نێچیروان بارزانی: گیچەڵەیل تەکنیکی ریگرە لەنوای کلکردن نەفت هەرێم کوردستان
شەفەق نیوز/ سەرۆک هەرێم کوردستان نێچیروان بارزانی، ئمڕوو سێشەممە، هووکار دەسوپینەکردن هەناردەی نەفت هەرێم لەری بوڕی نەفتەیل ئەرا بەندەر جیهان تورکی گلەودا ئەرا هەبوین گیچەڵەیل تەکنیکی ناوەین هەولێر و بەغداد، لە هەمان وەخت هەبوین ئو تەقەلایەیل حکومەت فیدراڵی وە سەرۆکایەتی محەمەد شیاع سودانی لە خزیان عراق وەناو لیست وردەوردەیل ناوچەگە.
یە لە بەیانیگ رووژنامەوانی ئمڕوو هاتیە لە "ئەبو زەبی" لە پەراوێز سەردانەگەی ئەرا وڵات ئیمارات.
سرۆک نێچیروان بارزانی لە باوەت دۆسیەی پێکهاوردن حکومەت نوویگ لە هەرێم و گفتوگو وەردەوامەیل ناوین دوو حیزبە سەرەکیەگە پارتی دیموکرات کوردستان و یەکێتی نیشەیمانی وت؛ گفتوگوی نوویگ هەس لەناوەین دوو حیزبگە لە ئێ مژارە، هووکار سەرەکی دیرکەفتن گفتوگویەیلیان چوودەو ئەرا پشووی نەورووز و جەژن قوربان، وتیش؛ باوجی ئیمە لەبان ری راسەگە ریکەیمن لە پێناو ئەوەگ بتوەنین حکومەت نوویگ ئەرا کوردستان دروسبکەێن.
لەباوەت دوارە دەسوپیکردن وە کلکردن نەفت هەرێم کوردستان دیاریکرد، بڕیگ گیچەڵ تەکنیکی هەس لەی باوەتە، دووپاتکرد، حکومەت هەرێم ها لە ئامادەکاریکردن ئەرا دوارە دەسوەپیکدن کلکردن نەفت لەری بوریەیل کلکردن.
سەرۆک هەرێم کوردستان لە وردەوردەیل ناوچە قسەکرد و وت؛ "بەغداد و وەتایوەت بەرێز سودانی ئەوەگ لەدەسیهات کردێ و کارکرد لەپێناو ئەوەگ عراق لەی وردەوەردەیل و گیچەلەیل دویرەوبکەێد"، وتیش "گیچەڵەیل خود عراق کەم نییە نیەوێد وە هویچ شیویگ لە شیوەیل ریگە بدرێد بکەفێدە ناو ئێ گیچەڵەیلە.
