کوردیگ خەڵات خاسترین وێنەگر ڤیستواڵ بۆڵیوود وەدەسهاورد
شەفەق نیوز/ دۊیەمین خوول ڤیستواڵ ناودەوڵەتی بۆڵیوود وەڕێوەچی، تورەج ئەسڵانی وێنەگر فیلم، وەڕەگەز کورد خەڵات خاسترین وێنەگردن وەدەسهاورد.
تورەج ئەسڵانی جۊر وەڕێوەبەر وێنەگردن فیلم سینەمایی “مالیخولیا” خەڵاتەگە وەدەسهاورد. دۊیەمین خول ڤیستواڵ ناودەوڵەتی فیلم بۆڵیوود، ساڵانە لە کۆتایی ساڵ لە بەشەیل فیلم درۊژ، بەڵگە فیلم، سیناریۆ، میوزیک، فیلم هیندی و چەن بەشیگتر وەرێوەچێد، خوولەگەی ئەمساڵ دۊێکە لە شار مۆمبای هیندستان وە ئۆنلاین وەرێوەچی.
فیلم سینەمایی مالیخولیا لە دەرهاوردن و وەرهەمهاردن “مورتەزا ئاتەش زەمزەم” وە نوێنەرایەتیی سینەمای ئیران لە بەش ڕکابەریی ئەو فیلمە بەشداربۊی و خەڵات خاسترین وێنەگردن وەرگرد.
تورەج ئەسڵانی لە ساڵ 1973 لە کرماشان لەداڵگبۊیە، دەرچگ بەش دەرهێنان زانکۆ “سوورە” تارانە و لە سینەمای ئیران و جەهان وە کەسیگ ناودیار ناسریاگە لە مژار وێنەگردن.
ئەو سینەماکار کوردە لە تەمەن 14 ساڵ یەکەمین ئەزموون سینەمایی دەوەپیکردیە و مەوقەی رەسیە تەمەن 25 ساڵ دەس وە کارە پرۆفێشناڵەگانی کردنە.
تورەج کار وێنەگردن و دەرهێنان ئەرا زیاتر لە 100 فیلم سینەمایی، بەڵگە فیلم، کورتە فیلم و فیلم ئەزموونی کردییە.
