کوشیان کەسیگ لەناو وەردەوەردەیگ چەکدار و دەسگیرکردن کەسەیلیگ وە توومەت سەنین کارتەیل هەڵوژاردن
شەفەق نيوز- بەغداد
سەرچەوەیگ ئەمنی، ئمڕوو شەممە، خەوەردا لە کوشیان کەسیگ لەناو وەردەوەردەیگ چەکدار لە باکوور بەغداد، لە وەختیگ ئاسایش نیشتمانی کەسەیلیگ و توومەت سەنین کارتەیل هەڵوژاردن و دڕانن وینەی کاندیدەیل دەسگیر کرد.
سەرچەوەگە ئەرا ئاژانس شەفەق نیوز وت: مرافەیگ لە ناوچەی حسێنیە لە باکوور بەغداد کەفتە ناوەین دوو کەس.
وتیش: مدووەیل ئەو وەردەوەردە نەزانیاس وەلێ رەسیە وەکارهاوردن چەک سووک، و بویە مدوو کوشیان یەکیگیان، وئەوەکە وەرەو شوین نادیاریگ وایە.
لەلاییگ ترەک، دەسەی باڵای هەڵوژاردن لە بەیاننامەیگ رەسیە ئاژانس شەفەق نیوز دووپات کرد کە لە چوارچیوەی ئەرکەیل مسۆگەرکردن ئاسایش و بیوەیی کار هوڵوژاردن، و جیوەجیکردن رینمایەیل کەسەی ئەمنی باڵای هەڵوژاردن پەرلەمان، مەفرەزەیل دەزگای ئاسایش نیشتمانی لەی رووژەیل گوزەشتە، ئۆپراسیۆنەیل خەسیگ جیوەجی کردن، رەسیە ئەنجام دەسگیرکردن بڕیگ کەس وە توومەت سەنین کارتەیل هەڵوژاردن و دڕانن وینەی کاندیدەیل لە چەن ناوچەیگ.
وتیش: ریکارەیل یاسایی وەرانوەریان جیوەجی کریا، و تەقەلایەیل هەواڵگری و مەیدانی وەردەوامن لە وەشوینکەفتن هەر رەفتاریگ نایاسایی دژوە هەڵەژاردو لە پلانیگ گشتگیر ئەرا مسۆگەرکردن پابەندبوین وە رینما و یاسایەیل.
