حزبەیل کوردی لە دیالە رازی نیین وە بڕیار ئاڵشتگردن "قره تەپە" لە ناحیە ئەرا قەزا
شەفەق نيوز- ديالە
حزبە کوردەیل لە پارێزگای دیالە، ئمڕوو سێشەممە، گردەوبوین فراوانیگ لەناو مەڵبەند رێکخستن یەکێتی نیشتمانی کوردستان لە خانەقین ئەنجام دان، وە ئامادەبوین وەرپرسەیل و نوینەر حزبەیل کوردی لە ناوچەیل پارێزگاگە، وەگەرد وەرپرسەیل ئیدارەی گەرمیان، ئەرا باسکردن لە بڕیار حکومەت فیدراڵی لەباوەت ئاڵشتکردن ناحیەی قەرەتەپە ئەرا قەزا، و چگن چەن ناحیەیگ لە قەزای خانەقین ئەرا ناو ئەو قەزای نووە.
سەرچەوەیگ لەناو ئەو گردەوبوینە ئەرا ئاژانس شەفەق نیوز دووپات کرد کە لە گردەوبوینەگە رەتکردن تونیان لەبان ئی بڕیارە ئاشکرا کردن، و وە بڕیاریگ سیاسی زانستنەی کە بویین کورد کەێدە ئامانج، و خوازێد یەکەی ئیداری ناوچەی خانەقین کەمەو بکەێد.
سەرچەوەگە دیاری کرد کە لە گردەوبوینەگە دووپات کردن کە بڕیارەگە دەستوور عراق شکنێد، وەتایبەت مادەی (140) کە ئوبشێد ناوچەیل خانەقین و قەرەتەپە و کۆکس لە ناوچەیل دابڕیاگن، کە بایەسە وە گامەیل یاسایی و دەستووریەو رەد بوون وەرجە بڕیاردان لە چارەنویس ئیدارییان.
سەرچەوەگە وتیش: کەسەیل ناو گردەوبوینەگە ئەو بڕیار وە شکانن ئاشکرایگ ئەرا دەسەڵاتەیل ئیداری دانانە، وتنیش؛ ناحیەی کۆکس، ئەرا نموونە، لە روی ئیداری کەفێدە یان گەرمیان و حکومەت هەرێم کوردستان لە ساڵ 2003ەو، و ئی بڕیار نووە لە وەزارەت پلانسازی عراق خوازێد بخەێدەی بان قەرەتەپە.
لە گردەوبوینەگە رێککەفتن لەبان رەتکردن ئەو بڕیارە وەشیوەیگ یەکجاری، و ئەوەسا وە گشت ریەیل یاسایی و دەستووری و جەماوەری چن ئەرا نەهیشتن جیوەجیکردنی، دووپاتیش کردن کە ئەو بڕیارە نیەنووڕێدە راسگانی ئیداری و نیشتەجیی ناوچەگە، و کەفێدە بەرژەوەنی ئاڵشتکردنەیل سیاسی رەتکریاگ.
لە دوو تەمموز، وەزارەت پلانسازی عراق، راگەیان کە محمد عەلی تەمیم جیگر سەرۆک ئەنجومەن وەزیرەیل و وەزیر پلانسازی واژوو لەبان نووەوکردن قەزای قەرەتەپە لە پارێزگای دیالە کرد.
