وە بەشداریکردن 11 دەوڵەت.. دهۆک میوانداری یەکەمین کۆنفرانس زانستی لەباوەت ئێزدیەیل کەێد
شەفەق نیوز/ ئمڕوو سێشەممە، یەکەمین کۆنفرانس زانستی ناودەوڵەتی لەبان ئێزیدییەیل لە پارێزگای دهۆک دەسوەپی کرد، لەژبر ناونیشان "ئاین، کولتوور، میژوو، جوگرافیا"، وە بەشداری فراوانیگ لەلایەن 105 توێژەر لە 11 وڵات جیاواز.
پەیامنێر ئاژانس شەفەق نیوز وت: ئامانج کۆنفرانسەگە رووشنکردنە لەبان ناسنامەی ئێزیدی و دۆکیۆمێنتکردن ئازارەیل ئی کەمینە ئایینییە و راسەوکردن ئەو نووڕینەیل هەڵە لەبانیان.
لە کۆڕیگ کە لە پەراویز کۆنفرانسەگە وەڕیەو چگ، ڤیان دەخیل پەرلەمانتار عراق رەخنە لەوە گرد کە لە "وەردەوامی پشتگووخستن حکومەت" لە پرس ئێزیدییەیل وتیش؛ رەوش نالەبار ئەوان لە پیشینەی کارەیل دەسەڵاتدارەیل عراق نییە.
دەخیل دووپات کرد کە "لە ساڵ 2014ەو هەزاران ئاوارەی شەنگال لە کەمپەیل هەرێمی کوردستان ژیەن، لە نەوین چارەسەری ریشەیی رەوشەیل مرۆیی خستیەسە رخداری".
دەخیل داوا لە حکومەت عراق کرد "رێککەفتن شەنگال کە ناوەین بەغدا و هەولێر واژوو کریاس جیوەجی بکەێد، یا لەلای کەمەو کار ئەرا گلەوخواردن ئاوارەیل ئەرا ناوچەیل خوەیان و نۆژەنکردن ژیرخان ئابووری و دابینکردن ئاسایش و سەقامگیری لە شنگال بکەێد".
وتیش: "نەوین گرنگیدان فەرمی، پەراویزخستن کۆمەڵگەی ئێزیدی و ئازارە وەردەوامەیل درویژەو کەن".
لەلای خوەییش کاروان عەجیب، ئەفسەر راگەیانن ناوەندی رووشنهیری لالش دووپات کرد کە کۆنفرانسەگە ئەرا ماوەی دوو رووژ وەپی چوود، و بڕیگ سیمینار زانستی هاناوی ئەرا باسکردن لە ئاستەنگە میژووی و ئیسەیل وەردەم ئێزیدییەیل.
ئاشکرا کرد کە "یەکیگ لە ئامانجەیل کۆنفرانسەگە ناساننن ئێزیدییە جویر ئایین و کولتووریگ رەسەن، و چارەسەرکردن فامستن هەڵە لەو باوەتە".
