ئه‌نار
شه‌فه‌ق نیوز / ناهبید کوجاک – ئەرمینیا
بەو تا ئەناریگ بیەمە پید، دڵەگەی بکەرەو، وەگورەی گشت دانیگی ماچیگ بیە پیم، ئەگەر لەوە فرەتر بردم خودا بکەێد حەرامم بود.
- لاچو هەی شڕوشیت، گومان وباوەڕم وەخوەد پەشیمان کردید، وەگورەی هەر دانەیگ ماچیگ تواێد؟ یە لەکو بویە؟ وچوی بود؟
هەمیشە شیوەی ئەنار گریەدار بویە وە شارستانیەت خوەرهەڵات، ک نوێنەرایەتی سومبول روحییگ کەێد، تەنانەت لە لای سوفیەگان، و شایەت رەنگ بەڕماڵیش پەیوەندێێگ وە ئەنارەو داشتوید، سێرگی بارجانۆف لە فیلمەگانی ئەنار وەکارهاورد جوی سومبلیگ ئەرا دوسی هەمیشەیی، لە ( رەنگ ئەنار) و ( عاشق بیگانە) و جوی ئاماژەیگ ئەرا زەوی نەخت پڕ لە تویەم سوور، وپەیوەندی شارستانیەیل خوەرهەڵات ناوڕاس، جوی بەرجەستەیگ ئەرا یەکێتی گەردون.
ئەنار لەلای کۆمەڵگای ئازەری و ئەرمەنیەگان سومبول تەندروسی و تەمەن درویژی ودەوڵەمەنیە، ئەراوە ئەنار بویەسە لفانەی قالی لەفرەی کار هونەری وینەگردن وشێوەکاری لای هونەرمەند ئازەری ( تاریق ئەحمەدۆف) ک هیشت کارەیلی باڵبەس بونە ئی میوەی رەنگینە، ک باسی کەێد وە بەریگ ساحیر وخاوەن رەنگ جوان .
تٶیژەرەیل فرە لە باوەت سومبولبوین ئەنار قسیه‌كردن، تا رەسینە بڕیگ واتەی سومبول ئەنار لەلای میلەتەیل و ئاینەیل جوراوجور: نەمری، نووکردنەوەی زەویەیل، هاتنەوەی وەهار، هیوای قەیامەت، لەنووەو پەیابوین ئەویش تایبەت بوی وە خودایه‌یل داڵگ و دوسی و کشتوکاڵی، گردەو بوین خیزانەیل، ئایندەی خوەشی.
لە نەقشەیل فرعەونیەگان ئەنار دینەو ک سومبول تەندروسی بوی، وهەمیش لە لای یۆنانیەگان و بیزەنتینیەگان ئەنار دویریاوێد لە قەی پەڕو دڵنگەیلیان، ولەقەی ئاڵتوینیان، و ئەناریش خواردن نەختینەی خودایل ئۆلیمبۆس بوی، وەگورەی ئەفسانەگان.
لە چین هەمیش ئەنار لە پێشەنگ خوەراکه‌یل بوی لای ئاین بوزیەگان. با فرە دویرەو نەکەفیمن، ک لای کوردەیل خوەمان ئەنار سومبلیگە لە فلوکلۆر و لە گورانیەیل و لە نەوروز.
