ئەکتەریگ هیندی وەهووکاریگ ئەڵاجەوی دەسگیرکریا

شەفەق نیوز/ ئالوو ئارجون ئەکتەر هیندی،  لە شار حەیدەرئاباد دەستگیرکریا، لەدویای هەفتەیگ لە دەرکەفتنی لەبان قالی سوور نمایش فلیم پوشیا 2 کە ژنیگ لەناوی گیان لەدەسدا و کوڕەگەشی زەخمداربوی.

وەپای ماڵپەڕ Screen Daily، رویداوەگە لە سینەمایگ شار حەیدەرئاباد رویدایە، وەشیوەی لەناوکاو ئەکتەڕەگە دەرکەفێد لە شوینیگ ئاهەنگەگە یەیش قەڵەباڵغی دروسکەێد لە ئەنجام ژنیگ 35 ساڵان گیان لەدەسدەێد و کوڕە نۆ ساڵانەگەی زەخمداربوود.

 وەلایەن پۆلیسەو دۆسیەیگ لە دژ ئەکتەرەگە و تیم ئەمنی و وەڕێوەبەرایەتی شانۆگە توومارکریایە، یەیش دویای ئەوەگ وەلایەن کەسوکار ژنەگە داد توومارکریا.

دویای رویداوەگە ئەکتەرە هیندیەگە بڕیاردا بڕ 30 هەزار دۆلار وە خێزان ژنەگە بیەێد و ئەو بڕە پویلەی لە چارەسەر کوڕەگە خەرجکرێد گرێدە گەردن خوەی.