هانوا گلەو بیەن و عراقنا دەرکەن
شەفەق نیوز/ پشت بەسین وە تەقەلایەیل خودی، دانشتگەیل شار نوو بەسمایە له به‌غدا ک ناسریاگە وە " شار خەونەیل"،داوای ئاڵشتکردن بارودۆخ واقیعی شارەگە کەن ک وە "تێکچوی" نووڕنەی، وەگەرد ئەوەگ کۆمپانیای "هانوا"ی کۆریای باشوور راگەیان وازهاوردیە لە جیوەجیکردن پرۆژەگە لەوەر وەرنەگردن شایستە دارایەیلی، یە "زەنگیگ رخبەر"بوی ئەرا دانشتگەیلی، و هیشت لە رووژ شەممە خوەینیشاندان بکەن ئەرا دوارە گلەوخواردن کۆمپانیاگە، وەگەرد داواکاریەیل نووترەک ک وەگەرد هەر خوەینیشاندانیگ ئەنجامدەن.
پویشیگ پشت حوشترەگە شکان
ئیحسان عەزیز یەکیگە لە رێکخەریگ خوەینیشاندانەگەی خەڵک بەسمایە ک وەگەردیان دەرچگە ئویشێد" راگەیانن دەرچگن کۆمپانیای "هانوا" لە شارەگە ئەو پویشە بوی ک پشت حوشتر شکنێد، دەرچگنی کارەسات راسییگە لەوەرانوەر ئی شارە ک دی نیاز تەواوکردنی نەیرێد، یا دەێدەی وە کۆمپانیەیل ناوخوەیی یا عەرەبی یا بیانیتر، لێرەوە کارەسات نوویگ دەسوەپی کەێد لەری جیاکاری لەمابەین شوقەگان لەبان بنەمای کۆمپانیای بونیاتکار ، وە دڵنیایەیو لێرە گرفت گەپیگ دروسکەێد ئەرا قازانج و نرخ فرووشتنی، یەیش هیلێد کۆمەڵگەگە دی گونجیاگ نەود ئەرا دانشتن".
(بەرێز ئیحسان) ئەو ناوەس ک لای دانشتگەیل شارەگە ناسریاگە وە ئاژانس شەفەق نیوز وت:" حیزبەیلیگ تەقەڵای وسانن ئی پرۆژە دانە لەوەر قازانجەیل خوەیان ک کۆمەڵگەی نیشتجیبوین لەناو شار بەغدا دیرن، ئی پرۆژە زەرەد گەپیگ بوی ئەرایان ک جیاوازی نرخ فروشتن شوقە لەی مه‌تری تەنیا (٦٠٠) دۆلارە، لەوانەیتر یەک مەتری رەسێدە نزیکەی (١٣٠٠) دۆلار، هەر لەوەر بەرژەوەنی ئابووری حزبەیل وە خوازین پرۆژەی بەسمایە بوسنن تا هاوڵاتیەل ناچار بوون شوقەی نیشتەجیبوین لەناو پایتەخت بسینن".
بەرێز ئحسان وتیش" کەموکوڵیی ئاشکەرایگ هەس لە دەسەی بەرهەمهاوردن و نوسینگەی وەدویاچگن ناو شار، خوەم نزیکەی چوار جار چەوم کەفتیەس وە نوێنەرەیل شمارەیگ بینا و وەڕیوبەر دەسەی بەرهەمهاوردن سوها نەجار، و داوا لەلی کردیمن نوسینگەی وە دویاچگن و کۆمپانیای خزمه‌تگوزاری عراقنا ئاڵشتبکەێد ک وە شیوەی (جۆین) کار کەێد، باوجی قسەیلی تەنیا پەیمانە و لە بانان جیوەجی نیەکەێد ، وتیش" لە داواکاریەیل ئمڕوومان لەکارخستن خود سوها ناجار سەرۆک دەسەگەس".
مانگ و وەهار
هەمیش باوگ موستەفا یەکیگ لە خوەنیشاندەیل وت" لە گرنگترین داواکاریەل ئمڕوو گلەوخواردن کۆمپانیای" هانوا"ی کۆریە ئەرا تەواوکردن کارەیلیان لە شارەگە و دەرکردن کۆمپانیای عراقناس لە خزمەتکردن، و بیناکردن خەسخانەیگ ئەرا دانشتگەیل بسمایە ک رێژەی دانشتگەیلی رەسیەس وە ٨٠ هەزار کەس، جویر دەسەی بەرهەمهاوردن جارانی وازکردن دو بنکەی تەندروسی لە شار بەسمایەی راگەیانوێد، باوجی تا ئیسە ئی بنکەش نوینەرایەتی خواستەیلمان نیەکەێد و دەسەگە تا ئیسە وازی نەکردیە، هەمیش داوای شوینەیل وەخت وەسەربردن کەیمن ئەرا دانشتگەیل چوینکە دانشتگەیل دویرن لە ناوەند پایتەخت، بایەت هەر چشتیگ جی رەزامەنی دانشتگەیل بوود جیوەجی بکریەێد".
باوگ موستەفا وە ئاژانس شەفەق نیوز وت" لەسەرەتای گرێبەسیەگەمان وەگەرد دەسەی سەنین شوقەی نیشتەجیبوین بەسمایە وتن شارەگە کەنە (مانگ و وەهار) و خەوەردارمان کردن ئەوڕیە ک وە بەغدا بەسێدەوەی تەواویکەن و دەستەوەر گشت چشتیگ کەن ک وازباریمن لە سەنین لە شوینەیلتر، هەمیش داوای بانکیگ لەناو شارەگە کەیمن ئەرا ئەو قیست مانگانەیل داواکریایمان لەجیای ئەوەگ رییگ بوڕیمن ئەرا ناوەند شار بەغدا ئەرا رادەسکردنی، ئی رێکارە ئاسانکاری کەێد ئەرا دەسەگە و پرۆسەی داین قیستەیل دانشتگەیل".
ئەبو موستەفا وتیش:"چەو وەپیکەفتن وەگەرد سەرۆک دەسەی بەرهەمهاوردن و وەرپرس نوسینگەی وەدویاچگن و تەنانەت کۆمپانیای عراقنا کریایە لەخاتر خاسترەوکردن بارودۆخ خزمەتگوزاری شارەگە، باوجی جواوەیلیان(خوەیدزینەوە و قسەس وەبی جیوەجیکردن)" ، لە قەسەیلی پرسیار کرد" ئەڕا چە پویل خزمەتگوزاری دەێمنە کۆمپانیای عراقنا ک ئەوان نە گناڵەیلە بەرزەوکەن نە ئاو باخچەیلە دەن، ک لەئەنجام نەبوین وە دویاچگن راستەقینە بویە".
پیاوەگە وتیش "خوەینیشاندانەیل مینێد و وەردەوامە و یە تەنیا ئامرازیگە ئەرا رەسانن دەنگ مەردم بەسمایە ئەرا گووش لایەنەیل دیاریکریاگ، ئیمە زەرەرمەند بویمنە لەی کارە، و بایەتە وەردەوام بویمن لە خوینیشاندان چوینکە لە راسی هویچ ئاڵشتکاریگ نەیمنە بارودۆخ شارەگە لە گەنەو ئەرا گەنتر چوود".
جیاوازی: ئەوەگ خوازیمنەی دەرچگ و ئەوەگ نیەتوایمنەی مەنییە
دانشتگیگتر لە شار بەسمایە ئاشکەرا کەێد" خوەێنیشاندانەگەی ئمڕوو دیرێد زوور خەێدە بان دەسەی بەرهەمهاوردن و ورپرس نوسینگەی چەودێری، گشت ئەوانەگ پەیوەندی وەپیان دیرێد جاریگتر داوای گلەوخواردن "هانوا" کەن، تایبەتمەندیەیل شارەگە نیەمینێد وەگەرد دەرچگن کۆمپانیاگە وە شیوەی فەرمی".
هاوڵاتییگ ک هەم وە باوگ موستەفا ناسریاگە وە ئاژانس شەفەق نیوز وت" ئیرەنگە شارەگە چە وەسەر بارودۆخی تیەێد ئەگەر کۆمپانیاگە دەرچوود وەبی پیلانیگ ئەرا بانان،"، وتیش،" داواکاریمن کۆمپانیای عراقنا لە شارەگە دەرچوود و ئاڵشتبکریەێد، سەرۆک وەرین دەسەگە ئاڵشتکریا باوجی تا ئیسە وەشیوەی کرداری جیوەجی نەکریایە".
هەمیش یەکیگ لە دانشتگەیل شارەگە باوگ تەها جیاوازی لە مابەین بارودۆخ بەسمایە وەگەرد بارودۆخ هەر کۆمەڵگەیگ نیشتەجیبوینیگتر کەێد لە ناو و دەێشت عراق".
هاوڵاتیەگە وە ئاژانس شەفەق نیوز وت" ئەگەر تیبینی هەر کۆمەڵگەیگتر لەناو عراق، و لە هەرێم کوردستان بکەێد جویر ئەوەس لە وڵاتیگ عەرەبیتر بوێ جویر میسر یا هەر وڵاتیگ چوینکە خزمەتگوزاریەگانیان تەواوە، پەیوەندیگ لەمابەین کۆمەڵگەگە و ناوەن شارەگە هەس، وە راسی گرنگی وە دانشتگەیلیان دریەێد ئەوەگ خوازیایە دەستەبەری کەن، باوجی لەیرە کەم تەرخەمی لە بارودۆخ شارەگە هەس"، وتیش" بەڵگەیش ئەرای وەردەوامبوین ئی خوەینیشاندانەس، جویر ئەوەگ شار خەونەیل ک ئاوات وەپی خواستبویمن دی وەو جویرە نییە، هیوا دیریمن ئاراستەی خوەینیشاندانەیل راس بکەیمن".
هاوڵاتی داڵگ باقر ئاشکەرایکرد "جیاواز کۆمیدی نییە" ئەرا هاوڵاتیەیل بەسمایە ک وەشیوەی وەردەوام خوەینیشاندان کەن ئەرا خاسترەوکردن بارودۆخ شارەگەیان.
خانمەگە وە ئاژانس شەفەق نیوز وت" لە کۆمیدیەیل دەرچگن کۆمپانیای هانواس وەگەرد داواکاریەیل مەردم بەسمایە ئەرا گلەوخواردنی و دوارە کارکردنی لەناو شارەگە، لەوەختیگ کۆمپانیای عراقنا مەنەو و ک مەردمشارەگە داواکەن دەربچێد ک تەقەلایگ خزمەتگوزاری ئاشکەرایگ لەناو شار خەونەگان نیەیرن.
بەڵگەنامەی داواکاری مەردم بەسمایە
وەپای ئەو بەڵگەنامە لەری خوەینیشاندەرەیل شار بەسمایە کەفتە دەس ئاژانس شەفەق نیوز، ک ئەرا هەر یەک لە سەرۆکایەت ئەنجومەن نوێنەرەیل و سەرۆک وەزیرەیل بەرزیەوکردنە 15 داواکاریلە خوەی گرێد لە گرنگترینیان" گلەوخواردن کۆمپانیای "هانوا"س لاوردن سەرۆک دەسەی بەرهەمهاوردن، کۆتایهاوردن وە گرێبەسیەگەی کۆمپانیای خزمەتگوزاری عراقنا و زوی رادەسکردن شوقەیل نیشتەجیبوین وە ئەو کەسەیلە ک لە گوزەشتە گرێبەسی سەنین ئەنجامدانە، گرنگیدان وە سیستەم کلکردن ئاو چوینکە ئاوەگەی ئیسە وەگورەی بەڵگەنامەی داواکاریەیل، ئەرا وەکارهاوردن گونجیاگ نییە".
دەسپاکی پەرلەمان و دەسەی بەرهەمهاوردن
دەسەی دەسپاکی و بەرهەمهاوردن پەرلەمان عراق، رووژ شەممە، دەسکردنە واژوو جەمەوکردن ئەرا دەسکیشانەوەی سوها نەجار سەرۆک دەسەی وەبەرهێنان هاوڵاتیەیل.
پەرلەمانتار هادی سەلامی ئەندام لە لیژنەی دەسپاکی، لە بەیانیگ رەسیە ئاژانس شەفەق نیوز راگەیان، وەگەرد پەرلەمانتار حەسەن خەفاجی ئەندام لە لیژنەی بەرهەمهاوردن دەسکردیمنە وە واژوو جەمەوکردن ئەرا دەسلەکار کیشانەوەی سوها نەجار سەرۆک دەسەی بەرهەمهاوردن هاوڵاتیەیل ، لەوەر گەندەلی و وە فیرۆدان سامان گشتی و کارەیل نایاسایی، وتیش تا ئیسە 75 واژوو جەمەوکردنە.
هەردگ پەلەمانتارەگە دووپاتکردنە لەوەگ فایلەگەی ئەرا دەسەی دەسپاکی و دادوەر لێکۆڵەر دەسپاکی کلکریەێد ئەرا یەکلایکردن دۆسیەی گەندەڵی.
جیگیر یەکەم سەرۆک ئەنجومەن پەرلەمان موحسن مەندەلاوی لە رووژ چوارشەممەی گوزەشتە راگەیان، دەسەیگ ئەرا دەرخستن راسیەگان دەسەی بەرهەمهاوردن دروس کریایە، گەناوڵیەگان ناو دەسەگە وە "بی وینە" وەسف کرد.
ئیە هاوکاتە وەگەرد خوەینیشاندانەیلە ک دانشتگەیل کۆمەڵگەی نیشتەجیبوین بەسمایە لە بەغدا رێکیخستنە، خوەینشاندان کردن لەبان سیاسەت دەسەی بەرهەمهاوردن ک هوکاریگ بوی ئەرا ئەوەگ کۆمپانیای "هانوا"ی کۆری لە تەواوکردن پرۆژەی نیشتەجیبوین خوەی بکیشێدەو، ک یەکەم و خاسترین یەکەی نیشتەجیبوینە لە عراق ک لە ساڵ 2012ەوە دەسکردنەس وە کار کردن.
