هەولێر هەڵمەتیگ ئەرا زیایکردن رووبەرەیل سەوز وە کاڵین هەزاران دار دەسوەپیکەێد (وینە)
شەفەق نیوز - هەولێر
تیمەیل وەڕێوەبەرایەتی ئەندازیاری باخچەیل، شەوەکی ئمڕوو چوارشەممە، دەسکردە هەڵمەتیگ فراوان ئەرا زیایکردن رویبەرەیل سەوز لە شار هەولێر، لەڕێ چەقانن سەدان دار لە جویر "سیسام" و "دردار" وە درویژایی شەقام 60 مەتری و ژیر قەڵای مێژوویی هەولێر .
پەیامنێر ئاژانس شەفەق نیوز وت: هەڵمەتەگە لەچوارچمگ نەخشەی وەڕێوەبەرایەتیەگەس ئەرا چەقانن هەزاران دار لە ناوچەیل جیاجیا سەر وە سەرۆکایەتی شارەوانی هەولێر، و کارەیل دارچەقانن تا کۆتایی مانگ تشرین یەکەم/ئۆکتۆبەر ئێ سالە وەردەوامبوود.
ئامانج هەڵمەتەگە زیایکردن رێژەی رویبەرەیل سەوز و خاسکردن دیمەن رەنگین شارەگەس، وەگەرد فراوانکردن رویپووش سەوزایی لە ناوچەیل جیاجیا لە هەولێر.
وەڕێوەبەرایەتی ئەندازیاری باخچەیل دپاتکرد لەبان جیوەجیکردن گامەیل زیاتر ئەرا وەهێزکردن دارچەقانن و فراوانکردن رویبەرەیل سەوز لە گشت لایەیل شارەگە، وە دەسمیەتی و هەماهەنگی وەگەرد هاووڵاتییەیل و رێکخریاگەیل و چالاکوانەیل لە مژار ژینگە.
