وەبەشداریکردن ٢٠٠ ماڵ بڵاوکردن.. پێشانگای ناودەوڵەتی کتاو سلێمانی وەڕیەو چوود.. وینە
شەفەق نیوز/ شەوەکی ئمڕوو پەنجشەممە، دەسکریا چالاکیەیل پێشانگای کتاو ناودەوڵەتی سلێمانی لە چوارەم چاپی، وە بەشداریکردن نزیکەی ٢٠ دەوڵەت.
پەیامنێر ئاژانس شەفەق نيوز لە سلێمانی وت: پێشانگاگە وە ئامادەبوین فەرمی و جەماوەری گەورەیگ واز کریا، و تا ماوەی ١٠ رووژ وەردەوامە، وتیش: ئاهەنگ وازکردنی وە ئامادوبوین وەزیر روشنهویری و گەنجەیل لە حکومەت هەرێم کوردستان و پارێزگار سلێمانی، و وەڕیەوبەرەیل گشتی و سەرۆک ژوورەیل بازرگانی و بڕیگ لە روشنهویر و خوەنەوارەیل وەڕیەو چگ.
پەیامنێر ئاژانسمان وتیش: رووبەر پێشانگاگە رەسێد ١٠ هەزار مەتر چوارسویکە، و ٢٠٠ ماڵ بڵاوکردن ناوخوەیی و هەرێمی و عەرەبی بەشداری کردن، لە ٢٠ دەوڵەت جویر ئیران و تورکیا و دەوڵەتەیلیگ عەرەبی و ئەوروپی، وەگەرد ماڵەیل بڵاوکردن کوردی و عراقی.
وتیش" ئەوەسا پێشانگاگە لە ١٧ی تەشرین دویەم تا ٢٧ تەشرین دویەم وەردەوام بوود، و لەبان زەوی پێشانگایل ناودەوڵەتی لە تاسلوجە پیشوازی لە جەماوەری کەێد، هەرلە ساعەت دەی شەوەکی تا ساعەت هەفت ئیوارە.
ناونشان کتاوخانە و دامەزراوەیل بڵاوکردن کوردی لەناو پێشانگاگە باو بوین، ک ئی پێشانگا وە ئاهەنیگ روشنهویری و نەتەوەیی ئەرا مەرەقەزکردن داهێنان کەلتوری کوردی زانن، نەگ تەنیا لە عراق باوجی لە تورکیا و ئیران و سوریایش.
رێکخەرەیل نووڕن ک پێشانگاگە رۆلیگ ئەرا ناسانن خوەنەوارەیل وە باوەت کورد رانێد، ک کتاوەیل ئی باوەتە شوین گەورەیگ لە کتاوەیل نمایشکریاگ داگیر کردن، وەگەرد فراوانبوین بازنەی گرنگیداین وەپی لە سیاسەتی و کۆمەڵایەتی تا رومانەیل دڵداری و چەنگ.
سلێمانی وە پایتەخت روشنهویری هەرێم کوردستان ناسریاگە، ئەرا گورجی فیکری وئەدەبیی و وازبوین کۆمەڵایەتی و کەلتوریی، و چوینکە بڕیگ لە گەورەی شاعر و نویسەر و هونەرمەندەیل کوردستان لەلی هاتنە.
