نزیکەی ٥٠٠ سزای دادوەری لە باوەتەیل گەندەڵی لە هەرێم کوردستان وەماوەی ساڵیگ
شەفەق نیوز/ دەسەڵاتەیل هەرێم کوردستان، ئمڕوو سێشەممە، خەوەردان ک دادگایل هەرێم کوردستان نزیکەی ٥٠٠ سزای دادوەری لە باوەتەیل گەندەڵی دارایی و ئیداری لە ساڵ ٢٠٢٢ دەرکردنە، و دووپات کرد ک هیمان عراق هاناو گەندەڵترین ٢٠ دەوڵەت لە جەهان.
ئەوەیش لەناو کۆنگرەیگ لەباوەت چاکسازی حکومەتی لە باوەت دەسپاکی و دژە گەندەڵی لە هەرێم کوردستان هات.
هەماهەنگکار تەمەیل ناودەوڵەتی لە حکومەت هەرێم کوردستان دیندار زێباری لەناو کۆنگرەگە وت: لە ساڵ ٢٠٢١ لەباوەت دژە گەندەڵی، ٤٩٣ سزای دادوەری دەرچگە، لەناویان ٣٣٧ سزا لەبان ٤٠٤ توومەتبار جیوەجی کریا، دویای تاوانباریان وە توومەتەیل گەندەڵی دارایی و ئیداری، و دووپات کرد ک پویل فرەیگ ئەرا گەنجینەی حکومەت گلەو دریا.
لەلای خوەییش، دادوەر ئەحمەد ئەنوەر سەرۆک دەسەی دەسپاکی لە هەرێم کوردستان وت: عراق هاناو گەندەڵترین ٢٠ دەوڵەت لە جەهان، و هەنای ناو عراق توومار کریەێد بیگومان هەرێم کوردستانیش هاناوی، چوینکە بەشیگە لە دەوڵەت عراق، هەرچەن ئیمە هایمنە ئەو باوەڕو ک گەندەڵی لەو بەشەیل وڵاتەگە جویر هەرێم نییە.
وتیش: ئەو ریخریاگ ناودەوڵەتیە ک ئەو هەڵسەنگاندنە توومار کردیە ئاگا لە هەرێم کوردستان نەیرێد، باوجی زانیاریەیلی لە دامەزراوەیل فەرمی لە دەوڵەت عراق بەێد، باوجی بڕیارە نویسینگەیگ لە هەرێم کوردستان واز بکەێد، جویر ئەوە ک لە بەغداد دیرێد.
هەردوگ وەرپرسە حکومەتیەگە دووپات لەبان گرنگی دامەزرانن دادگایی تایبەت وە باوەتەیل گەندەڵی لە هەرێم کوردستان کردن.
