نێچیروان بارزانی و وەزیر وەرگری تورکیا باس ئارامی و ئاسایش ناوچەگە کەن
شەفەق نيوز/ نێچیروان بارزانی سەرۆک هەرێم کوردستان، شەوەکی ئمڕوو شەممە، لەناو بەرنامەی بەشداریکردنی لە کۆڕبەند دیبلۆماسی ئەنتاڵیا، چەوی کەفتە یەشار گولەر، وەزیر وەرگری تورکیا.
سەرۆکایەتی هەرێم کوردستان لە بەیاننامەیگ رەسیە ئاژانس شەفەق نیوز وت: لە دیدارەگە باس پەیوەندییەیل ناوەین تورکیا و عراق و هەرێم کوردستان کریا، و هەمیش هاوکاری هاوبەش ئەرا مقیەتیکردن ئارامی و ئاسایش لە ناوچەگە، هەمیش باس رەوش گشتی لە جیهان و عراق و ئاسووەیل بانان لە ناوچەگە وەشیوەی گشتی کریا، و باس رای خوەیان کردن.
بەیانامەگە وتیش: هەردوگ لایەن دووپات لە گرنگی و پایەی پرس ئاشتی لە تورکیا کردن، و دووپات لە گرنگی پشتگیریکردن تەقەلایل سەرکەفتن ئەو پرسە کردن.
سەرۆک هەرێم کوردستان و وەزیر وەرگری تورکیا، هاوڕایی خوەیان نشان دان لەبان گرنگی قایمکردن کار هاوبەش و هەماهەنگی ناوەین دەوڵەتەیل ناوچەگە ئەرا مقیەتیکردن ئاسایش و ئارامی و دویرخستن ناوچەگە لە قەیران و ئاڵووزی زیاتر.
لە دیدارەگە هەمیش باس بڕیگ باوەت ترەک کریا کە گرنگی لەلای هەردوگلا دیرن.
