٢٥ ساڵ زیندانی لەبان دوو خانمە رووژنامەنویس کە رووماڵ ناڕەزایەتییەیل مەهسا ئەمینی لە ئیران کردنە
2023-10-22T12:59:28+00:00
شەفەق نیوز/ دویای زیاتر لە ساڵیگ دەسگیرکردنیان لەبان پەیوەندی وەل ئەو ناڕەزایەتیەیلە کە ساڵ گوزەشتە لە ئیران رویدا، ئمڕوو یەکشەممە، دەزگای دادوەری ئیران سزای زیندانی لەبان ئەو دوو خانمە رووژنامەنویسە وە ناوەیل ئیلاهە محمدی و نیلۆفەر حەمیدی دەرکرد، وە یەکەو تا ٢٥ ساڵ.
رووژنامەی "هەم میهەن" ئیرانی بڵاو کرد کە رووژنامەنویس ئیلاهە محمدی، وە بوخت هاوکاریکردن وەل ئیدارەی ئەمریکا جویر "دەوڵەت دوژمن"، 12 ساڵ زیندانی لەبانی چەسپیا، و 5 ساڵ وە بوخت "گردەوبوین و هاوبەشیکردن لە سیخوڕی دژوە ئاسایش وڵات"، بیجگە لە ساڵیگ ترەک وە توومەت بەشداریکردن لە "چالاکی پرۆپاگەندە دژوە رژیم کۆمار ئیسلامی ئیران."
رووژنامەگە وتیش: رووژنامەنویس نیلۆفەر حەمیدی کەفتە وەر ١٣ ساڵ زیندان کە ٧ ساڵ وە بوخت “هاوکاری وەرد ئیدارەی ئەمریکا”، ٥ ساڵ وە توومەت “گردەوبوین و هاوکاری ئەرا ئەنجامدان تاوانیگ دژوە ئاسایش وڵات”، ساڵیگ زیندانی لەبان بەشداریکردن لە “چالاکی پرۆپاگەندە دژوە رژیم کۆمار ئیسلامی”.
لە مانگ ئایار ساڵ گوزەشتە یەکەم دانیشتن دادگاییکردن ئەو دوو خانمە رووژنامەنویس ئیرانییە وەڕیەو چگ.
