هەفتەی ئایندە.. دارایی عراق کلکردن مووچەیل هەرێم کوردستان یەکلاوە کەێد
شەفەق نیوز/ بڕیارە وەزارەت دارایی عراق لە ناو گردەوبوین داهاتگ کابینەی فیدراڵی رەزامەنی لەبان لیست مووچەی هەرێم کوردستان بەێد، یەیش ری ئامادە کەێد ئەرا کلکردن شایستەیل دارایی فەرمانبەرەیل ئەرا مانگ نیسان.
وەگورەی ئەو زانیاریەیل تایبە کە کەفتنەسە دەس ئاژانس شەفەق نیوز لە وەرپرسیگ باڵای وەزارەت دارایی فیدراڵی، لەی دویاییە وەزارەت دارایی حکومەت هەرێم کوردستان داتای داهات نەفتی ئەرا بەغدا کلکردیە، کە لە ماوەی هەفتەی گوزەشتە نزیکەی 48 ملیار دینار بویە. هەرچەن وەزارەت دارایی لە بەغدا باس چەن تێبینییگ کرد لەبان قەوارەی ئەو داهاتەیلە، وەلێ وەجددی وەگەردی وەرنەگرد و تەنیا لایەن کوردی لەلی ئاگادارکرد.
وەگورەی سەرچەوەگە، حکومەت هەرێم ئاشکرا کرد کە بەشیگ لە داهات نەفت ئەرا دابینکردن خەرجییەیل کارکردن لە ناو هەرێم وەکار هاوردیە، دووپاتیش کرد کە مەزەنە کریا ئەو رێژە تەواو بڕەسێدە نزیکەی 150 ملیار دینار، بەڵام وەزارەت دارایی فیدراڵی کلکردن پویل نەوسان، و وە پشتبەسین وە بڕیار دادگای فیدراڵی کە داوا کەێد مووچەی فەرمانبەرەیل بچوود.
تەیف سامی، وەزیر دارایی فیدراڵی ئی باوەتە ئەرا ئەنجومەن وەزیرەیل کلکرد، کە بڕیارە رووژ سێشەممەی ئایندە لە ناو گردەوبوین ئەنجوومەنەگە لیستەگە پەسەن بکەێد.
وەگورەی سەرچەوەیل ئاژانس شەفەق نیوز، بڕیارە لە کۆتایی ئی هەفتە پڕۆسەی کلکردن مووچە ئەرا فەرمانبەرەیل هەرێم کوردستان هن مانگ نیسان دەسوەپی بکەێد، و لە سەرەتای مانگ ئایندە وە شیوەیگ کردەیی مووچە بەشەو بکەن.
لە وەختیگ فەرمانبەرەیل هەرێم کوردستان وە گشت سەبریگەو چەوەڕی مووچەیلیان کەن، گامەیل ئی دویایی حکومەت فیدراڵ دووپات کەن کە پرس مووچە نزیکە لە چارەسەرکردن، یەیش پەیامیگ دڵنیاکەر کلکەێد لە ژیر رووشنایی دووارەبوین قەیرانە داراییەیل هەرێم کە لەی دویاییە تویشیان بویە.
