دهۆک وەتەواوی کپە.. جادەیل شارەگە چووڵ نە مەردم و نەیش ماشین.. (وینە)
شەفەق نیوز/ دەسەڵاتدارەیل ناوخوەیی لە پارێزگای دهۆک لە هەرێم کوردستان، شەوەکی ئمڕوو چوارشەممە، قەیەغەی هامشوو گشتگیری چەسپاننن لە چوارچیوەی ریکارەیل دەسکردن وە پڕۆسەی سەرژماری دانیشتگەیل گشتی کە لە گشت پارێزگایل عراق.
کامیرای ئاژانس شەفەق نیوز وینەی جادە چووڵەیل دهۆک گردن کە ریوار و ماشین لەناویان نییە، کە شارەگە وە تەواوی کپ و بیدەنگ دیار بوی.
سەرچەوەیل ناوخوەیی ئەرا ئاژانس شەفەق نیوز دووپات کردن کە "هیزە ئەمنییەیل خاڵ وەشکین لە دەروازەیل وەناوهاتن شارەگە و لەناو گەڕەکەیل دانانە ئەرا دڵنیابوبن لە پابەندبوین وە قەیەغەکردنەگە و ریگریکردن لە هەر سەرپێچییگ کە هاتێ بوودە ریگر لە کارکردن تیمەیل سەرژماری".
دەسەڵاتدارەیل دووپات لە "گرنگی ئی ریکارەیلە کردن ئەرا دڵنیابوین لەوە کە پرۆسەگە وە شیوەیگ رێک و پێک و هویرد وەڕیەو چوود، چوینکە تیمەیل سەرژماری ژینگەیگ بیوەی خوازن ئەرا ئاسانکاریکردن ئەرکەیلیان".
ساعەت 12:00 شەو سێشەممە - چوارشەممە، قەیەغەی هامشوو لە گشت پارێزگایل عراق کەفتە ئاست جیوەجیکردن، جویر ئامادەکارییگ ئەرا سەرژماری گشتی دانیشتگەیل.
وەگەرد سەرژمارییەگە باری ئامادەباشی (ج) ئەرا هیزە ئەمنی و سەربازییەیل عراقە.
قەیەغەکردنەگە هامشوو مەردم و ماسین و قەتار لە ناوەین پارێزگایل و قەزا و ناحیەیل و لە ناوەین شار و ئاوایەیل و لە ناوەین ناحیە ئەرا قەزا و سنووردار کەێد، بیجگە لە کارەیل مرۆیی و گرنگییگ تایبەت.
