ڤیدیۆ + وێنە.. دوو خوەشک بیکەس یە سی ساڵە قالی بویەسە کەسیان
شەفەق نیوز/ کارەگەی قەمریە و ستیە یوسف ئەرا دروسکردن قالی، لەو کارەگەیل کۆنەسە لە ناوچەی دێرک لە باشوور خوەرهەڵات سوریا.
قەمریە و ستیە دوو خوەشک تەنیان، کەسیگ نەیرن، نە باوگ نە برا و نە شوی، تەمەنیان هالە پەنجا ساڵان، لە ئاوای کریزیرو باشور شار دێرک نیشتنە.
دوو خوەشکەگە یە زیاتر لە ٢٠ ساڵە لەناو کەلاوی خەرگینیگ قالی دروس کەن، نەگ وە دووسی پیشەگە یا کەلتوور، باوجی ئەرا ژیان و گوزەرانی و تیکەی نان لە رەوشەیل سەختیان.
قەمریە یوسف ئەرا ئاژانس شەفەق نیوز ئویشێد: من و خوەشکەم پیشەی قالی دەسکرت لە داڵگمان بردیمن، و لە مناڵیەو خوەشمان لەی کارە هات، وەلێ دویای ئی تەمەن گەورە، کارەگە بویە خوازین ژیانمان، ک ئیمە دوو خوشک بیکەسیمن.
وتیش؛ لەی سەردەمە کەم لەی پیشەی کۆنە هەس، باوجی چین کەمیگ لە ناوچەگە خوەشیان لەلی تیەێد، چوینکە مەردمەگە هووکارەی قالی کارەگایل نوو بوینە.
یوسف وتیش؛ کار لە دروسکردن قالی وە ئامێرەیل کۆنە کەێد چوی قولاو و تیخ و شانگ ئاسنین و خوری، و دروسکردن یەک قالی هەفتەیگ کیشێد، و وەگورەی خوازین بسینەیلە دروس کریەێد.
لەلای خوەییش ستیە یوسف وت: تەنیا پویل کرادەسیان لە مەردمەگە وەرگرن وەبی یە ک نرخیگ ئەرا قالیەگە بنەن،ی هەر بسینیگ خوەی و ویژدانی، و دیاری کرد ک لەبان خەیر و سەدەقەیل خەڵک ئاوایەگە و ناوچەگە ژیانیان گوزەران کەن.
یوسف داوا لە دامەزراوەیل کۆمەڵگای مەدەنی لە ئیدارەی سەروەخوەیی و رێکخراوەیل بیگانە کرد دەس دەسمیەتی وەپیان بیەن، تا بتوێنن خانگ گەورەیگ بینا بکەن، و لە كار قالی چنینیان وەردەوام بوون، چوینکە ئی کارەگەیانە بویچگە، کەخوەی تەنیا کەلاوەی خەرگینیگە و لە زمسانان زیان لەناوی دوینن.
