کوشیان گەنجیگ وە چەقوو لە بازاڕ کەلار و کەفتن زەخمداری وە رویداویگ هاتوچو لە دەربەندیخان

شەفەق نیوز/ گەنجیگ لە تەمەن 18 ساڵان لە ئەنجام وەردەوەردەیگ لەناو بازاڕ کەلار لە پارێزگای سلێمانی گیانی لەدەسدا، وەگورەی قسەکەر پولیس گەرمیان، ئمڕوو دووشەممە.

 عەلی جەمال قەدوری قسەکەر پولیس لە بەیاننامەیگ رەسیە ئاژانس شەفەق نیوز وت: دویەشەو مرافەیگ کەفتە ناوەین بڕیگ لە گەنجەیل، کە بویە هوکار کوشیان یەکیگیان، وەناو ئالان ئاسۆ، کە وە چەقوو کوشیا.

  وتیش: هیزەیل پولیس و کوتپڕ دویای رویداوەگە توومەتبار سەرەکی لە تاوانەگە دەسگیر کردن، کە ئەویش گەنجیگە لە تەمەن 19 ساڵان وەناو (ئ - ئ - ح)، وەگەرد دوو کەس ترەک دەسیان لەناو مرافەگە بویە.

قەدوری دووپات کرد کە توومەتبار سەرەکی چگە ژیر تاوانەگەی، وەگورەی مادەی 406 لە یاسای سزادان عراقی بەندی کریا، و لێکۆڵینەوە لە رویداوەگە وەردەوامە.

 هەمیش لە سلێمانی، چوار کەس لە ئەنجام رویداویگ هاتوچو لەبان ری کەلار - دەربەندیخان، ئمڕوو دووشەممە، زەخمدار بوین، ئەوەیش دویای لادان ماشینیگ مارکەی "ليگزس" لە ریەگە لە نزیک ئاوای "قولەبەرز". 

وەچەودیەیل ئەرا ئاژانس شەفەق نیوز وتن: ماشینەگە کەسەیلیگ خەڵک باشوور عراق لەناوی بویە کە ئەرا سەرمان هەرێم کوردستان هاتیە، و تویش رویداویگ هات، و چوار کەس لەناوی زەخمدار بوین.

زەخمدارەیل زویوەزوی ئەرا خەسەخانەی "باوەنور" بریان، و ریکارەیل یاسایی جیوەجی کریان.