نەتەوە یەکگرتگەیل بەرزەوبوین وەرچەویگ لە تیژی هەڵکردن خوەڵوتووز لە عراق توومار کەێد

شەفەق نيوز- بەغداد 

نەتەوە یەکگرتگەیل، ئمڕوو شەممە، بەیاننامەیگ بڵاو کرد، لەناوی باس بەرزەوبوین تیژیگ لە هەڵکردن خوەڵوتووز لە عراق لە ماوەی ئی ساڵەیل دویاییە کرد.

نەتەوە یەکگرتگەیل لە بەیاننامەیگ رەسیە ئاژانس شەفەق نیوز وت: شیوە و تیژی ئی خوەڵوتووزەیلە لەی ناوچە لەی ساڵەیل دویاییە وەشیوەی وەرچەویگ بەرزەو بوی، و بویە خاوەن کاریگەریە نیگەرانکەرەیل لەبان تەندروسی و ژینگە و ئابووری، و لەبان ژیان مەردم لە چەن دەوڵەتەیگ لە ناوچەگە.

 وتیش: هەرچەن بویەسە دیاردەی باویگ، وەلێ ئەوە نییە کە جویر کاریگ چەسپیاگ لەلی رازی بویمن، وەلێ بایەسە چشتیگ وەگەردی بکەیمن، و بکەفیمنە جویلە ئەرا نواگیریکردنی وە گامەیلیگ کارا و هاوبەش ئەرا سنووردارکردن کاریگەرە بەدەیلی، ئەوەیش وەو بەرنامەیلە کە پاڵپشتی لە کشتوکاڵی و ئاویاری هەمیشەیی و زیرەک کەن، و کاڵین دارەیلیگ فرەتر، و هوشیاریکردن مەردم، کە هاتێ ئەو تەقەلایلە کەمن، وەلێ گرنگن، و توەنێد جیاوازییگ راسگانی دروس بکەێد ئەگەر ویەکەو وەپییان پابەند بویمن.

    لە بەیاننامەگە وتیش: لەی رووژ ناودەوڵەتیە ئەرا نواگیریکردن زریانەیل تەپوتووز، کە نەتەوە یەکگرتگەیل لە 12ی تەمموز لە هەر ساڵیگ یادی کەێد، با دووارەی پابەندیی گشتمان وە نواگیریکردن ئی دیاردە بکەیمن، و هاوکاری بکەیمن ئەرا بەرژەوەنی گەلەیل ناوچەگە، با گامەیلمان، هەرچەنبگ بویچگیش بوون، بوونە سەرەتایگ ئەرا ئاڵشتکردنیگ گەورەتر، کە مقیەتی تەندروسی و ژینگە و زەویمان بکەێد.

   نەتەوە یەکگرتگەیل لە بەیاننامەگەی وتیش: ئەوەسا وەردەوام بوود لە پشتگیریکردن عراق لە تەقەلایلی ئەرا نواگیریکردن ئی سەختیەیلە.

 نوێنەرایەتی هەمیشەیی کۆمار عراق لەلای نەتەوە یەکگرتگەیل لە نیویۆرک، وە هاوکاری وەرد دەسەی نەتەوە یەکگرتگەیل ئابووری و کۆمەڵایەتی ئەرا خوەرئاوای ئاسیا "ئیسكوا"، رووژ چوارشەممەی گوزەشتە، گردەوبوینیگ هەماهەنگی عەرەبی پایەبەرز ڕێک خست، لە ئامادەکاری ئەرا دوو کۆنفرانس ئاو و خوەڵوتووز لەو ریخریاگ نەتەوەییە.