لە رووژ جەهانی ژن .. هیمان ژن هاژیر ستەم
کەنعان موڕاد/ نیمەی شەوە، و پیاوەگە شەکەت کارە، بایەتە تیر بخەفێد، ژنەگە دڵنگ زاڕووەیلە شووردیە، و چشتەیل ناوماڵەگەی تەمیس کردیە، و خواردن شام ئەرا گشتی دروس کردیە، و گشتی تیر خواردنە، و کتاوەیل مەکتەو مناڵەیلە خستیەسە شۊن خوەی، و ئیسە ئەویش دۊای ئەو مەینەتە، چەوی چیەسە خەو، باوجی چ خەویگ؟.
وەناکاوەو، کوورپەی ناو هەرۊلکەگە، دەسکەێدە زیڕە، کی لە شیرین خەو هەڵسنێدەی؟ هەڵبەت ژنەگە هەڵسێد، و ئەو کوورپە لاونێد، تا واز لە دەنگ گیرستنی بارێد، و بایەتە ژنەگە لەی زیڕەی مناڵە بڕەسێدەو، تا بزانێد چە خوازێد، تا ئەوەنە ئی مناڵە بخەفێد، شایەت خوەر بڕەسێدە داوان ئاسوو، و بایەتە ناشتا ئەرا پیاو پاتشا و مناڵەیلە بکەێد، و بایەتە رۊیی خوەش بوود، و پرشەی خەنیی باێد.
کام پیاو ئی توانای دەرۊنیە دیرێد؟.
هەنای بڕیگ مەردم گردەو بوون، و هەر دووان لەلیان وەیەکەو فچەفچ قسەیان تیەێد، ئیجا هەرکە چوودە ماڵ خوەی، ژن زانێد، گشتیان باس چە کردن، ژن زانێد رەنگ و مودێل پڕتاڵیان چە بۊ، ژن زانێد نووڕستن چەو فڵانی وە رۊ فڵانی لەوەر چە بۊ، ژن زانێد کامیان دووس کامیان دیرێد، و کامیان خوسەی لە کامیان تیەێد، ژن زانێد چەن تەڵ مۊ چەرمگ لە گیس فڵانی بۊ، و پیاویش هۊچ لە هۊری نەمەنیە.
ئی چۊن لە شایەتی دادگا هەر دوو ژن وە یەک پیاو دریەێدە قەڵەم؟.
لەبان یەیش، هەر پیاویگ لەناو مەردم ناو ژنی یا داڵگی ئاشکرا بکرێەید، لە شەرمی دەمچەوی سوورەو بوود، چۊنکە هیمان وە چەو کەمیگ وەژن نووڕن.
ئەگەر پیاویگ -ئەرا نموونە- مانگی دوو مەلیۆن دینار درارێد، و ژنەگە هۊچ کاریگ نەکەێد، چەنیگ ئەو پیاوە خوازێد تا پۊل لەجیای کارکردن ژن لەناو ماڵەگە بەێد؟.
ئەگەر گشت کارەیل ژن، لە دەیشت بارێدەی بایەتە پۊل بەێد، و هەڵبەت ئەو دوو مەلیۆن دینارە بەشی نێکەێد، و لەیە زانیمن ک ژن خەرج ماڵ دەێد. و لەبان ئەوە ژنیش هەس هەم لە دەیشت کار کەێد و هەمیش لەماڵ.
ئی چۊن ئۊشن بایەتە سڵا سڵای پیاو بوود، چۊنکە پیاو خەرج ژن و ماڵ دەێد؟.
