ئۆکرانیا: لەپەلاماریگ روسیا وەبان کاروانیگ مرۆیی 23 کوشیای لەلی کەفت
2022-09-30T08:19:22+00:00
شەفەق نیوز/ ئۆکرانیا، ئمڕوو جومعە، توومەتبار روسیا کرد وە پەلامارداین کاروانیگ مرۆیی لە ناوچەی زابورجیا (باشوور) ک وەلایەن روسیەیل داگیرکریاگە، لە ئەنجام 23 مەدەنی کوشیان ک چەوەڕێ دەسمیەتی مرۆیی بوین.
ئۆلکسەندەر ستارۆخ پارێزگار ناوچەی ئۆکرانی لەبان تلیگرام راگەیان، "دوژمن پەلاماریگ موشەکی کردیەس وەبان کاروانیگ مرۆیی مەدەنی، ک مەردمەگە رز بەساوین ئەرا چگنە ناو ناوچەیگ ک وە شیوەی وەختانە داگیرکریاگە ئەرا ئەوەگ بچنە لای کەسوکاریان و دەسمیەتی وەربگرن"، وتیش" 23 کوشیای و 28 زەخمدار هەس".
