نێچیروان بارزانی لە یاد ئەنفال: هابان بەغداد قەرەبوی کەسوکار قوربانیەیل بکەێد و بڕیارەیل دادگا جیوەجی بکەێد
شەفەق نیوز/ سەرۆک هەرێم کوردستان نێچیروان بارزانی، ئمڕوو دووشەممە، دووپاتکرد هەڵمەتەیل ئەنفال کە رژێم وەرین وەرجە 37 ساڵ جیوەجیکرد وە یەکیگ لە بەدترین تاوانەیل جینۆساید، دوارە داوا لە حکومەت فیدراڵی کرد ئرا جیوەجیکردن بڕیارەیل دادگای باڵای تاوانەیل و قەرەبویکردن کەسوکار قوربانیەیل لە گشت لایەنیگەو.
بارزانی لە بەیاننامەیگ وەبوونەی یاد 37 ساڵەی هەڵمەتەیل ئنفال رەسیە ئاژانس شەفەق نیوز وت "زیاتر لە 182 هەزار و مناڵ و ژن لە رۆلەیل گەل کوردستان بوینە قوربانی لە ساڵ 1988، و هێمانگ کاریگەری ئازار وەخشەگەی لە ویژدان و یادەوەری گەلگەمان مەنییە".
وتیش "لەی بوونە، یاد شەهیدەیل ئەنفال وەهویرەو تێریمنەو و سڵاو لە بنەماڵە و کەسوکار خوەراگریان کەیمن، دووپات کەیمن حکومەت فیدراڵی عراق، وەرپرسیاریەتی یاسایی و ئەخلاقی دیرێد لە قەرەبویکردن کەسوکار ئەنفالکریاگەیل وە گشت جویریگ، پێویستە بڕیار دادگای باڵای تاوانەیل جیوەجی بکەێد ک ئەنفال جویر جینۆساید و تاوانیگ دژ مرۆڤایەتی ناسانییە.
سەرۆک هەرێم دووپاتکرد لەبان "لایەنە پەیوەنیداریل کوردستان وەردەوامن لە پاڵپشتیکردن خێزان شەهیدەیل و دوارە خاسەوکردن ناوچەیل زەرد وەخوەی دیان، و مینەکردن روفات قوربانیەیل و گلەودانیان ئەرا نیشتیمان"، دیاریکرد تەقەلاگان وەردەوامن ئەرا "جوەجی رەسانن دانوەپیدانان ناودەوڵەتی تەواویگ وە تاوان ئەنفال جویر تاوانیگ جینۆساید".
بارزانی لە کۆتایی بەیانناماگە وەیش "قەوارە و دەسکفتەیل هەرێم کوردستان بەرهەم قوربانیەیل شەهیدە، دووپاتکەیمن لەی یادە داكۆكى له یەکڕیزی و پێکەوەيى ئەرا پاراستن مافە دەستوورییەیل و بونیاتناین ئایندەیگ خاستر پڕ له دادپەروەری و ئاشتی ئەرا گەل كوردستان کەیمن.
