نێچیروان بارزانی: ئەرک حکومەت عراقە کە نەیلێد شنگال جویر شوینیگ ئەرا میلیشیایەیل بمینێد
شەفەق نيوز- هەولێر
نێچیروان بارزانی سەرۆک هەرێم کوردستان، ئمڕوو یەکشەممە، دووارە داوا لە حکومەت عراق فیدڕاڵی کرد، کە دەرکردن میلیشیایەیل و باڵە چەکدارەیل لە قەزای شنگال گرنگە کە فرەیان ئێزیدیە، دووپاتیش کرد کە نویسنگەی رزگارکردن رفیاگەیل ئێزدی تا یەک رفیاگ لە چنگ داعش مەنیە هەر کار خوەی کەێد.
سەرۆک نێچیروان بارزانی لە بەیاننامەیگ وەبوونەی 11هەمین ساڵیاد جینۆسایدکردن ئێزدیەیل وت: یاد ئی ساڵیاد زیاندارە ئەرا جینۆسایدکردن ئێزدیەیل کەیمن، و وە رێز دڵسووزی سڵاو لە قوربانیەیل ئەو تاوان داعشە کەیمن، و پابەندبوینمان وە پیشکەشکردن پاڵپشتی ئەرا هاوڵاتییەیل ئێزدیمان دووپات کەیمن، و وەگەرد گشت زیانەیل وە ئومیدیگ نووڕیمنە بانان و کار وەیەکەو کەیمن ئەرا تیمارکردن زەخمەیلیان.
وتیش: جی خەفەت و نیگەرانی قویلە کە 11 ساڵ رەد بوی و هیمان نزیک نیمەی ئێزدیەیل لەناو کەمپەیل مەننە لە سای رەوشەیل دویرخستن و کۆمەڵایەتی و دەروینی سەختیگ.
سەرۆک هەرێم کوردستان وتیش: ئەرک حکومەتە وەشیوەیگ خاستر لاییگ وە هاوڵاتیەیل ئێزدیی بکەێدەو و قەرەبوویان بکەێد، و نەیلێد شنگال بوودە شوینیگ ئەرا میلیشیایەیل و باڵە چەکدارەیل و ئەرا یەکلاییکردن ئەژندایل هەرێمی.
دووپاتیش کرد کە بایەسە بڕوایی و دڵنیایی و ئاسایش و ئاوەدانی و خزمەتگوزاری ئەرا شنگال و گشت ناوچەیلی باێدەو، و دادپەروەریی ئەرا ئێزدیەیل وەجی باێد، و تاوانکارەیل سزای خوەیان بوەن.
نێچیروان بارزانی دووارە دووپات کرد لەبان جیوەجیکردن رێککەفتن ناوەین حکومەت هەرێم کوردستان و حکومەت فیدراڵی ئەرا گونجانن رەوشەیل لە شنگال و مقیەتیکردنی، و داوا لە کۆمەڵگای ناودەوڵەتی کرد دەسمیەتی ئێزدیەیل لە گشت روییگەو بیەێد.
سەرۆک هەرێم کوردستان سوپاس لە گشت ئەو دەوڵەتەیلە تاوانەیل دژوە ئێزدیەیل وە وە جینۆساید دادە قەڵەم، وتیش: هەر وەردەوام بویمن لە تەقەلای دانوەپیدانان زیاتر کە جینۆسایدە لە ئاست ناودەوڵەتی.
نێچیروان بارزانی لە کۆتایی بەیاننامەگەی وت: سوپاس و رێز ئەرا هاوپەیمان ناودەوڵەتی دیریمن لە شکست داعش، و دڵنیای خوەشک و برایل ئێزدیمان کەیمن کە هەر پشت ئەوان مینیمن و نویسنگەی ئیمە هەر وەردەوامە لە کارکردن ئەرا رزگارکردن رفیاگەیل و ئاشکراکردن چارەنویسیان تا یەک رفیاگ ئێزدی مەنیە.
