"كوشتار هەڵەبجە"... ماوەی ٣٠ ساڵە ٤٠٠ مناڵ کورد لە ئيران بيسەروشوينن
شەفەق نیوز/ دويای زیاتر لە سێ دەیە لە کوشتارگەی هەڵەبجە، تا ئیسە چارەنویس نزیکەی 400 مناڵ عراق نادیارە، کە دویای کیمیاوارانکردن ئەو شارە لە ساڵ 1988 لەلایەن رژیم وەرین عراق ئەرا خەسەخانەیل ئیران کل کریانە.
لەبان رەدبوین ساڵەیلیگ، بەش فرەیگ لەو مناڵەیلە ئەرا میلکان خوەیان گلەو نەخواردنە، لەناو رەوشیگ پڕ لە نادیاری، لەناوەین کوشتن باوگ و داڵگەیلیان مەوقەی پەلامارەگە، یا ئیوتکردنیان لەلایەن بنەماڵە ئیرانیەیل.
حاجی ئاوات، یەکیگە لە رزگاربویەیل پەلامارەگە، بە ماڵپەڕی ئەلحورە، هوریدەکاری کارەسات لەدەسدان برا بویچگەگەی لەمەوقەی چگن ئەرا ئیران ئاشکرا کرد.
ئاوات وت: دویای ئەوەگ کیمیاواران کریایمن، پەن وە ژیرزەمینیگ بردیمن تا لە گورزەیل ئاسمانی رزگار بویمن، بەڵام بوویگ ئەڵاجەوی هەکاتی بوو سیف کردیمن، کە هیشت پەنایلە وەجی بیلیمن و وەرەو کویەیل هاوسنوور ئیران بوایمن.
وتیش: لە وەخت چارەسەرکردنی لە خەسەخانەیل ئیران، لە داڵگ و خوشکەیلی جیاوە کریا، ئیگا ئەرای دەرکەفت کە برا چوار ساڵانەگەی بیسەروشوین بویە.
وە قسەی لوقمان عەبدولقادر، سەرۆک کۆمەڵەی قوربانیەیل تونوتیژی کیمیایی لە هەڵەبجە، 119 مناڵ بیسەروشوێن لە کۆمەڵەگەیان توومار کریانە، بەڵام لە وەدویاچگن دەرکەفت کە بڕ گشتی شمارەیان رەسیەسە نزیکەی 400 مناڵ کە دویای پەلامارەگە ئاوارە بوین.
عەبدولقادر وتیش: وەگەرد بانگەوازە وەردەوامەیل ئەرا حکومەت عراق و دەسەڵاتدارەیل ئیران، لێکۆڵینەوە فەرمییەیل وسیانە.
لەلای خوەییش باخان فاتح خانمە چالاک ماف مرۆڤ ڕەخنە لە ریکارەیل مینەکردن مناڵە بیسەروشوینەیل گرد و دووپات لەوە کرد کە فرە لە خیزانە ئیرانییەیل خوازن ئەو مناڵەیلە ئەرا خیزانە ڕەسەنەیلیان گلەو بخوەن، بەڵام ریکارە یاساییە ئاڵووزەیل پرۆسەگە خاوەو کەن.
داوا لە حکومەت عراق کرد تەقەلایلی زیاتر بکەێد و ئاسانکاری ئەرا گلەوخواردن مناڵە گومابویەیل بکەێد، و دووپات لە گرنگی وەکارهاوردن نمونەی دی ئێن ئەی ئەرا هاوتاکردن ناسنامەی خیزانەیل کرد.
لە گامیگ گرنگ حکومەت هەرێم کوردستان دەسەیگ تایبەتمەن دروس کرد ئەرا وەدویاچگن لە فایل مناڵە بیسەروشوینەیل، وە هەماهەنگی وەرد دەسەڵاتدارەیل ئیران.
عەبدوڵڵای حاجی مەحمود، وەزیر شەهیدان و ئەنفالکریاگەیل لە حکومەت هەرێم کوردستان راگەیان کە وەگەرد کونسوڵخانەی ئیران باس ئەو پرسە کەن، دووپاتیش کرد کە پرۆسەکە وەگەرد ئاستەنگەیل هابان ری راس.
وەگەرد تەقەلا وەردەوامەیل، چارەنویس فرەیگ لە مناڵەیل لە ئیران نادیارە، لە وەختیگ رزگاربویەیل سەرسام بوین لەو دادپەروەرییە کە لە زویەو چەوەڕیی کەن.
لە وەختیگ بەشیگیان تەقەلای گلەوخواردن ئەرا ماڵەیلیان دەن، بەڵام هیمان بەش فرەیگیان وەدەس زەخمەیل جارانی ناڵن، تەنانەت وەگەرد نزیکەوبوین یاد ٣٣ ساڵەی ئەو پەلامارە کە زیاتر لە پەنج هەزار هاوڵاتی مەدەنی لەناوی کوشیا.
