وینە.. شاندیگ لە وەزارەت پێشمەرگە رەسێدە بەغداد
شەفەق نیوز/ شاندیگ لە وەزارەت پێشمەرگە، شەوەکی ئمڕوو پەنجشەممە، وە سەردانیگ فەرمی، رەسیە بەغداد پایتەخت.
وەزارەتەگە لە بەیاننامیگ وت: دویای سەردانیگ لەلایەن شاند ئەمنی عراق ئەرا هەرێم کوردستان، وئەنجامدان چەن دیداریگ وەرد وەزارەت پێشمەرگە و وەزارەت ناوخۆ، لەبنەمای مکیسییگ فەرمی لەلایەن وەزارەت وەرگری عراق، ئمڕوو ٢٣ حوزەیران ٢٠٢٢، شاندیگ لە وەزارەت پێشمەرگە وە سەرۆکایەتی فەریق روکن عیسا عەزیز سەرۆک ئەرکان وەزارەت پێشمەرگە، وەئەندامیەتی هەردوگ جیگر سەرۆک ئەرکان ئەرا کاروبارەیل ئیداری، و راهێنان و ئۆپراسیۆنەیل، رەسیە بەغداد پایتەخت.
جیگر فەرماندەی ئۆپراسیۆنەیل هاوبەش پیشوازی لە فەریق روکن عیسا عەزیز وبڕیگ لە سەرکردەیل پێشمەرگە کرد.
وەگورەی بەیاننامەی ئۆپراسیۆنەیل هاوبەش، سەردانەگە ئەرا بەرزکردن ئاست هەماهەنگی ئەمنی و هەواڵگیری ناوبەین فەرماندەی ئۆپراسیۆنەیل هاوبەش وهیزەیل پاسەوان هەرێم کوردستان، لەناوچەیل خاوەن گرنگی ئەمنی هاوبەش، و جیوەجیکردن ئۆپراسیۆنەیل هاوبەش ئەرا وەشوینکەفتن جیماگەیل ریخریاگ داعش تیەێد.
هەرلیوا، سەرۆک ئەرکان فەدماندەی هیزەیل پێشمەرگە باس گرنگی ئی هاوکاری ئەمنیە لە بتەوکردن ئاسایش و ئارامی لە گشت ناوچەیل عراق کرد، و دەسخوەشی لە ئاست ئەو هاوکاریە لەلاین فەرماندەی ئۆپراسیۆنەیل هاوبەش ئەرا سەرکەفتن کار وەهەس یەک تیم کرد.
