ئەتیکێت گلەیی لەبان رەفتارەیل

شەفەق نیوز/ لە پشت هەر رەفتار بەدیگ، لەناو پەیوەندیەیل کۆمەڵگا، هاتێ کەسیگ گلەیی بکەێد، باوجی گلەییش زانستن وە بەشیگ لە ئەتیکێت خوازێد.  

ئۊشن: ئەگەر دووسد نەیاشتام گلەیی لەلید نەکردم، ک دیارە ئەو کەسە خوازێد پەیوەندی ناوبەینیان بمینێد، باوجی لە خود وەختەگە خوازێد دڵی پاکەو بکەێد، وگلەیی خوەی بۊشێد، ک هەرچەنی دووسی وپەیوەندی خاسیش بوود، ئەگەر شیوەی گلەییەگە وە قسەیل تیژیگ کریا، هاتێ دووسیەگە بشیوەنێد، ئەراوە گلەیی زیرەکییگ کۆمەڵایەتی خوازێد، تا دڵ کەسیگ نەڕەنجێد.

پسپۆڕەیل باوەت کۆمەڵایەتی ئۊشن: فرەجار،  پشتگووشخستن لە رەفتارەیل کاریگ داناییە، ک نەبایەت هەمیشە گلەویی بکریەێد، باوجی بایەتە تەقەلای ئەوە بوود ک پەیوەندیەیل کۆمەڵایەتی زیاتر ئاسانی ودووسی لەناوی بوود،       

ئەراوە، تەمەی وە وەرخودان وەرانوەر رەفتارەیل نیەکریەێد، چۊنکە ئەوە هیلێد ئەوەکان لەو کەسە دۊر بکەفن، لەلاییگ تریش، بایەتە گرنگی وە تەمن ناوبەین مەردم بیریەێد، ک رێز لە گەورە تەمەنەیل بگریەێد، و وەخشین نشانەیگە ئەرا پایەبەرزی خاوەنی.    

ئەگەر کەسیگ گلەیی لە کەسیگ کرد، بایەتە گرنگی بەێدە ئاشکراکردن ئەو رەفتارە ک گلەیی لەبانی دیرێد، وبایەتە وەدەنگ نزم و نەرم بوود، و مەوقە وشوین گونجیای ئەرای پەسەن بکەێد، و نەبایەت گلەییەگە لە سنوور خوەی دەرچوود، ک ئەگەر رکداری لەبان گلەیی بوود، هاتێ لەجیای پاکەوکردن دڵەیل، ئیجا بڕەسێدە خوسە و رەنجیان.