"پێپسیکۆ" روی وەرەو عراق کەێد ئەرا فراوانکردن بەرهەمهاوردنی لە خوەرەڵات ناوڕاس

شەفەق نیوز- ئەڵگەردان تایبەت

ماڵپەڕ "پەیاکەر خوەراک" (Food Navigator) بەریتانی، خەوەردا کە رۆڵ عراق چۊ بنکەیگ هەرێمی ئەرا پیشەسازی "کۆمپانیای پێپسیکۆ" روی لە زیایبۊنە، کە وە وەگەرد شیویایە وەردەوامەیل لە خوەرەڵات ناوەڕاس، کۆمپانیاگە فراوانکردن بەرهەمهاوردن هەرێمی خوەی دووقات کەێد.

 ماڵپەڕە بەریتانییە پسپۆڕەگە لە کاروبار خوەراک، لە راپۆرتیگ کە ئاژانس شەفەق نیوز ئەڵگەردانی کردگە، دیاری کرد کە وە وەگەرد زاڵبۊن خەوەرەیل جەنگ لە ئیران وە دریژایی ساڵ 2026، وەلی لە سای نەۊن هیچ کووتایییگ ئەرا ململانێیەگە لە ئاسوو، ژیان و کارەیل وە شیوەیگ ئاسایی لە بەشەیل ترەک لە ناوچەگە وەردەوامن.

 ماڵپەڕەگە لە راپۆرتەگەی عراق چۊ نموونەیگ لەبان ئەوە باس کردگە، و وەسفی کردگە وە ئەوەگ بنکەیگ کۊن بۊە ئەرا خەوەرە پەیوەندیدارەیل وە جەنگ لە ماوەی دەیەی یەکەم لە سەدەی 21، و وەگەرد شوینە نزیکەگەی لە بنکەی جەنگەگە لە ئیران، وەلی ئی وڵاتە چۊ بنکەیگ پیشەسازی نوو ئەگەردار دەرکەفێد، و تەنانەت لەلایەن مارکە بازرگانییە گەورەیلیگ چۊ "پێپسیکۆ" گرنگی وەپی دریەێد.

 راپۆرتەگە باس تایبەتمەندییە ئاشکراگەیل عراق کرد چۊ جوگرافیاگەی و شمارە گەورەگە لە گەنجەیل و بەرزەوبۊن رەسین ئەرا پێکهاتە خوەراکییە بەرهەمهاوردیاگەیل وە شیوەی ناوخۆیی وەپای ریخریاگ "فاو" کە بڕیگ لە بەرهەمە بنەڕەتییەیل لەخوەی گرێد وەگەرد خورما و میوە و تەماتە و پەتاتە و پرۆتین ئاژەڵی.

 راپۆرتەگە لە زوان سەرۆک جیوەجسکار کۆمپانیاگە لە خوەرەڵات ناوەڕاس و باکوور ئەفریقا و پاکستان ئەحمەد شێخ کە لە مەوقەی لوتکەی کارەیل ئەمریکی-عراقی لەی دۊاییە، وتگە: "وە شوەی خوەمان چۊ یەکیگ لە بنکە کشتوکاڵییە میژووییەیل لە ناوچەگە، تەقەلا دەیمن پاڵپشتی توانایەیل کشتوکاڵی و توانای پیشەسازی عراق بکەیمن تا بوودە بنکەیگ ئەرا هەناردە خوەراکییەیل".

شێخ وەپای راپۆرتەگە زیاتر وت کە دەرفەتیگ هەس "ئەرا فتراقکردن توانای گەشەپیداین کەرت پیشەسازی خوەراک لە عراق و قایمکردن کەرت کشتوکاڵی لە وڵاتەگە، وەگەرد دەسکردن وە پیشەسازی خوەراکی هازداریگ"، هەمیش وت "ئومیدەواریمن دەرفەتەیل دروس بکەیمن کە قازانج ئەرا جفتیارەیل و پیشەسازی ناوخۆیی بڕەسنێد وەگەرد پاڵپشتیکردن ئەو بەرهەمەیلە کە وە شانازییەو لە عراق دروس کریەن".

 وەپای راپۆرتە بەریتانییەگە یە تەنیا پرۆژەی کۆمپانیاگە لە عراق ماوەی ئمساڵ نییە، کە کۆمپانیاگە هەمیش یاداشت لەیەکفامستن وەگەرد کۆمپانیای بەغداد ئەرا نووشینە گازییەیل (BSDC) واژوو کردگە وە ئامانج بەرزکردن توانای بەرهەمهاوردن ناوخۆیی ئەرا رەدکردن 250 ملیۆن بەرهەم لە ساڵیگ.

 راپۆرتەگە دیاری کرد کە "پێپسیکۆ" پشت وە هاوبەشییگ بەسێد کە لە ساڵ 1984ەو هەس، و راپۆرتەگە لە بەیاننامەی کۆمپانیاگە وتیش کە "ئی یاداشت لەیەکفامستنە دڵنیایی کۆمپانیای پێپسیکۆ وە بانان پیشەسازی ئەرا عراق رەنگ دەێدەو، و پاڵپشتی دامەزرانن و پیشەسازی ناوخۆیی کەێد".

 راپۆرتەگە لە زوان محمد شەلبایە، کە سەرۆک جیوەجیکارە کۆمپانیای خوەرەڵات ناوەڕاس و ئەفریقا ئەرا نووشینەیل وت کە کۆمپانیاگە عراق وە بازیزانیگ سەرەکی لە پیشەسازی نووشینەیل لە ناوچەگە هەژمار کەێد، و دیاری کرد کە ئارەزووە هاوبەشەگە فتراقکردن دەرفەتە ئەگەرداگەیل پەیوەندیدار وە فراوانکردن توانای پیشەسازی لەخوەی گرێد، وەگەرد قایمکردن رۆڵ عراق چۊ بنکەیگ پیشەنگ ئەرا بەرهەمهاوردن نووشینەیل لە خوەرەڵات ناوڕاس".

وەلی راپۆرتەگە باس چەن رخبارییگ کرد کە وەرەوڕۊ عراق بوون لەباوەت پیشەسازییەو، لەناویانیش شوینەیل هەڵگردن سەرد، و جیگیربۊن دابینکردن کارەبا، بیجگە لۆجستیکەیل بارکردن و وەختەیل.