ئیلام.. سێیەمین فیستیڤاڵ "رازان" ئەرا چیرووک کوردی کۆتایی وە کارەیلی تیەرێد وە بەشداری 113 کار
شەفەق نیوز - ئیلام
لە پارێزگای ئیلام فەیلی، لە خوەراوای ئیران، چالاکییەیل خول سێیەم لە فیستیڤاڵ "رازان" ئەرا چیرووک کوردی کۆتایی هات، وە بەشداری 113 کار ئەدەبی، و رێزگردن لە 17 لەلیان لە هەردوگ پۆل چیرووک و پۆدکاست، لە چوارچيوەی تەقەلایەیل هازدارکردن نۊسین وە زوان داڵگ و دەرخستن بەهرە ئەدەبییە گەنجەیل.
راپۆرتیگ ئەرا ئاژانس دەنگوباسەیل ئیرانی "ئیرنا"، دیاری کرد کە ئاهەنگ کۆتاییهاوردنەگە هاووەخت وەرد دەسکردن وە سی و چوارەمین هەفتەی کتاو و خوەنستن لە ئیران وەڕیەو چگ، و راگەیانن دەرەنجامەیل دەسەی دادوەری وەخوەی دی کە 12 کار لە پۆل چیرووک و پەنج کار لە پۆل پۆدکاست هەڵوژارد.
وەڕێوەبەر گشتی ئەرا رووشنهویری و رێنمایی ئیسلامی لە ئیلام، عەلی هیلشی، وت، کە پارێزگاگە دەسپێشخەرییەیل ئەرا هازدارکردن ئامادەبۊن زوان و ئەدەب کوردی وەخوەی دی، وە دەسنشانکردن ئەرا ئەوە کە چالاکییەیل ئەمینداریەتی زوان و ئەدەب کوردی و کۆمەڵەی "بەیان"، لە شان فیستیڤاڵ "رازان"، دەسمیەتی دانە لە پاڵپشتییکردن بەرهەمهاردن ئەدەبی و دەرخستن بەهرەیل نوە لە هۆنراوە و چیرووک.
لە لای خوەیەو، جیگر کاروبار رووشنهویری و راگەیانن لە وەڕێوەبەرایەتی گشتی ئەرا رووشنهویری و رێنمایی ئیسلامی، یونس قیتنانی، ئاشکرا کرد کە خول سێیەم جیوەجی کریا سەرەڕای ئەو ئاڵنگارییەیلە کە رۊوەرۊی رێکخستنی بۊنە، وە دەسمیەتی تەقەلای ئەدیبەیل و بایەخدارەیل وە کاروبار رووشنهویری.
وتیش کە هەڵوژاردەیگ لە کارەیل خول یەکەم وەرجە یە لە کتاویگ و چاپیگ دەنگی بڵاو کریان و رویکردنیگ وەرچەو وەرگردن، وە دیاریکردن بۊین ئاراستەیگ ئەرا بڵاوکردن کارە جیاوازەیل لە خول ئیسە وە شیوەی کاغەزی و دیجیتاڵی، وەپەی نووڕین وەرپرس هونەری ئەرا فیستیڤاڵەگە.
زیای کرد کە شارەزاییە کەڵەکەبۊیەیل و توانا ئەدەبییە وەردەسەیل لە پارێزگاگە ری دەن وە فراوانکردن بەشداری و زیایکردن بوارەیل نوو لە خول چوارەم.
لەلای خوەییش، وەرپرس هونەری ئەرا فیستیڤاڵەگە، حسێن شکر بەیگی، دووپات کرد لەبان دەرکەفتن نۊسەرەیل نوو کە خاوەن تایبەتمەنییەیل ئەدەبیی خاسیگن، وە بەرزنرخانن رۆڵ مامووستایەیل لە چەودیاریکردن بەهرە گەنجەیل، و وە هەژمارکردن ئەوە کە ئاست چیرووکە بەشداربۊەیل، و وە تایوەت ئەو براوەیلە لەلیان، شایستەی ئەوەن لە چاپکریاگەیل کاغەزی و دیجیتاڵی بڵاو بکریەن.
لە باوەت لایەنە رێکخستنییەیلەو، وەڕێوەبەر جیوەجیکار ئەرا فیستیڤاڵەگە، مورتەزا حاتەمی، دیارترین سەختییەیل خستە رۊ کە یاوەر خولەگە بۊن، کە لە ناویان هاووەختبۊن چالاکییەیل وەرد بۆنەیل ترەک و پشوو مەکتەوەیل، وە داواکردن ئەرا هازدارکردن هەماهەنگی وەرد دامەزراوەیل پەروەردەیی و زانکۆی مامۆستایەیل ئەرا دەرخستن بەهرەیل، و رێکخستن وەرشەیل پسپۆڕ لە نۊسین چیرووک وە بەشداری ئەدیبەیل ناسریاگ.
هەمیش پێشنیار دروسکردن توڕیگ پەیوەندیکردن لە ناوەین نۊسەرەیل چیرووک و توێژەرەیل کرد، و پشت بەسین وە ئامرازەیل جیەوگر ئەرا وەرگردن بەشدارییەیل لە وەخت بڕیان ئینتەرنێت، لە شان فراوانکردن بایەخدان وە ئەدەب مناڵەیل.
وحاتەمی دووپات کرد لە گرنگی وەردەوامبۊن نۊسین چیرووک وە کوردی ئەرا پاراستن زوان داڵگ و بەڵگەکردن ئەزموونە کۆمەڵایەتییەیل و گواستنەوەی کەلەپوور رووشنهویری ئەرا نەوەیل نوو، وە دووپاتکردن ئەوە کە رۆڵ فیستیڤاڵەگە لە رێزگردن لە براوەیلە رەد بوود ئەرا هازدارکردن گفتوگۆ و پەیوەندیکردن لە ناوەین نەوەیل لەڕی ئەدەبەو.
فیستیڤاڵ "رازان" وە سەرپەرشتی وەڕێوەبەرایەتی گشتی ئەرا رووشنهویری و رێنمایی ئیسلامی لە ئیلام رێک خریەێد، وە ئامانج وەرەونواچگن چیرووک کوردی و پاڵپشتییکردن بەهرە ئەدەبییە ناوخۆییەیل.
