وینە.. چاپ هەفتەم لە پیشبڕکی رووژنامەوانی ماف مرۆڤ لە کەلار
پەیامنێر ئاژانس شەفەق نیوز وت: زیاتر لە سی رووژنامەنویس گەنج لەناو پیشبڕکیەگە بەشداری کردن.
خانمە چالاکوان هەیفا مەجید ئەرا ئاژانس شەفەق نیوز وت: ئاهەنگەگە رێز لە سێ رووژنامەنویس لەناو ٣١ رووژنامەنویس نا، و بڕیگ لە گەورە رووژنامەنویسەیل و وەرپرسەیل حکومەتی ئامادەی بوین.
هەیفا خان وتیش: ئی پیشبڕکیە ساڵانە وە چەودیاری ریخریاگ (NED) وەڕیەو چوود، و راپۆرتەیل رووژنامەوانی دریەنە دەسەیگ تایبەت ئەرا پەسەنکردن سێ راپۆرت وەگورەی پەیمانەیل زانستی و پیشەیی ئەرا رێزلینان لە خاوەنیان.
هەیفا وتیش: هەڵقەیگ باسکردن لەناو پیشبڕکیەگە بوی، لەباوەت توومارکردن ماف مرۆڤ لە راگەیانن کوردی لەلایەن دوو رووژنامەنویس یاسین تەها و دڵشاد ئەنوەر.
هەیفا دیاری کرد ک ٣١ رووژنامەنویس وە ٣١ راپۆرت لەی وەرزە بەشداری کردن، و ٥٥٪ لە راپۆرتەیل رووژنامەوانی بوین، و ٤٥٪ راپۆرت ڤیدیۆ بوین، و لەڕوی جوگرافیا، راپۆرتەیل لە چوار پارێزگایل هەرێم کوردستان و ئیدارەیل گەرمیان و راپەرین و زاخۆ و کەرکوک هاتنە.
خەڵات یەکەم ئەرا راپۆرت ( چوین کەم ناسنامەیی مناڵیگ شەش ساڵان لە خوەنەواری بیبەش کەێد) بوی ک رووژنامەنویس عەمار عەزیز ئامادەی کرد، و لە پلەی دویەم راپۆرت (ماڵ گەنجەیل و نیگەرانی یەتیمەیل شارەگە) لەلایەن خانمە رووژنامەنویس نەجات محمد، و پلەی سێیەم ئەرا راپۆرت (مراوارییگ لە خەڕگ ژیان) وەلایەن رووژنامەنویس فازڵ حەمە رفعەت هات.
لە پیشبڕکیەگە کاریگ مۆسیقایی ئەرا گەنجەیلیگ لە کەلار پیشەکەش کریا.
یە هەفت ساڵە سەندوق نیشتمانی ئەرا دیموکراسی ئی پیشبڕکیە رێک خەێد، وە ئامانج زیای قایمکردن باوەتەیل ماف مرۆڤ لە رووژنامەوانی و رووژنامەوانی پیشەیی وەشیوەی گشتی.
