فه‌يليه‌يل كورد و پيكهاته‌ى فه‌يلى (به‌ش يه‌كه‌م)
شه‌فه‌ق نيوز/ گشت جاريگ زاراوه‌يل وه‌شيوه‌ێ خراويگ شيه‌و ناكريه‌ن، ته‌نانه‌ت فاشيه‌يل و نازيه‌يليش شانازى كرديان وه‌و ناسناوه‌يله وه‌پيان چڕيانه‌يان ك ملله‌ته‌يل تر نه‌فره‌تيان كرديان له‌بانى. ئيمه‌يش وه هه‌مان شيوه زاراوه‌ى (پيكهاته) له‌و راسيه وه‌ده‌ر نيه‌و وه‌گووره‌ى ماناگه‌يشى كيشه‌يگ پيك نايه‌رێد مه‌گه‌ر له حاڵه‌تيگ شيواز وه‌كارهاوردنه سياسيه‌گه‌ى له شيه‌وكردنيگ فيشتر داشتوود.
ئمجا فه‌يليه‌يل له‌ناو ملله‌تيان كوردن و پيكهاته‌ن له‌تى و ئاساييشه ته‌نيا وه فه‌يليه‌يل بچڕيه‌ن وه‌بى ئه‌وه‌گ گوزاره‌ى كورد وه‌پيانه‌و بلكنريه‌ێد. وه‌لێ له‌ناو ملله‌ته‌يل تر جوور برايه‌يل عه‌ره‌ب هه‌ناى وه‌پيان ئويشيه‌ێد (پيكهاته)ى كورده‌يل فه‌يلى، ئه‌وه ماناى ئه‌وه‌سه نه‌ته‌وه‌يگن سه‌روه‌خوه‌ێ، له‌يرايش وشه‌ى (پيكهاته) ك دويره‌و خريه‌ێد له كورد ناوه‌ڕووك و ئامانج تر ديرێد.
جوور وه‌هويرخستن، له ساڵه‌يل سه‌ده‌ى گوزه‌يشت و وه مه‌رام بنياتناين كۆمه‌ڵگايگ مه‌ده‌نى، هه‌وڵ و ته‌قلاى فريه‌يگ دريا وه‌خاتر شاردنه‌وه‌ى كيشه‌ى ناوچه‌يى و ناوه‌يل و ناسناوه‌يل نه‌ته‌وه‌يى وه‌هه‌ر شيوه‌يگ، جى داخه له‌ى وڵاته له‌ئاكام ناو و ناسناو نه‌ته‌وه‌يى و تايفى هه‌زاران كه‌س كوشيان و فه‌يلييش ئه‌و ناسناوه‌سه ك هه‌زاران قوربانى له‌لى كه‌فته‌و وه‌ل سه‌دان هه‌زار كووچ وه‌پيكرياێ.
هه‌رچه‌نى ك ناسناو فه‌يلى هويچ ماناى خراويگ نه‌يرێد له‌لاى خود كورده‌يل فه‌يلى و هويچ چشت خراويگ له‌بانى نه‌نويسرياگه له رووشنهويرى و به‌ڵگه‌يل مێژوويى، وه‌لێ له سه‌ره‌تاى دامه‌زرانن ده‌وڵه‌ت عراقيه‌و وه‌شيوه‌ێ خراويگ شيه‌و كريا. دوياى ده‌ركه‌فتن زاراوه‌ى ته‌به‌عيه‌ى عوسمانييش ك سنيه‌يل عراق گرته‌وه‌و ته‌به‌عيه‌ى ئيرانى ك به‌شيگ له شيعه گرته‌و، كورده‌يل فه‌يلى هه‌ميشه به‌ش سزادرياگ بوين له‌چوارچيوه‌ى نه‌ته‌وه‌ى كورد و مه‌زه‌و شيعه.
ئاشكرايشه دوياى شكه‌ست عوسمانيه‌يل و ده‌ركه‌فتن رووح نه‌ته‌وه‌يى عه‌ره‌بى و كوردى ئه‌و ديارده فراوان و بڵاوه‌و بوێ جوور ئاگر له پويش، له گوه‌زه‌يشته‌يش له كوردبوين فه‌يليه‌يل هويچ گومانيگ يا مه‌رجيگ نه‌وێ، وه‌لێ دوياى نيمه‌ى يه‌كه‌م له سه‌ده‌ى وه‌رين مه‌سه‌له‌ى كورده‌يل فه‌يلى سياسيه‌و كريا وه‌تايبه‌ت، ئه‌ويش وه‌حوكم به‌شداريكردنيان له جموجويل نه‌ته‌وه‌يى! يه‌يش هه‌رچه‌نى له هه‌مان وه‌خت به‌شدارييش كردن له جموجويله‌يل تر مه‌ده‌نى و سياسى وه‌تايبه‌ت له حزب شيوعى و باقى ره‌وته‌يل تر پيشه‌فتنخواز عراقى وه‌شيوه‌يگ گشتى.
دى جوور شه‌وه‌گ جموجويل رزگاريخزاز كورد له كورده‌يل فه‌يلى به‌تاڵ نه‌وێ، هويچ جموجويليگ تر سياسى مه‌زه‌وى شيعه‌يش له ئه‌وڵيه‌و تا ئاخرى له مه‌يدان سياسى سه‌رده‌م نه‌وێ ك كورده‌يل فه‌يلى له‌تى نه‌دێ له‌وانه‌گ له‌ڕوێ مه‌زه‌وييه‌و به‌شدارييان ئه‌كه‌ن. ئمجا ده‌ركه‌فتن هه‌ميشه‌يى ديرن له رويماڵ مه‌زه‌وى و له‌ڕوى مێژوويشه‌و راسييگ هه‌س ك ئه‌وانه له كووچكه‌ره‌يل نه‌وێن تا له‌شوونه‌يل تره‌و بان وه‌ره‌و عراق.
ئه‌گه‌ريش له‌ى سه‌رده‌مه جوور كه‌مينه تاريف كريايمنه، ئه‌وه ئيمه وه ريژه‌ى گه‌ورايگ زوورمينه‌ى مه‌ردم ره‌سه‌ن خوه‌رهه‌ڵات دجله بوينه ك كوردبوينيان له‌تى ئه‌را ژيان قه‌يه‌غه كريا. مێژوونويسه‌يليش ئاماژه‌ى وجوودمان ئه‌را ده‌يان و ته‌نانه‌ت سه‌دان ساڵ كرديان جوور گه‌وراترين مه‌ردمانيگ له‌ى روێوه‌ر جوگرافيه شان وه‌شان عه‌ره‌ب و مه‌ردمان تر، ك وه‌ئاشتى و ئارام وه‌كه‌و ژيان وه‌بى داوڕيان له نه‌ته‌وه‌يان.
له ديد سياسييش كيشه‌يگ ده‌ركه‌فت هه‌ناى ك رووح نه‌ته‌وه‌يى عه‌ره‌بى چيه وه‌ر شوفێنيه‌ت و ده‌سكرده ته‌كانداين مه‌كينه‌ى هويردكردن و نه‌هيشتن مه‌ردمان تر و ده‌سكرده له‌ناوبردن شيرازه‌ى مێژوويى و ژيان هاوبه‌ش له‌ى وڵاته‌و كووتايى وه ژيان ئاشتيانه هاورد ك شانازى ئه‌كردياد فه‌يليه‌يل له رووڵه‌يل كويه‌ن و ڕه‌سه‌ن ئى خاكه‌نه نه‌ك بيگانه‌ن له‌تى!
وه‌ئاشكرايش تائيسه لايه‌نيگ وه‌رپرس ده‌رنه‌كه‌فتگه قه‌وڵ ئازايه‌تى داشتوود وه‌ئه‌وه‌گ ئاده‌ميزاد هه‌ر ئاده‌ميزاد چ كه‌مينه يا زوورمينه بوود. وه‌رجه ئه‌وه‌يش كيشه‌گه نه‌ته‌وه‌يى يا مه‌زه‌وى بدێ كيشه‌گه كيشه‌يگ ئنسانيه، وه‌لێ وه‌خاتر وه‌ديكردن ده‌سپيچگ ئه‌را سزاى فه‌يليه‌يل وه‌شيوه‌يل جوراوجوور بيبه‌ش كريان له ماف هاووڵاتيبوين، يه‌يش له‌شوون له‌ناوبردن وه‌جه‌ميش و له‌وه‌ر خاتر كوشاننه‌وه‌ى ناو ئه‌وانه‌گ چين وه‌ره‌و پيرى مه‌رگ، وه‌لێ مه‌رگ نسيو له‌ليان نه‌ياشت، دى دوشمنيش بيجگه په‌لامارداين ناسنامه‌يان ڕييگ تر نه‌ياشت. ئايا قه‌وڵ (پيكهاته) وه ته‌نيا به‌سه له‌ى وه‌خته‌و له‌ى قوناغه ك ماركه‌و دعايه‌ى شماره‌يگ له كه‌سه‌يل و لايه‌نه‌يل ده‌س بكه‌نه چاره‌سه‌ر كيشه‌ى كورده‌يل فه‌يلى؟ يه‌يش له وه‌ختيگ ك هه‌ركام له به‌ڵگه‌يل تاوان به‌عس باس له‌وه نه‌كرد ك سزايان ته‌نيا له‌وه‌ر ئه‌وه بويه ك پيكهاته بوينه و هويچ قه‌ورسانيگيش وه‌بى ناونيشان نيه ئه‌را ئه‌و قوربانيه‌يله ك مه‌زار نه‌ياشتن وه‌ناو پيكهاته وه‌بى ناوهاوردن نه‌ته‌وه.
له به‌ش دويه‌م زياتر باس ئه‌كه‌يم بڕيگ چشت وه‌ناو خوه‌يه‌و ئويشيم تا بخه‌يمنه‌ى وه‌رچه‌و.
عه‌لى حسێن فه‌يلى
