نێچیروان بارزانی و سەرۆک وەزیرەیل ئەرمینیا باس وەهێزکردن دەسمیەتی هاوبەش کەن

شەفەق نیوز- ئانتالیا

سەرۆک هەرێم کوردستان نێچیروان بارزانی، و سەرۆک وەزیرەیل ئەرمینیا نیکۆڵ پاشینیان، ئمڕوو پەنجشەممە، باس وەهێزکردن هاوکاری هاوبەش لە ناوەین ئەرمینیا و عراق و هەرێم کردن.

لە بەیاننامەیگ سەرۆکایەتی هەرێم رەسیە ئاژانس شەفەق نیوز دیاری کرد، بارزانی لە پەراوێز کارەیل لووتکەی کەشوهەوا کە لە شار ئانتالیای تورکیا بەسریاگە، وەگەرد سەرۆک وەزیرەیل ئەرمینیا کووەو بوی و لە ماوەی دیدارەگە باس پەیوەنیەیل ئەرمینیا وەگەرد عراق و هەرێم کوردستان، و فراوانکردن ئاسۆیەیل دەسمیەتی و هەماهەنگی هاوبەش لە مژارەیل جیاجیا کریا.

هەمیش هەر دوو لایەن هویڕوڕا ئاڵشتکردن لەباوەت پێشهاتەیل بارودۆخ ناوچەگە، و دووپات لە گرنگی خەسەوکردن تەقەلایل کردن ئەرا چارەسەرکردن گیچەڵ و قەیرانەیل وە ریەیل ئاشتییانە و دیپلۆماسی، وە جۊریگ پاراستن ئاسایش و سەقامگیری لە ناوچەگە مسۆگەر بکەێد.

سەرۆک هەرێم کوردستان نێچیروان بارزانی، ئێوارەی پێرەکە سێشەممە، وە بانگهێشتنامەیگ فەرمی وەلایەن سەرۆک تورکیا ڕەجەب تەیب ئەردۆغان، رەسیە شار ئانتاڵیا ئەرا بەشداریکردن لە کۆنگرەی 31 لایەنەیل لە رێککەفتننامەی نەتەوەیل یەکگرتگ لەباوەت ئاڵشتبوین کەشوهەوا.