بازرگانیگ ناودەوڵەتی مادەی هووشبەر لەدویای دەسگیرکردنی تەقەلای خوەیکوشتن دەێد لە نەجەف
شەفەق نیوز ـ نەجەف/ ئەنبار
سەرچەوەیگ ئەمنی لە نەجەف، ئمڕوو پەنجشەممە، خەوەردا "بازرگانیگ ناودەوڵەتی مادەیهووشبەر" تەقەلای خوەیکوشتن دایە لەدویای دەسگیرکردن و زیندانیکردنی لە یەکیگ لە بنکەیل ئەمنی پارێزگاگە، لەهەمان وەخت پۆلیس ئەنبار 8 کەس وە توومەت نووشتە و جادوو دەسگیرکرد.
سەرچەوەگە وە ئاژانس شەفەق نیوز خەوەردا، توومەت داواکریایگ وەپای بڕگە مادەی 27 لەیاسای بەڕەنگاربوین مادەی هووشبەر و دەونیەیل شمارە 50 ساڵ 2017(ناودەوڵەتی) دەسگیرکریا لە قەزای مشخاب لە پارێزگای نەجەف.
سەرچەوەگە ئاشکرایکرد، "دەسوەسەرکریاگە زیندانیکریا لە یەکیگ لە بنکەیل پۆلیس مشخاب، و تەقەلای خوەیکوشتن دایە لەری کوتەشیشە شکیایگ ناو زیندانەگە" دیاریکرد " قورتارکریاس و ئەرا خەستەخانەی فێرکاری سەدر لە نەجەف کلکریا، دەسوەجی کلکریارە ژوور نەشتەرگەری تەندروسی ناجیگیر بویە".
لە پارێزگای ئەنباریش، فەرماندەی پۆلیس، هەشت کەس دەسگیرکریان وە؟توومەت کارەیل نووشتە و جادوو لەناو پارێزگاگە، لە چوارچمگ هەڵمەتیگ ئەمنی کە مەفرەزەی پۆلیس وە هەماهەنگی وەرد لایەنەپەیوەنیدارەیل ئەنجامی دانە.
فەرماندەیەگە لە بەیاننامەیگ رەسیە ئاژانس شەفەق نیوز دووپاتکرد، "ئۆپراسیۆنەگە لە چوارچمگ چەودێریکردن چالاکی سەرپیچیکەرەیل یاسا و بەها ئاینیەیل و ئاسایس کۆمەڵایەتی ئەنجامدریا" وتیش "توومەتبارەیل کەرەستەیل و کتاوەیلیگ وەپیان گیریا کە وە مەبەست نووشتە و جادوو وەکاری هاوردنە".
وتیش؛ "لێکۆڵینەوەیل سەرەتایی وەردەوامە وەرد توومەتبارەل، ئامادەکریەن تا ئەرا لایەنەیل دادوەری تایوەت کلبکریەن" هەوەجە کەێد هاوڵاتیەیل " خەوەر بیەن لە هەر چالاکیەیگ گومانلێکریاگ لەی چوارچمگە".
