سایتیگ جەهانی: شمارەی دانیشتگەیل عراق لە ساڵ ٢٠٢٢ لە ٤٤ مەلیۆن کەس ئەوبانە
شەفەق نیوز/ سایت World Population Review ئەمریکی ک تایبەتمەنە وە هەژمار دانیشتگی، ئاشکرا کرد ک دانیشتگەیل عراق لە ساڵ ٢٠٢٢ لە ٤٤ مەلیۆن کەس رەد کەێد، وتیش: زیایکردن دانیشتگی لە عراق لە کۆتایی سەدەگە رەسێدە زیاتر لە ١٠٧ مەلیۆن کەس.
سایتەگە لە راپۆرتیگ ئاژانس شەفەق نیوز لەلی ئاگادارە وت: وەگورەی مەزەنە، هەژمار دانیشتگەیل عراق ئیرنگە رەسێدە ٤٤،٨٦٥،٧٠٢ کەس ئەرا ساڵ ٢٠٠٢، و دیاری کرد ک مەزەنەی شمارەی دانیشتگەیل عراق وەگورەی نەتەوە یەکگرتگەیل لە تەمووز گوزەشتە رەسیە ٤٤،٤٩٧،١٢٢ کەس.
وتیش: شمارەی دانیشتگەیل عراق ئەوەسا تا کۆتایی سەدەگە هەر وەردەوام بوود، تا کۆتایی ساڵ ٢٠٨٥ لە ١٠٠ مەلیۆن کەس رەد کەێد، و مەزەنە هەس لە کۆتایی سەدەگە هەژمار دانیشتگەیل عراق بڕەسێدە ١٠٧،٣٣ مەلیۆن کەس.
وتیش: زیایکردن دانیشتگی لە عراق ئیسە رەسێدە ریژەی ٢،٣٢% لە ساڵیگ، ک ئەوەیش هەر ساڵێک کەمیگ لە یەک مەلیۆن کەس کەمتر زیایەو کەێد، وتیش: ریژەی لەداڵگبوین رووژانە رەسێدە ٣،٢٩٤ مناڵ لە رووژیگ، و ریژەی مردن رەسێدە ٥٤٠ کەس لە رووژیگ.
وتیش؛ لەبان ئەو نائارامیە لە عراق، ک ئاست مردن و ئاوارەیی بەرزەو کرد، هەمیش دانیشتگەیل هانە زیایبوین، و ئەوەیش چوودەو ئەرا ئاست توانای زاوزویکردن لە عراق ک رەسێدە ٣،٥٨٨ لەداڵگبوین ئەرا هەر ژنیگ، و داوەزین ئاست مردن مناڵەیل، وتیش: ریژەی زاوزویکردن هالە داوەزین وەگەرد ئەوە ک ژنەیل زیاتر دەرفەت خوەنەواری و پیشەیی کەفێدە دەسیان.
