نێچیروان بارزانی: ئابووری عراق و کوردستان تەواوکەر یەکترن و هویچ پێشبڕکێیگ لە ناوەینیان نیە.. کەرت تایبەت هاوبەشی ئاوهدانکردنە
شەفەق نیوز- سلێمانی
سەرۆک هەرێم کوردستان، نێچیروان بارزانی، ئمڕوو پەنجشەممە دووپات لە هەوەجەی فراوانکردن وەبەرهێنان و جوراوجویرکردن سەرچەوەیل داهات کرد، لە ری گورجکردن رۆڵ کەرت تایبەت لە هەرێم، وە باوەری لێواس ئابووری هەولێر تەواوکەر بەغداس و پێشبڕکێکەری نییە.
بارزانی لە وتاریگ لە وەخت وازکردن کارەیل لوتکەی ئابووریی ئەوزەڵداین و وەبەرهێنان لە پارێزگای سلێمانی پێشکەشی کرد، وت: "کەرت تایوەت هاوبەشی سەرەکییە لە ئاوهدانکردن هەرێم کوردستان و وەنواچگن و ئەوزەڵکردنی، و ئەو نواچگنە روی دایە هەوەجە وە فراوانبوین زیاتر لە مژار وەبەرهێنان دیرێد، و هابان شان ئیمە ژینگەی پوڕیاگ ئەرا وەبەرهێنان دابین بکەیمن".
دیاریکرد "لە ساڵەیل گوزەشتە بناغەی گونجیاگ بوی، وەخت ئەوە رەسیە گامیگ ئەرا ئابووریی بەرهەمدار و جوراوجویر بنەیمین ئەرا زیایکردن سەرمایە لە کەرتەیل پیشەسازی، گەشتوگوزار و بەرهەمهێنان ناوخۆیی".
سەرۆک هەرێم زەردەوام بوی و وت: "ئابووری عراق و هەرێم کوردستان تەواوکەر یەکترن و پێشبڕکێکار نین، هاز عراق لە هاز کوردستانە"، و دووپاتکرد لە هەوەجەی "رەسین وە هاوتەریبی لەبان گیچەڵ گومرک و باج، فراوانکردن هاوبەشییە ئابوورییەیل لە ناوەین عراق و هەرێم، تا کۆمپانیا کوردستانییەیل لە ناوچەیل ناوەڕاس و باشوور وڵات وە ئازادی کار بکەن، جویر خاوەنێتی و کارکردن کۆمپانیا عراقییەیل لە ناو هەرێم".
