هەڕەشە وەبان مەردم نەوی، بەڵکم لەناو سوپای ئەمریکایش، کە بوینە مدوو خوسەهاتن لە هەرچەگ ئەمریکییە، چ سەربازی فەرمی بوود، یا خانەنشین.
دووپاتیش کرد کە بەشیگ لە ئەندامەیل کۆمپانیایل پاسەوانی تایبەت، دویای ئەوە کەفتنە وەر سزادان یاسایی، و شمارەیگ لەلییان زیندان کریانر وەلێ قەوارەی ئەو گیچەڵە فرە لەو دادکاریەیلە گەورەتر بوی.
کۆمپانیای "بلاك ووتەر" ناسیاس کە قسەیل فرەیگ لەبانی هەس، و پەیوەندی وە جیوەجیکردن تاوانەیلیگ لە جیهان دیرێد لە ماوەیلیگ جیاجیا.
سەرچەوە: نۆڤوستی -
