ئایا سرکەی سیف دەسمیەتیدەرە ئەرا چارەسەرکردن چەوری جگەر؟

شەفەق نیوز/ بیماری جگەر یەکیگە لە بیماری باوەیل لەبان ئاست جەهان و فرەجار پەیوەنی وە چاخی و شەکرەی جویر دوو دیرێد.

لەناو مەردم باوە وەکەر هاوردن سرکەی سیف جویر دەرمانیگ سروشتی دەسمیەیدەرە ئەرا لاوردن چەوری جگەر، باوجی ئایا یە تا چەن راسە؟

وەپای رووژنامەی  " The Times of India" توێژینەوەیگ لەبان ئاژەڵ ئەنجامدانە دەرکەفتیە، وەکارهاوردن رێژەی مامناوەندیگ لە سرکەی سێف هاتێ دەسمیەتیدەربوود لە کەمکردن چەوری جگەر و خاسترکردن تەندروسی لەش باوجی ئەگەر وە رێژەی زیای بادە وەکارهاوردن کاریگەری نەرێنی دروسکەێد.

لێکۆڵینەوەیل تا ئیرنگە نەتوەنستنە راستەوخوەی کاریگەری سرکەی سیف لە چارەسەرکردن جگەر چەوری بچەسپنن، و شارەزایەیل مژار خوەراک دووپاتیکەن هاتێ سرکەی سیف دەسمیەتیدر بوود ئەرا رێکخسن رێژەی شەکر و چەوری خوین، باوجی چارەسەر نییە ئەرا بیماری چەوری جگەر.

هەمیش هووشداری دەن لە زیای وەکارهاوردنی، چوینکە هاتێ بوودە مدوو کاریگەری لاوەکی وەبان گەیە و ریخەلوی.