نەینەوا.. دراوردن تەرم پیاییگ خنکیاگ و دەسگیرکردن 3 کەس وەتوومەت دزیکردن
شەفەق نيوز- نەینەوا
سەرچەوەیگ ئەمنی لە نەینەوا، ئمڕوو جمعە، خەوەردا لە دراوردن پیاییگ مەوقەی مەلەوانیکردن لە پڕۆژەیگ ئاوی خنکیاس، و پولیس سێ کوڕ ناخاڵە دەسگیر کرد وە توومەت دزیکردن بان مەنهۆڵەیل لە شار موسڵ.
سەرچەوەگە ئەرا ئاژانس شەفەق نیوز وت: فەرمانگەی پزشک دادوەری لە موسڵ تەرم پیاییگ وەرگرد مەوقەی مەلەوانیکردن لە پڕۆژەی ئاو رەشیدیە لە باکوور شارەگە خنکیاس.
دیاری کرد کە تیمەیل رزگارکردن و هاوکاری مەفرەزەیل پولیس توەنستن تەرم ئەو پیاوە درارن، دیاری کرد کە پیاوەگە هاتیە لەناو ئەو پڕۆژە مەلەوانی بکەێد کە ئەرا مەلەوانی نەکریاس.
سەرچەوەگە دیاری کرد کە لێکۆڵینەوە ئەرا رەسین وە بندروس رویداوەگە واز کریا، و تەرمەگە دریا دەس خاوەنی.
لەلاییگ ترەک، سەرچەوەیگ لە پولیس نەینەوا ئەرا ئاژانس شەفەق نیوز وت: هیزیگ لە وەڕیەوبەرایەتی دژە تاوان ئەبی تەمام سێ کوڕ ناخاڵە دەسگیر کرد کە چشتەیل ئاسن و بان مەنهۆڵەیل لە گەڕەک موهەندسین لەلای چەپ موسڵ دزینە.
دیاری کرد کە ئەو کوڕەیلە لە گەڕەک تەنەک لەلای راس شارەگە گریانە، دویای وەشوینکەفتن جموجویلیان، وتیش: لە هەفتەی گوزەشتە لەناو سۆشیال میدیا پارچە ڤیدیۆ بڵاو بوی نشان دەێد توومەتبارەیل وە عەروانەی ئەسپیگەو لەناو چەن شوینیگ لە موسڵ گەردن، و ئەو چشتەیلە لەوەردەم ماڵەیل دزن.
سەرچەوەگە دیاری کرد کە توومەتبارەیل دریانە کەس لایەنەیل پەیوەندیدار ئەرا تەواوکردن ریکارەیل یاسایی.
