نێچیروان بارزانی دووپات کەێد لە گرنگی نەهیشتن دووارەوبوین پەلامارەیل ئاسمانی وەبان هەرێم کوردستان
شەفەق نيوز - هەولێر
نێچیروان بارزانی سەرۆک هەرێم کوردستان، ئمڕوو سێشەممە، دووپات کرد لە گرنگی نەهیشتن دووارەوبوین پەلامارەیل وە فرۆکەیل بێفڕۆکەوان وەبان ژیرخانەیل نەفتی لە هەرێم کوردستان.
ئەوەیش لە دیداریگ وەرجە نیمەڕو ئمڕوو هات وەگەرد نوینەر تایبەت ئەمیندار گشتی نەتەوە یەکگرتگەیل و وەرپرس نەتەوەیی لە عراق.
سەرۆکایەتی هەرێم کوردستان لە بەیاننامەیگ رەسیە ئاژانس شەفەق نیوز وت: لە دیدارەگە باس رەوشەیل سیاسی لە عراق و هەرێم کوردستان، و پەیوەندییەیل ناوەین هەولێر و بەغدا کریا، وەگەرد گفتوگۆ ناوەین دوو لایەن ئەرا چارەکردن گیچەڵەیل گیرهاتگ، و هەمیش ئەو پەلامارەیلە وە فرۆکەیل بێفڕۆکەوان کە لەی دویاییە هەرێم کوردستان کردنە ئامانج.
هەردوگ لایەن هەمیش باس رۆڵ کلکریای نەتەوە یەکگرتگەیل لە عراق و هەڵسەنگاندنی ئەرا ماوەی کاری لە وڵات کردن.
نێچیروان بارزانی لەو دیدارە دووپات کرد لە ئامادەیی هەرێم کوردستان ئەرا هاوکاریکردن وەرد نەتەوە یەکگرتگەیل، دووپات لە گرنگی گفتوگۆ ناوەین هەولێر و بەغدا کرد، و گرنگی کلکردن مووچە و شایستەیل دارایی ئەرا هەرێم وەگورەی رێککەفتنەیل واژووکریایی، هەمیش نەهیشتن دووارەوبوین پەلامارەیل ئاسمانی وەبان هەرێم، جویر هەڕەشەیگ ئەرا ئاسایش و ئارامی عراق.
لەلای خوەییش، حەسان باس نیگەرانی خوەی کرد لە دووارەوبوین پەلامارەیل وە فرۆکەیل بێفڕۆکەوان، دووپاتیش لە پاڵپشتیکردن تەواو نەتەوە یەکگرتگەیل ئەرا گفتوگۆکردن ناوەین هەولێر و بەغدا، و مسۆگەرکردن خەرج شایستەیل دارایی هەرێم، و مقیەتیکردن ئاسایش و ئارامی عراق.
دیدارەگە باسکردن نووڕینەیل لەباوەت دویاترین گەشەی رەوشەیل لە ناوچەی خوەرھەڵات ناوڕاس کریا.
وەرجەیە، محمد شیاع سودانی سەرۆک وەزیرەیل عراق، فەرماندەی گشتی هیزە چەکدارەیل، باس ئەو پەلامارەیلە وە درۆنەیل بومبی کە ناوچە نەفتیەیل لە هەرێم کوردستان کرد کە و کار تیرۆری دادەی قەڵەم.
سودانی لە چەوپیکەفتنیگ وەرد ئاژانس "ئەسۆشيتد پریس" وت: حکومەت فیدراڵی وەگەرد دەسەڵاتەیل هەرێم کوردستان و هیزەیل هاوپەیمان ناودەوڵەتی کار کەێد ئەرا دیاریکردن ئەوانەگ لەی پەلامارەیلە وەرپرسن و سزادانیان.
