پارێزگار ميسان ئەرا شەفەق نيوز: تەکان ئاو وەرەو گوڵەمەیل (ئەهوار) وسیاسەو و رخمان لە هشکەوبوینی چوود
شەفەق نيوز- ميسان
حەبیب فەرتووسی پارێزگار ميسان، ئمڕوو دووشەممە، دووپات کرد کە کەمئاوی لە گشت قەزا و ناحیەیل پارێزگاگە هەس، بیجگە وسیان تەکان ئاو وەرەو ئەهوار، و باس رخباریی کرد لە فەوتیان ماسیەیل.
فەرتووسی ئەرا ئاژانس شەفەق نیوز وت: کەمئاوی لە قەزا و ناحیەیل هەس، و رخباری گەورەیگ هەس لە هشکەوبوین گوڵەمەیل ئەهوار میسان.
وتیش: ئیمە رخمان لەوە چوود ماسیەیل ناو ئەهوار لە ئەنجام هشکەساڵی تویش فەوتیان بان.
وتیش: وەداخەو تەکان ئاو وەرەو ناو ئەهوار وسیا، و ئیرنگە یەی مەتر شەشپاڵوو وەناوی نیەزاێد.
جی باسە کە مورتەزا جەنوبی چالاکوان ژینگە لە میسان وەرجەیە لە قسەیلی ئەرا ئاژانس شەفەق نیوز هوشداری دا لە کارەساتیگ ژینگەیی و مرۆیی بەێد لە ئەهوار حوێزە، دویای ئەوە کە زیاتر لە 15 ئاوای، و چەمەیلیگ سەرەکی لە ناوچەگە هشکەو بوین، کە بویە مدوو مردارەوبوین فرەیگ لە گامیشەیل.
کۆمەڵگەیل ئاوایینشین تویش ئاڵشتبوین دیموگرافیا نیەن و ئاوارەبوبن و بارکردن لە ژیر زوور هشکەساڵی سەختیگ کە لە گشت ناوچەیل عراق سەختەو بوود، وەتایبەت لە باشوور وڵات، کە زەرد وە سامانەیل ئاژەڵ و ماسی رەسان، و نەختی زەوی بەدەو کرد، و کاریگەری بەدیگ لەبان سیستەم خوەراک و هاوسەنگی ژینگەیی لە ئاوایەیل داشت.
