ئامێر تلیگراف كەشتی تایتانیک له ژیر ئاو ده‌رارن
شەفەق نیوز/ دادگايه‌گ له ئەمریکا، موڵەتدا لەناو ئی هەفتە، وەئەنجامداین ئەرک هاوردنەوەی ئامێر تلیگرافەگێك ک لە مەوقەی خنکانن كەشتی وەناوبانگ تایتانیک ، هاوارەیل رزگارکردن رەوانە کردگە.
ژنە دادەور فیدڕاڵی، لە ولایەت ڤیرجینیای ئەمریکی، رەزامەنی دا لەبان داواکاری کۆمپانیای ( ئاڕ ئێم ئێس تایتانیک) ک خوازێد لەی تاوسانە ئامێر تلیگرافەگە دەربکەێد، ک مارکەگەی مارکۆنییە و ئەرزش مێژویی و روشنهویری وزانستی دیرێد، و کارەگە مقەیتی لە یاد دەور ١٥٠٠ کەس کەێد ك لە ساڵ ١٩١٢ لەناو كەشتەیگە مردن.
ئی کۆمپانیا وەرجەیە لە ساڵ ١٩٨٥ ، چەن ئۆپراسیۆنیگ ئەرا دەرکردن چشتەیلیگ لە جیماگەیه‌یل تایتانیک ئەنجام داگە ، وەلی تەنیا چشتەیل چویچیای لە بوشایی ناوبەین هەردوگ کوتە كەشتیەگە ده‌ر هاوردگە، و ساڵ ٢٠٠٠ دادوەر قەیەغە کرد لە بڕین جیماگ كەشتیەگە، ئەرا دەرکردن ئەڵماس لەناوی، بەڵکم ئی جارە دادوەرەگە فه‌رمان ده‌ركرد ك ئەو كاره ئەنجام بیەن تا بڕەسنە ئامێرەگە.
رۆژنامەی نیویۆرک تایمز نویسا ک کۆمپانیای ئاڕ ئێم ئێس تایتانیک هەوڵ دەێد لە کونایگه‌و بڕەسێدە ئامێرەگە وەبی بڕانن. تایتانیک گەوراترین كەشتی نه‌فه‌ر هه‌ڵگر لە جهان، لە ١٠ نیسان ١٩١٢ لە ساوتمبتون ئەنگیلتڕا دەرچگ لە یەکەمین کاروان روی کردە نیویۆرک، دا قەی کویەی یەخینیگ و غه‌رق بی. دەرهاوردن چشتەیلیگ لە جیماگەی بویە شوون قسەو باس فرەیگ، وه‌تایبەت لە لایەن توخمارەی قوربانیەگان، ک وتن كەشتیەگە بایەسە جوور پەیکەر یاد و قەورسان دانریەێد.
