مانگ خوین.. جەهان سوو سێشەممە چەوەڕی مانگیران تەواوی کەێد
شەفەق نیوز/ سوو سێشەممە، جەهان مانگیرانیگ تەواوی وەخوەی دوینێد، ک وە "مانگ خوین" ناسریاگە، و تا سێ ساڵ بانان دووارەو نیەوود، ک سوو بوودە دەرفەت دەگمەنیگ ئەرا نووڕینی.
یە دویەم مانگیران تەواویە لەی ساڵە، ک یەکەمەگە لە مانگ ئایار بوی، و دی تا ساڵ ٢٠٢٥ دووارەو نیەوود.
مانگیران تەواوی لە ناوچەیل ئەمریکای باکوور وەرجە شەفەق دیار دەێد، و هەرچەنی روی وەرەو ئەوپەڕ خوەرئاوا بکەێ، نووڕینەگەی خاسترەو بوود، و لە ئاسیا و ئوسترالیا و ئەو ناوچەیل زەریای ئارام دویای خوەرئاوابوین دیارە.
ئی مانگیران تەواویە لە ئەفریقا و دەوڵەتەیل خوەرهەڵات ناوڕاس و فرەی ئەوروپا دیار نییە، ک بایەتە تا ساڵ ٢٠٢٥ چەوەڕی بکەن.
وەگشتی نزیکەی ساعەت ونیمیگ ئەو مانگیرانە وەردەوام بوود، هەنای زەوی وەقەیبڕ لەناوبەین مانگ و خوەر رەد بوود.
مانگەگە وەشیوەی پورتقاڵێ وەرەو سوور دیار دەێد، ک تیکڵاییە لە رەنگ رووشنایی و خوەرئاوابوین خوەرەگە.
