سلێمانی کەفێدە وەردەم.. بڕ وارانەیل لە هەرێم کوردستان لە ماوەی ٢٤ ساعەت گوزەشتە

شەفەق نیوز/ دەسەی کەشناسی و زەویلەرزەناسی لە سلێمانی، ئمڕوو شەممە، راگەیان کە پارێزگاگە بەرزترین ریژەی واران لە هەرێم کوردستان لە ماوەی ٢٤ ساعەت گوزەشتە توومار کرد.

ئاسۆ کەمال وەڕیەوبەر دەسەی کەشناسی ئەرا ئاژانس شەفەق نیوز وت: ریژەی واران لە پارێزگایل هەرێم کوردستان لە ماوەی ٢٤ ساعەت گوزەشتە جیاجیا بوی.

وتیش: بڕ وارانەیل لە ناوەند پارێزگای سلێمانی لەی ساڵە رەسیە 187 ملم، و پارەکە لەی نووسەر رەسیە 143 ملم، کە زیایەیگ وە  44 ملم لە ساڵ گوزەشتە توومار کرد،

کەمال دیاری کرد کە قەزای پێنجوێن فرەترین بڕ واران لە ماوەی ٢٤ ساعەت گوزەشتە توومار کرد کە رەسیە 48.4 ملم، و قەزای دۆکان کەمترین توومار کرد کە رەسیە تەنیا 3 ملم".

وتیش: ئی وارانەیلە کە نائاساییە لەی وەختە لە بەشیگ لە ناوچەی هاتێ کاریگەری خاسیگ داشتوود لە بان کەرت کشتوکاڵی، وەلێ سەختی لە شوینەیلیگ ترەک داشت جویر لافاو.

لەلای خوەییش، وەزارەت گواستنەوە و پەیوەندییەیل لە حکومەت هەرێم کوردستان لە بەیاننامەیگ رەسیە ئاژانس شەفەق نیوز وت: بڕ واران رەسیە 111.4 ملم لە هەولێر، و لە سلێمانی 318.5 ملم، و144.1 ملم لە دهۆک و0.2 ملم لە کەرکوک، و13.7 ملم لە گەرمیان، و153.6 ملم لە هەڵەبجە.

لەلای خوەییش، وەڕیەوبەرایەتی گشتی کشتوکاڵی لە ئیدارەی گەرمیان راگەیان کە بڕەیل کەورەیگ واران لە ٢٤ ساعەت گوزەشتە توومار کرد، کە زیایبوین وەرچەویگ وەرانوەر خود مەوقە لە ساڵ گوزەشتە نشان دەێد.

وەگورەی ئەو بەیاننامە کە رەسیە ئاژانس شەفەق نیوز: بڕەیل واران لە کەلار رەسیە 0.3 ملم کە بڕەگە رەسنە 124.1 ملم، وەرانوەر 76.6 ملم پارکە ئی مەوقە.

هەرلیوا، خانەقین بڕەیل کەمتر لە واران توومار کرد کە رەسیە 2.2 ملم، تا بڕ کەڵەکەبوی ئمساڵ بڕەسێدە 81.8 ملم، وەرانەور 90. 5 ملم پارەکە لەی مەوقە.

ناوچەی مەیدان بەرزترین بڕ واران لە ناوچەگە توومار کرد کە رەسیە 7 ملم وەماوەی یەک رووژ، تا بڕ ساڵەگە بڕەسێدە 164 وەرانەور 221. 5 ملم پارەکە،  و لە کفری رەسیە 1.5 ملم، تا بڕ گشتی بڕەسێدە 96.5 ملم، وەرانوەر تەنیا 76.6ملم پارەکە ئی مەوقە.

ئی خاسەوبوین وەرچەوە لە واران نشانەی وەرز کشتوکاڵی خاسیگ دەێد، کە دەسمیەتی لە پاڵپشتیکردن کەرت کشتوکاڵی دەێد، وەتایبەت دویای ساڵەیلیگ لە هشکەساڵی.