نێچیروان بارزانی: تەقەلایل ئیمە وەردەوامن ئەرا وەدەسهاوردن دانوەپیدانان زیاتر ناودەوڵەتی ئەرا جینۆساید ئێزیدییەیل

شەفەق نیوز- هەولێر

ئمڕوو دووشەممە، نێچیروان بارزانی، سەرۆک هەرێم کوردستان دووپات کرد کە هەرێم کوردستان وەردەوامە لە هەوڵ و تەقەلایەیلی لە ئاست ناودەوڵەتی ئەرا وەدەسهاوردن دانوەپدانان زیاتر وە جینۆساید ئێزیدییەیل. و مەردم ئی پیکانە دڵنیا کرد کە فەرمانگەی رزگارکردن ئێزیدییە رفیاگەیل وەردەوامە لە کارکردن ئەرا ئازادکردن رفیاگەیل و ئاشکراکردن چارەنویسیان تا ئەو وەختە کە تاکە رفیاییگ بمینێد کە چارەنویسی نادیارە.

وتار نێچیروان بارزانی لە ناو بوونەیگ پیشکەشکریا کە لەلایەن ریخریاگ ئێزیدی (یەزدا) و ریخریاگ ئەڵمانی (هاوکاری ئەڵمانی) لە هەولێر ئەرا یاد یانزەهەمین ساڵیاد جینۆساید ئێزیدییەیل وەڕیەو چگ.

دڵشاد شەهاب جیگر سەرۆک هەرێم کوردستان و قسەکەر سەرۆکایەتی هەرێم کوردستان، وە ناو نێچیروان بارزانی، وەیاوەری شاندیگ سەرۆکایەتی هەرێم بەشداری لە چالاکییەگە کرد و وتار سەرۆک کوردستان لە چالاکییەگە پیشکەش کرد.

شەهاب وتارەگەی بارزانی پبشکەش کرد، کە لەناوی وت: "لە چەن رووژ ئایندە یاد 11 ساڵەی پڕ لە ئازار جینۆساید ئێزیدییەیل کەیمن، گشت ساڵیگ هەرێم کوردستان وە گشت پێکهاتەکانییەیلی، وە خەم و پەژارەیگ قویل و رێز و دڵسۆزییەو، وە یاد گشت قوربانیەیل تاوانە قێزەونەگەی سەدە، ئی ساڵیادە کەێد".

وتیش: "ئەرک ئیمەسە کە ئمڕوو لێرە بویمن، ئیمە لێرەیمن ئەرا دووپاتکردن ئامادەیی و پابەندبوینمان وە پیشکەشکردن پاڵپشتی و هاوکاری تەواو ئەرا هاووڵاتیەیل ئێزیدیمان، و تا وەپییان بویشیمن: ئیوە تەنیا نین. ئیمە هایمنە گەرددان، جویر هەمیشە بویمن، و لە گشت وەختیگ وەرد ڕیوە مینیمن".

باس ئەوەیش کرد کە"ئەوەگ جی پەشیمانی و نیگەرانی قویلە کە 11 ساڵ وەبان  جینۆساید ئێزیدییەیل رەد بویە و نزیکەی نیمەی ئی پێکهاتهی رەسەن و بنەڕەتییە لە کۆمەڵگەی ئیمە هیمان  ژیانیگ سەخت و ئاوارەیی لەناو کەمقەیلە مەننە، لەژیر رەوش سەخت ئابووری و کۆمەڵایەتی و دەروینیەو ژیەن، ناوچەیلیان ئاوەدان نەکریانە، و تا ئیسەیش ئارامی ئەوەنە جیگیر نییە، کە دڵنیایان بکەێد ئەرا گلەوخواردن وەرەو میلکان خوەیان، و لەوە سەختتر، هیمان دادپەروەری ئەرا مەردم ئێزیدی بەدەست نەهاتگە”.

وتیش: "ئەرک حکومەت عراقە خاستر ئاگادار هاووڵاتییە ئێزیدییەیل بەێد و گرنگییگ جددیتر بەێد، وەرپرسیارێتیی سەرەک حکومەت عراق ئەوەسە کە دی ری نەێد شنگال و ناوچە ئێزیدییەیل بوونە شوین جەنگ باڵە چەکدارەیل و میلیشیایەیل. بایەسە ئاسایش و بیوەیی و خزمەتگوزارییەیل ئەرا شنگال و ناوچەیل ترەک گلەو بخوەن، دڵنیایی وە ئێزیدییەیل بەێد کە بتوانن گلەو بخوەن و میلکان خوەیان ئاوەدانەو بکەن".

دڵشاد شەهاب، دووپاتکردن سەرۆک هەرێم کوردستان نووەو کرد، وە گرنگی "جیوەجیکردن رێککەفتن ناوەین حکومەت هەرێم کوردستان و حکومەت فیدراڵی عراق ئەرا ئاساییکردن رەوش شنگال و کردنی وە پارێزگا، و نەبایەس شنگال تا هەمیشە جویر شوین جەنگ گروپە چەکدارەیل و جیوەجیکردن ئەجێندا هەرێمیەیل بمینێد، وەردەوامی ئی رەوشە لە شنگال و دەورگردی نادادپەروەریگ گەورەس کە وەرانەور ئێزیدییەیل ئەنجام دریەێد، لە وەختیگ کە گرنگە هاوکاری و پاڵپشتی بکریەن تا پای خوەیان بیەنەگەز و ژیانیان دروس بکەن.