واشینتۆن پشتگیریکردن خوەی ئەرا گریەبەسەیل ئەمریکا وەرد هەولێر راگەینێد
شەفەق نيوز/ تامی برۆس خانمە قسەکەر وەزارەت دەیشت ئەمریکا، دووپات کرد کە ئەمریکا پشتگیری لە گریەبەسەیل کۆمپانیایل وزەی ئەمریکی وەرد هەرێم کوردستان کەێد.
برۆس لە کۆنگرەیگ پەیامنێر ئاژانس شەفەق نیوز ئامادەی بوی لە واشینتۆن وت: ئەمریکا پشتگیری لەو رێککەفتنەیل ئابووریە کەێد کە سوودی ئەرا گشت عراقیەیل تیەێدەو، لەناویان ئەو دوو رێککەفتنە کە لە هەفتەی گوزەشتە ئاشکرا کریان.
دووپات کرد کە گاڵ بەغداد و هەولێر دەیمن وەیەکەو کار بکەن ئەرا فراوانکردنی بەرهەم غاز لە نزیکترین وەخت، دیاری کرد کە ئیجویرە هاوبەشییگ ئابووری سوود ئەرا هەرلە گەل ئەمریکی و عراقی دیرێد، و دەسمیەتی عراق دەێد لە پیشکەفتن وەرەو وەدەسهاوردن سەروەریی لە چین وزە.
وتیش: کۆمپانیایل نەفت ئەمریکی وە ملیارا دۆلار لە کەرت نەفت لە هەرێم کوردستان بەرهەم هاوردن، و ئومید دیریمن بەرهەمهاوردن زیاتر لە کۆمپانیایل نەفت ئەمریکی لە گشت عراق بوینیمن.
خانمە قسەکەر دەیشت ئەمریکا باس دیدارە مارکۆ رۆبیۆ وەزیر دەیشت ئەمریکا وەرد مەسروور بارزانی سەرۆک وەزیرەیل هەرێم کوردستان لە واشینتۆن کرد لە هەفتەی گوزەشتە، دیاری کرد کە روبیۆ دەسخوەشی لە مەسروور بارزانی کرد ئەرا تەواوکردن رێککەفتن وەرد کۆمپانیایل ئەمریکی ئەرا فراوانکردن بەرهەم غاز سروشتی لە هەرێم، کە ئەوەسا دەسمیەتی عراق دەێد ئەرا وەجیهاوردن سەروەخوەیی لە چین وزە.
وەرجەیە، سێ سەرچەوەی ئاگادار و بەڵگەنامە، خەوەردان کە وەزارەت نەفت عراق سکاڵای دادوەری لەبان حکومەت هەرێم کوردستان لەبان گریەبەسەیل نەفت و غاز وەرۆ کۆمپانیایل ئەمریکی توومار کرد، وەگورەی بڵاوکردن رۆیتەرز.
