مەزەنە کریەێد لەوەر بەرزەوبوین گەرمی بویە.. سزیان سێ ماشین لە کەرکوک

شەفەق نيوز – كەركوك 

سەرچەوەیگ ناوخوەیی لە پارێزگای کەرکوک، ئمڕوو شەممە، خەوەردا لە سزیان سێ ماشین لە ماوەی ساعەتەیل گوزەشتە، لە ئەنجام بەرزەوبوین پلەی گەرمی، لە رویداوەیلیگ جیاجیا لە پارێزگاگە و دەورگردی.

سەرچەوەگە ئەرا ئاژانس شەفەق نیوز وت: یەمەن رویداو لەناو شار کەرکوک بوی، کە دوو ماشین لە ئەنجام شۆرتیگ کارەبا، مەزەنە کریەێد لە ئەنجام بەرزەوبوین فرەی پلەی گەرمی هات، کە رەسیە کڕ 50 پلەی سەدی لە بەشیگ لە ناوچەیل.

وتیش: دویەم رویداو لەبان ری ناوەین کەرکوک و موسڵ بوی، کە ئاگر لەناو ماشینیگ کارگەی کیا کوڵپە کرد کە چشتەیل بازرگانی بار کردوێد، کە گشتی وەتەواوی سزیا، وتیش: هیزیگ لە سوپای عراق رەسینە شوینەگە، تا نەیلن ئاگر بڕەسێدە ئەو ماشینەیل ترەک لەبان جادەگە.