هەرێم کوردستان لەیەکفامستن نوویگ وەرد بەغداد لەباوەت مووچە و شایستەیل دارایی پەسەن کەێد
شەفەق نیوز - هەولێر
ئمڕوو چوارشەممە ئەنجومەن وەزیرەیل هەرێم کوردستان لەیەکفامستن نوویگ ناوەین حکومەت هەرێم کوردستان و حکومەت فیدراڵی لەباوەت مووچە و شایستەیل دارایی ئەرا فەرمانبەرەیل و کراکارەیل کەرت گشتی لە کوردستان پەسەن کرد.
وەگورەی بەیاننامەیگ لەلایەن حکومەتی هەرێم، ئەنجومەن وەزیرەیل هەرێم کوردستان وە سەرۆکایەتی مەسرور بارزانی سەرۆک حکومەت هەرێم کوردستان، وە بەشداری قوباد تاڵەبانی جیگر سەرۆک حکومەت هەرێم کوردستان گردەوبوینیگ ئەنجامدا.
لە سەرەتای گردەوبوینەگە ئەنجومەن وەزیرەیل وە تونترین شیوە شەرمەزار ئەو پەلامارەیل تیرۆریستیە کرد کە هەرێم کوردستان کردنە ئامانج وەتایبەتی کێڵگە نەفتییەیل، کە زیان ماددی وەرچەویگ وە کەرت بەرهەمهاوردن نەفت رەسان، ئەنجومەن ئامانگ ئی پەلامارەیلە وە زیانڕەسانن وە ژیرخان ئابووری و کەرت وزەی هەرێم زانست.
ئەنجومەنەگە داوا لە حکومەت فیدراڵی کرد وەرپرسیارێتی خوەی لە هەڵگرێد و گامیگ کاریگەر بنەێد ئەرا وسانن ئی پەلامارەیلە و سزای ئەوانەگ دەسیان هاناوی بەێد وەگورەی چوارچیوەیل یاسایی.
دویای ئەوە ئەنجومەن وەزیرەیل باس تەوەرەیل گردەوبوینەگە کرد، کە رووشنایی خریا بان رەوشەیل دارایی هەرێم کوردستان و وەرەونواچگن دانوسەنین وەرد حکومەت فیدراڵی لەبان مووچە و شایستەیل دارایی هەرێم.
سەرۆک حکومەت و جیگر سەرۆک حکومەت ئاشکراکردن هویردیگ لەبان ئەو لەیەکفامستنە هاوبەشەیلە خستنە وەردەس کە دویەکە لە بەغدا لەبان دابینکردن شایستەبل دارایی هەرێم و پابەندبوینەیل کوردستان لەو چوارچیوە وەڕیەو چگ.
لە کۆتایی، ئەنجومەن وەزیرەیل پیشوازی لەو لەیەکفامستنە کرد و بڕیاردا وەردەوام بوون لە جیوەجیکردنی، کە لەناوی هاتگە حکومەت فیدراڵی وەگورەی رێککەفتنەگە مووچە و شایستەیل دارایی ئەرا هەرێم کوردستان کلکەێد.
لەلای خوەییش، عەلی حەمە ساڵح، سەرۆک بزووتنەوەی هەڵوێست لە پەرلەمان کوردستان لە پۆستیک فەیسبووک نویسان؛ حکومەت هەرێم کوردستان رەزامەنی دا لە کلکردن مانگانەی 120 ملیار دینار لە داهات ناوخۆ و رووژانە 230 هەزار بەرمیل نەفت ئەرا بەغدا.
